Genesisi 45 - Siswati 1996 Bible

Josefa utjela bomnakabo kutsi ungubani

¹ Josefa wehluleka kutibamba embikwetisebenti takhe, ngako watsi: “Abakhishwe bonkhe la endlini.” Ngako-ke kwakungasekho muntfu ngesikhatsi atjela bomnakabo kutsi ungubani.

² Wakhala kakhulu, kwadzimate kweva nemaGibhithe, kanye nebendlu yakaFaro.

³ Josefa watjela bomnakabo watsi: “Phela mine nginguJosefa; babe usaphila yini?” Kodvwa bomnakabo abazange bakhone kumphendvula, ngobe babesetfuke kakhulu.

⁴ Josefa wakhuluma kubo watsi: “Ngicela, senisondzele la.” Nembala basondzela, watsi kubo: “NginguJosefa, umnakenu, lenamtsengisa eGibhithe.

⁵ Kodvwa ningakhatsateki futsi ningahlupheki ngekutsi nangitsengisa la. Empeleni nguNkulunkulu lowangitfumela kutsi ngite kulendzawo. Abentela kutsi nginendvulele ngekuta lapha ngitewusindzisa timphilo tebantfu.

⁶ Kusengumnyaka wesibili lona indlala ikhungetse umhlaba; kusasele leminye iminyaka lesihlanu kungalinywa kungavunwa.

⁷ Ngako nguNkulunkulu lowatsi anginendvulele ngekuta lapha, kuze anilondvolote nibe yinsali emhlabeni, nisindziswe kube kukhululwa lokukhulu.

⁸ “Ngako-ke, akusini lenangitfumela la, kodvwa nguNkulunkulu. Sewungente ngaba nguyise waFaro, nenkhosi yendlu yakhe, nembusi etikwelive lonkhe laseGibhithe.

⁹ “Sheshani nibuyele kubabe nifike nimtjele nitsi: ‘Josefa, indvodzana yakho, utsi: Nkulunkulu ungente ngaba yinkhosi eveni laseGibhithe lonkhe; shesha wehle ute kimi ungalibali.

¹⁰ Utawuhlala eveni laseGosheni, ubesedvute nami, wena nebantfwabakho, nebatukulu bakho, nemihlambi yakho yetimvu, neyetinkhomo, nako konkhe lonako.

¹¹ Ngitaninakekela kahle nanilapho, ngobe kusasele iminyaka lesihlanu yendlala. Angifuni kutsi wena nendlu yakho nako konkhe nife nibulawe yindlala.’ ”

¹² Josefa wachubeka watsi: “Manje, seniyabona-ke ngisho nawe, Bhenjamini, niyabona kutsi nginguJosefa.

¹³ Nibotjela babe kutsi sengaba mkhulu kanganani lapha eGibhithe, nimtekele nangako konkhe lenikubonile. Sheshani nilandze babe, ehle ete la.”

¹⁴ Wase ugaca imikhono entsanyeni yaBhenjamini wakhala; naBhenjamini wakhalela entsanyeni yaJosefa.

¹⁵ Bonkhe labomnakabo wabanga, akhala; emvakwaloko bonkhe labomnakabo base bakhuluma naye.

¹⁶ Kwatsi lendzaba nayibikwa kuFaro kutsi bomnakaboJosefa laba labefikile, Faro netiphatsimandla takhe bajabula kakhulu.

¹⁷ Faro wakhuluma kuJosefa watsi: “Tjela labomnakenu kutsi ababophele imitfwalo yabo etimbongolweni tabo bahambe baye eveni laseKhenani,

¹⁸ balandze uyihlo nemindeni yabo bete la kimi. Ngitabanika lokuhle kakhulu la eGibhithe bahlale benabe ngekutsandza kwabo.

¹⁹ Ubatjele batsatse tincola talapha eGibhithe, batekwetfwala ngato bantfwababo, nebafati babo, neyihlo, bete nabo.

²⁰ Bangahlupheki ngekushiya emagugu abo emuva, ngobe konkhe lokuhle kakhulu kwalapha eGibhithe kutawuba kwabo.”

²¹ Emadvodzana a-Israyeli enta njengobe abetjeliwe. Josefa wabanika tincola njengekuyala kwaFaro, wabanika nemiphako yendlela.

²² Kwaba ngulowo nalowo wamnika ingubo yekushintja; kodvwa Bhenjamini wamnika tinhlavu tesiliva letingemakhulu lamatsatfu netingubo letisihlanu tekushintja.

²³ Uyise wamtfumelela timbongolo letatilishumi letatitfwele tintfo letinhle taseGibhithe, netimbongolo letinsikati letatetfwele kudla, netinkhwa, nemiphako yeyise labetayidla nasehla eta eGibhithe.

²⁴ Wase uyabahambisa labomnakabo, batsi nase besuka wabayala watsi: “Ningabohambe nilwa endleleni.”

²⁵ Besuka-ke bahamba babuyela kuyise Jakobe eKhenani.

²⁶ Bafike bamtjela batsi: “Josefa usaphila! Ungumbusi etikwalo lonkhe live laseGibhithe.” Jakobe wamane waphela emandla nje, wacale wangete wabakholwa.

²⁷ Kodvwa kwatsi sebamtjele yonkhe inkhulumo yaJosefa layikhulume kubo, asabone netincola letatitfunyelwe nguJosefa kutsi titemetfwala, umoya waJakobe, uyise, wavuseleleka.

²⁸ Israyeli wakhuluma watsi: “Sengenelisekile kutsi Josefa, indvodzana yami, uyaphila. Angehle ngiyekumbona, ngingakafi.”