Genesisi 46 - Siswati 1996 Bible

Jakobe nemndeni wakhe uya eGibhithe

¹ Ngako Israyeli watsatsa konkhe labenako wahamba, waze wefika eBherisheba, lapho efike wanikela iminikelo kuNkulunkulu wa-Isaka, uyise.

² Nkulunkulu wakhuluma ku-Israyeli embonweni ebusuku, watsi: “Jakobe! Ye Jakobe!” Waphendvula watsi: “Ngilapha!”

³ Watsi: “NginguNkulunkulu, Nkulunkulu weyihlo. Ungesabi kwehlela eGibhithe, ngiyawukwenta ube sive lesikhulu khona.

⁴ Ngitawuba nawe ngehle ngiye eGibhithe, ngiyawuphindze ngenyuke nawe ngikubuyise futsi; Josefa cobo lwakhe nguye loyawuvala emehlo akho ekufeni kwakho ngetandla takhe.”

⁵ Jakobe wesuka eBherisheba; emadvodzana akhe agibelisa uyise, nebantfwabawo, nebafati bawo etincoleni lababetitfunyelelwe nguFaro kutsi titewubetfwala.

⁶ Bahamba netinkhomo tabo netimphahla tabo lababetitfole baseseveni laseKhenani. Labaya eGibhithe kwakunguJakobe nentalo yakhe yonkhe:

⁷ emadvodzana akhe, nemadvodzana awo, nemadvodzakati akhe, nemadvodzakati emadvodzana akhe; tonkhe titukulwane takhe wefika nato eGibhithe.

⁸ Nankha ema-Israyeli langena eGibhithe naJakobe: Rubeni bekulitubulo lakhe.

⁹ Emadvodzana aRubeni bekuboHanoki, naPhalu, naHesroni, naKhami.

¹⁰ Emadvodzana aSimeyoni bekuboJemuweli, naJamini, na-Ohade, naJakhini, naSohari, naShawule, indvodzana leyatalwa ngumfati labengumKhenani.

¹¹ Emadvodzana aLevi bekuboGeshoni, naKhohati, naMerari.

¹² Emadvodzana aJuda bekubo-Era, na-Onani, naShela, naPheresi, naZera; kodvwa Era na-Onani bafela eveni laseKhenani. Emadvodzana aPheresi bekubo-Hesroni naHamule.

¹³ Emadvodzana a-Isakhari bekuboThola, naPhuwa, naJashubi, naShimroni.

¹⁴ Emadvodzana aZebuloni bekuboSeredi, na-Eloni, naJaleli.

¹⁵ Lawa-ke ngemadvodzana aLeya, lawatalela Jakobe eMesophothamiya ngaphandle kwaDina. Asawonkhe emadvodzana nemadvodzakati aLeya abengema-33.

¹⁶ Emadvodzana aGadi bekuboSefoni, naHagi, naShuni, na-Esboni, na-Eri, na-Arodi, na-Areli.

¹⁷ Emadvodzana a-Asheri bekuboJimna, naJishuwa, naJishvi, naBheriya, naSera labengudzadzewabo. Emadvodzana aBheriya bekuboHebere naMalkhiyeli.

¹⁸ Lawa-ke kwakungemadvodzana aZilpha, Labani lamnika Leya, indvodzakati yakhe. Watalela Jakobe bantfu lababeli-16.

¹⁹ Emadvodzana aRakheli, umkaJakobe, bekuboJosefa naBhenjamini.

²⁰ Eveni laseGibhithe Josefa watalelwa boManase na-Efrayimu; lamtalela bona Asenathi, indvodzakati ya-Photifera, umphristi wase-Oni.

²¹ Emadvodzana aBhenjamini bekuboBela, naBekheri, na-Ashbeli, naGera, naNamani, na-Ehi, naRoshe, naMuphimi, naHuphimi, na-Adi.

²² Lawo-ke kwakungemadvodzana aRakheli lawatalela Jakobe; wamtalela bantfu lababeli-14.

²³ Indvodzana yaDani bekunguHushimu.

²⁴ Emadvodzana aNaftali bekuboJasiyeli, naGuni, naJeseri, naShilemi.

²⁵ Lawo-ke kwakungemadvodzana aBilha, Labani lamnika Rakheli, indvodzakati yakhe. Sebabonkhe kwakubantfu labasikhombisa.

²⁶ Sebabonkhe bantfu bekutalwa nguJakobe labaya eGibhithe babengema-66, ngaphandle kwabomalukatana bakakhe.

²⁷ Emadvodzana aJosefa latalelwa eGibhithe aba mabili; ngako-ke bantfu bemndeni wakaJakobe labehlela eGibhithe babengema-70 sebabonkhe.

Jakobe nemndeni wakhe eGibhithe

²⁸ Jakobe watfumela Juda embili kuJosefa kutsi atewubahlangabeta eGosheni. Bahamba baze befika eGosheni.

²⁹ Josefa wagibela incola yakhe waphikelela khona eGosheni, wayawuhlangabeta uyise Israyeli. Watsi achamuka nje, Josefa wambona uyise watigaca entsanyeni yakhe, wakhalela kuye sikhatsi lesidze.

³⁰ Israyeli watsi kuJosefa: “Cha, sengingafa-ke manje, ngobe sengibubonile buso bakho, futsi sengiyati kutsi usaphila.”

³¹ Josefa wakhuluma kubomnakabo kanye nemndeni wonkhe weyise, watsi: “Kufanele ngenyuke ngiye kuFaro ngimatise kutsi bomnaketfu nemndeni wababe labebaseKhenani, sebefikile, bete kimi.

³² Ngitawufike ngimtjele kutsi nine nibelusi betinkhomo, nifuyile, ngimtjele nekutsi nite nayo yonkhe imihlambi yenu, netimvu, netinkhomo, nako konkhe leninako.

³³ Nasanibita-ke Faro abuta atsi: ‘Yini umsebenti wenu?’

³⁴ nibomphendvula nitsi: ‘Tinceku takho tibelusi betinkhomo kusukela ebusheni bato kuze kube ngunyalo, tsine nabobabe betfu.’ Nanimlandzise kanjalo, utanivumela kutsi nakhe lapha eGosheni.” Phela Josefa abesho loku, ngobe emaGibhithe abewubukela phansi umsebenti wekwelusa.