Genesisi 47 - Siswati 1996 Bible

¹ Ngako-ke Josefa wahamba wayawubikela Faro, watsi: “Babe, nabomnaketfu, netimvu tabo, netinkhomo tabo, nako konkhe labanako sebefikile baphuma eKhenani, sebaseGosheni.”

² Emkhatsini wabomnakabo wakhetsa baba sihlanu wayawubetfula kuFaro.

³ Inkhosi Faro yababuta yatsi: “Yini umsebenti wenu?” Bamphendvula batsi: “Sibelusi, njengobe nabobabe babengibo.

⁴ Sitfutsele kulelive, ngobe eKhenani indlala seyibhoke kangangobe sekuze kuphele nemadlelo alemfuyo yetfu. Siyakucela kutsi mane usivumele sikhosele eGosheni.”

⁵ Faro wakhuluma kuJosefa watsi: “Uyihlo nabomnakenu bete kuwe.

⁶ Lonkhe lelive laseGibhithe lisetandleni takho. Babeke bakhe endzaweni lencono kakhulu, abakhe eGosheni. Nakukhona labanelikhono lekwelusa emkhatsini wabo, babeke babe tindvuna tebelusi bemfuyo yami.”

⁷ Josefa wabe sewungenisa Jakobe, uyise, wametfula kuFaro. Jakobe wakhulekela kuFaro amfisela tibusiso.

⁸ Faro wabuta Jakobe watsi: “Sewuneminyaka lemingakhi budzala?”

⁹ Jakobe wamphendvula watsi: “Iminyaka yami yekuzulazula seyili-130. Leminyaka lembalwa inebulukhuni emphilweni yami. Noko ngisengakabi mdzala ngefika eminyakeni yabokhokho ekuzulazuleni kwabo.”

¹⁰ Jakobe wase ubusisa Faro, wavalelisa, waphuma.

¹¹ Josefa wabeka uyise nabomnakabo wabakhela eveni lelincono laseGibhithe, endzaweni levundze kakhulu, eceleni kwelidolobha laka-Ramsesi, njengobe abeyalwe nguFaro.

¹² Josefa wapha uyise kudla, wapha nabomnakabo, nemndeni weyise; kwaya ngebunyenti babo.

Kuphatsa kwaJosefa ngesikhatsi sendlala

¹³ Kudla kwaphela yonkhe indzawo; ngobe indlala yase ibhoke kakhulu eveni laseGibhithe nelaseKhenani, ngako-ke bantfu balamba.

¹⁴ Josefa wase ubutsela ndzawonye yonkhe lemali leyayingene ngekutsengiswa kwekudla eveni laseGibhithe nelaseKhenani. Yonkhe lemali wayiletsa endlini yaFaro.

¹⁵ Yatsi kube iphele yonkhe imali eveni laseGibhithe nelaseKhenani, onkhe emaGibhithe eta kuJosefa afike atsi: “Siphe kudla! Ungasiyekela nje kodvwa sibulawe yindlala embikwakho? Yonkhe imali yetfu seyiphelile.”

¹⁶ Josefa wabaphendvula watsi: “Letsani tinkhomo tenu, nitsenge ngato, ngitaninika-ke kudla, nangabe imali yenu seyiphelile.”

¹⁷ Ngako-ke baletsa tinkhomo tabo batinika Josefa, batsenga ngato. Josefa wabanika kudla bonkhe labeta kutawushintjisa ngemahhashi, nangetimvu, nangetimbuti, nangetinkhomo, nangetimbongolo. Wonkhe lowo mnyaka waphela seloku abanika kudla ngekutsi bakuntjintjise ngetifuyo.

¹⁸ Watsi kube uphele lowo mnyaka, beta kuye ekucaleni kwemnyaka lolandzelako, bafike batsi: “Singeke sikufihle loku, nkhosi, kutsi imali yetfu yonkhe seyiphelile, nekutsi imfuyo yetfu ngeyakho. Kute lesingabe sisakunika kona manje, ngaphandle kwemitimba yetfu nemasimi etfu.

¹⁹ Utasiyekela nje sibulawe yindlala embikwakho tsine nelive letfu? Sitsengisele kudla ngatsi nangemasimi etfu. Tsine nelive letfu sitawuba tigcili taFaro. Siphe kudla kuze siphunge indlala, singafi; usiphe nenhlanyelo sitewuhlanyela emasimini etfu.”

²⁰ Ngako-ke Josefa walitsenga lonkhe live laseGibhithe, ngobe onkhe emaGibhithe atsengisa ngawo onkhe emasimi awo, ngenca yekubhokelwa yindlala. Live lonkhe laba laFaro.

²¹ Bonkhe bantfu baba tigcili taFaro kusukela ngale kwelive kuze kubesekugcineni ngale kwelive laseGibhithe.

²² Live langalitsenganga kwaba lebaphristi kuphela; ngobe baphristi babephila ngesabelo sekudla lababesinikwa nguFaro. Ngako-ke abalitsengisanga live labo.

²³ Josefa wase ukhuluma kubantfu watsi: “Lalelani-ke, kusukela lamuhla nine nelive lenu senginitsengele Faro. Nansi-ke inhlanyelo yenu, hlanyelani emasimini.

²⁴ Nanivunako, incenye yesihlanu yesivuno nitawuyetfula kuFaro, bese kutsi tincenye letine esihlanwini tibe tenu netemindeni yenu.”

²⁵ Bamphendvula batsi: “Utisindzisile timphilo tetfu. Usiphetse ngesandla lesihle, nkhosi. Sitaba tigcili taFaro.”

²⁶ Ngako-ke Josefa wakwenta kwaba ngumtsetfo lomile welive laseGibhithe, kuze kube ngulamuhla, kutsi Faro anikwe incenye yesihlanu yesivuno. Live lebaphristi lodvwa lelasala langete ladliwa nguFaro.

Sicelo saJakobe sekugcina

²⁷ Ngako ema-Israyeli ahlala eGibhithe akha eveni laseGosheni; achuma, anotsa, andza kakhulu.

²⁸ Jakobe wahlala eveni laseGibhithe iminyaka leli-17. Iminyaka yekuphila kwaJakobe yaba li-147.

²⁹ Watsi nasatakufa, wabita indvodzana yakhe Josefa, watsi kuyo: “Nangemukeleka kuwe, beka sandla sakho ngaphansi kwelitsanga lami, wetsembise ngesifungo kimi kutsi ungeke ungingcwabe lapha eGibhithe.

³⁰ Ngifuna kungcwatjwa lapho kwangcwatjwa khona bobabe. Ubongetfwala, ungikhiphe eGibhithe ngiyekungcwatjwa lapho kwangcwatjwa khona bobabe.” Josefa wamphendvula watsi: “Ngiyawukwenta loko njengobe ushito.”

³¹ Jakobe wase utsi: “Funga kimi kutsi uyawukwenta loko.” Wafunga kuye. Israyeli wabonga akhotsama embhedzeni wakhe.