Genesisi 41 - Siswati 1996 Bible

Josefa uchaza emaphupho enkhosi

¹ Kwatsi sekuphele iminyaka lemibili legcwele, Faro wabhudza eme eceleni kwemfula iNayili.

² Wabona tinkhomati letisikhombisa letatibukeka kahle tikhuluphele tichamuka, tikhuphuka emfuleni, tefike tadla emhlangeni.

³ Kwatsi kusenjalo kwakhuphuka letinye futsi emfuleni, nato tisikhombisa; tona-ke tatibukeka kabi tondze tingimikhehlekhehle, tema elusentseni lwemfula eceleni kwaleti letinye.

⁴ Leti letondzile tesuka tadla leti letisikhombisa letikhuluphele. Faro wase uyaphaphama.

⁵ Waphindze wabuyela walala. Wabhudza lelinye futsi liphupho. Wabhudza abona tibhuluja letisikhombisa letatitikhulu tibhaceka eluhlangeni lunye.

⁶ Emvakwato, kwase kubhaceka tikhutu letisikhombisa kungatsi tihangulwe ngumoya wasemphumalanga.

⁷ Letikhutu tamita letibhuluja; Faro wase uyaphaphama, nalapho wakhandza kutsi abebhudza.

⁸ Ngakusasa ekuseni umphefumulo wakhe wakhatsateka kakhulu kangangekutsi wadzimate wabita tonkhe tangoma taseGibhithe kanye nabo bonkhe bosiyazi bakhona. Batsi kube befike, Faro wabalandzisa lamaphupho akhe, kodvwa kwabate ngisho namunye lowaba nemandla ekumchazela ngawo.

⁹ Lomphatsi lomkhulu wetitja taFaro wakhuluma kuFaro watsi: “Sengiyakhumbula tiphosiso tami lamuhla.

¹⁰ Ngesikhatsi inkhosi itfukutselele tisebenti tayo, yafaka mine nendvuna yebapheki betinkhwa ejele lelisendlini yendvuna yetingadzi.

¹¹ Ngabusuku bunye sobabili sabhudza, lelo nalelo phupho lalinenchazelo yalo.

¹² Sasinalomunye umHebheru labesemncane asisebenti sendvuna yabogadzi. Satsi nasimtjela lamaphupho etfu, wasinika inchazelo yalelo nalelo phupho.

¹³ Nangempela konkhe kwenteka njengobe abesitjelile: Mine ngabuyiselwa emsebentini wami, yena wajutjelwa intsambo.”

¹⁴ Ngako Faro watfumela kutsi kulandvwe Josefa; wakhishwa masinyane ejele. Watsi kube ahhule silevu, agcoke letinye timphahla, wase uletfwa kuFaro.

¹⁵ Faro wakhuluma kuJosefa watsi: “Ngibhudzile, kodvwa kute nome munye lonemandla ekungichazela ngaleliphupho. Kodvwa sengivile kutsi wena utsi ungalandziswa ngeliphupho, ulichaze njengobe linjalo.”

¹⁶ Josefa waphendvula watsi: “Akusimi, nkhosi, kodvwa nguNkulunkulu lotawunika Faro inchazelo lengiyo.”

¹⁷ Faro wase ulandzisa Josefa utsi: “Ngibhudze ngime elusentseni lwemfula iNayili,

¹⁸ kwase kuchamuka tinkhomati letisikhombisa, tibukeka kahle, tikhuluphele, tikhuphuka emfuleni, tadla emhlangeni.

¹⁹ Kutsite kusenjalo kwachamuka letinye letisikhombisa emvakwato, tona tatitimbi, tondze lengingazange sengikubone lapha kuleli laseGibhithe.

²⁰ Leti letondzile tesuka tadla leti tekucala betitinhle tikhuluphele.

²¹ Kodvwa kutsite nome setitidlile kwangete kwabonakala, ngobe betisolo tinjalo nje, tondze tingimikhehlekhehle. Ngase ngiyaphaphama.

²² Ngaphindze ngabhudza futsi: Ngabhudza ngibona tibhuluja letisikhombisa tibhaceka eluhlangeni lunye.

²³ Kutsite kusenjalo kwase kubhaceka tikhutu letimbi letibunile, kungatsi tihangulwe ngumoya wasemphumalanga.

²⁴ Letikhutu tesuka tamita letibhuluja letisikhombisa. Sengititjele tonkhe tangoma, kodvwa kute nasinye lesibe nemandla ekunginika inchazelo.”

²⁵ Josefa wakhuluma kuFaro watsi: “Omabili lamaphupho aFaro, asho intfo yinye. Nkulunkulu wembulele Faro ngaloko latakwenta.

²⁶ Tinkhomati letinhle letisikhombisa timele iminyaka lesikhombisa, kanjalo futsi naletibhuluja letisikhombisa timele iminyaka lesikhombisa; kokubili kuchaza intfo yinye.

²⁷ Tinkhomati letisikhombisa letimbi kantsi tondzile letalandzela, tona-ke timele iminyaka lesikhombisa, kanjalo futsi netikhutu letihangulwe ngumoya wasemphumalanga: Timele iminyaka lesikhombisa yendlala.

²⁸ Kunjengobe ngishito kuFaro, Nkulunkulu wembulele Faro ngaloko latakwenta.

²⁹ Kutawufika iminyaka lesikhombisa yenala lenkhulu eveni lonkhe laseGibhithe.

³⁰ Kodvwa emvakwayo kutawulandzela leminye iminyaka lesikhombisa yendlala lenkhulu, yonkhe inala iyawukhohlakala eGibhithe; indlala italigubudzela lonkhe live.

³¹ Inala ingeke iphindze ikhunjulwe eveni, ngenca yendlala letawulandzela, ngobe itawuba matima kakhulu.

³² Lokuphindzaphindzeka kwaleliphupho laFaro kuchaza kutsi loku kumiswe nguNkulunkulu, futsi Nkulunkulu utakwenta masinyane.

³³ “Ngako-ke Faro akakhetse indvodza lecaphelako, nalecotfo, ayibeke yengamele lonkhe live laseGibhithe.

³⁴ Akachubeke Faro abeke tindvuna kuyo yonkhe imimango yalelive. Letindvuna tibotsatsa incenye yesihlanu yesivuno kulo lonkhe laseGibhithe, ngaleminyaka yenala lenkhulu.

³⁵ Tibutse konkhe lokudla ngaleminyaka yenala lesikhombisa letako, konkhe tikwente ngeligama nangemandla aFaro, tikubutsele emadolobheni lokudla, bese tiyakulondvolota.

³⁶ Lokudla-ke kutawugcinelwa lelive kutsi kudliwe ngesikhatsi sendlala letakwembesa iGibhithe yonkhe, kuze live lingabhubhi ngenca yendlala.”

Josefa wentiwa ndvunankhulu waseGibhithe

³⁷ Lesiphakamiso semukeleka kuFaro nakuto tonkhe tindvuna takhe.

³⁸ Faro wakhuluma kuletindvuna takhe watsi: “Kodvwa singamtfolaphi umuntfu lofana nalona, lonaMoya waNkulunkulu?”

³⁹ Faro wase utsi kuJosefa: “Njengobe Nkulunkulu akukhombise konkhe loku, angiboni kutsi ukhona umuntfu locaphelako nalocotfo kwendlula wena.

⁴⁰ Ngako ngitakubeka wengamele live lami; bantfu bami batakwenta konkhe lokushoko. Mine ngitaba mkhulu kunawe ngesihlalo sebukhosi kuphela.”

⁴¹ Wachubeka Faro watsi: “Sengikubekile kutsi wengamele lonkhe live laseGibhithe.”

⁴² Faro wakhipha indandatho yakhe esandleni sakhe, wayifaka esandleni saJosefa; wamembatsisa ingubo yelineni lecolisakele, wamegabisa buhlalu begolide entsanyeni.

⁴³ Wamekhweta encoleni yakhe yesibili. Bogadzi bakhe bahamba embikwakhe, bamemeta batsi: “Khweshani! Khweshani!” Wambeka kanjalo-ke kutsi engamele lonkhe laseGibhithe.

⁴⁴ Ngetulu kwaloko Faro wakhuluma kuJosefa watsi: “NginguFaro; ngaphandle kwakho kute umuntfu lotawuphakamisa sandla sakhe nome lunyawo lwakhe lapha kuleli laseGibhithe.”

⁴⁵ Faro wetsa Josefa libito watsi nguSafenathi Phaneya; wamendzisela Asenathi, indvodzakati yaPhotifera, umphristi wase-Oni. Ngako-ke Josefa waphuma wahamba kulo lonkhe laseGibhithe.

⁴⁶ Josefa abesaneminyaka lengemashumi lamatsatfu nakacala kusebenta ngaphansi kwaFaro. Wesuka kuFaro walihamba lonkhe laseGibhithe.

⁴⁷ Kwatsi ngeminyaka lesikhombisa yenala, live laba nesivuno lesikhulu.

⁴⁸ Konkhe lokudla kweminyaka lesikhombisa yenala Josefa wakubutsela emadolobheni. Lelo nalelo dolobha eGibhithe kwaba yindzawo yekugcina kudla, nasekuvuniwe emasimini lasedvutane nalo.

⁴⁹ Josefa wasigcina sonkhe ngebunyenti baso lesivuno lesasingangetihlabatsi taselwandle, wadzimate wakuyekela nekusibala, ngobe sasingeke sisabaleka.

⁵⁰ Yatsi isengakefiki iminyaka yendlala, Josefa abesanemadvodzana lamabili labesawatalelwe ngu-Asenathi, indvodzakati yaPhotifera, umphristi wase-Oni.

⁵¹ Lona wekucala Josefa wametsa libito watsi nguManase, ngobe ngaloko abesho kutsi: “Nkulunkulu ungente ngakhohlwa konkhe kuhlupheka kwami nemndeni waketfu.”

⁵² Lona wesibili Josefa wametsa libito watsi ngu-Efrayimu, ngaloko abesho kutsi: “Nkulunkulu ungiphe bantfwana eveni lekuhlupheka kwami.”

⁵³ Yaphela-ke iminyaka lesikhombisa yenala eveni laseGibhithe,

⁵⁴ kwacala iminyaka yendlala, njengobe abeshito Josefa. Kwaba nendlala emaveni onkhe, kodvwa kulo lonkhe laseGibhithe kwakusekhona kudla.

⁵⁵ Yatsi kube indlala yembese lonkhe live, baseGibhithe bahamba bayawukhala kuFaro bamtjela kutsi sebabulawa yindlala. Faro wabaphendvula watsi: “Hambani niye kuJosefa, nente konkhe latanitjela kona.”

⁵⁶ Ngako-ke yatsi kube indlala yandze nalo lonkhe live, Josefa wativula tonkhe tingungu takhe watsengisela baseGibhithe kudla, ngobe indlala yase ilikhungetse lonkhe laseGibhithe.

⁵⁷ Ngetulu kwaloko, wonkhe umhlaba weta eGibhithe kutawutsenga kudla kuJosefa, ngobe lendlala yase ikhungetse wonkhe umhlaba.