Genesisi 4 - Siswati 1996 Bible

BoKhayini na-Abela

¹ Adamu wamati Eva, umkakhe; Eva wakhulelwa watala Khayini, watsi: “Ngitfole indvodzana ngekusitwa nguSimakadze.”

² Emvakwaloko watala Abela, umnakabo. Yena-ke Abela waba ngumelusi wetimvu, Khayini waba ngumlimi wemhlabatsi.

³ Ngekuhamba kwesikhatsi Khayini waletsa umnikelo wetitselo temhlabatsi kuSimakadze.

⁴ Na-Abela waletsa ematubulo etimvu takhe letikhuluphele. Simakadze wanaka Abela nemnikelo wakhe;

⁵ kepha Khayini nemnikelo wakhe akazange amnake. Ngako-ke Khayini watfukutsela kakhulu; buso bakhe banyukumala, bahlwa.

⁶ Simakadze watsi kuKhayini: “Utfukutseleleni? Buso bakho bunyukumaleleni?

⁷ Angitsi nawenta lokulungile, uyemukeleka? Nawungenti lokulungile, sono siyakucatsamela ngasemnyango. Sifuna wena, kodvwa wena kufanele usincobe.”

⁸ Khayini wase utsi ku-Abela, umnakabo: “Asambe, siye etsafeni.” Batsi kube befike etsafeni, Khayini wesukela umnakabo, wambulala.

⁹ Simakadze wabuta kuKhayini watsi: “Uphi umnakenu Abela?” Watsi: “Angimati. Ngingumlindzi wemnaketfu yini mine?”

¹⁰ Simakadze watsi kuye: “Wenteni? Livi lengati yemnakenu liyakhala kimi, lisemhlabatsini.

¹¹ Sewucalekisiwe emhlabatsini lekunguwona ukhamise umlomo wawo wemukela ingati yemnakenu esandleni sakho.

¹² Nawulima umhlabatsi, ngeke usakunika sivuno sawo lesihle; wena sewuyawuba ngumhambuma neluzulane emhlabeni.”

¹³ Khayini watsi kuSimakadze: “Sijeziso sami singetulu kwemandla ami.

¹⁴ Asubuke, sewuyangicosha lamuhla la emhlabatsini, ngisuke nasebukhoneni bakho, ngibe ngumhambuma neluzulane emhlabeni; kantsi futsi wonkhe lohlangana nami uyawungibulala.”

¹⁵ Kodvwa Simakadze watsi: “Cha, akunjalo! Lowo lobulala Khayini kuyawuphindziselwa kuye kuze kube kasikhombisa.” Simakadze wabeka Khayini luphawu, khona kutewuba secwayiso sekutsi lowo lohlangana naye angambulali.

¹⁶ Khayini wase uyesuka ebukhoneni baSimakadze wayawuhlala eveni laseNodi, ngasemphumalanga yase-Edeni.

Titukulwane takaKhayini

¹⁷ Khayini wamati umkakhe, lowakhulelwa, watala Enoki. Khayini wase wakha lidolobha laletsa ngemsa wakhe, watsi yi-Enoki.

¹⁸ Enoki watala Iradi; Iradi waba nguyise waMehujayeli; Mehujayeli waba nguyise waMethushayeli; Methushayeli waba nguyise waLameki.

¹⁹ Lameki watsatsa bafati lababili; libito lalomunye kwakungu-Ada, lomunye-ke anguSila.

²⁰ Ada watala Jabale; yena waba nguyise walabo bebahlala emathendeni, bafuye tinkhomo.

²¹ Libito lemnakabo kwakunguJubale; yena-ke waba nguyise wabo bonkhe lababedlala lugitali nemntjingozi.

²² Sila watala Thubali Khayini; yena-ke waba nguyise wabo bonkhe labakha emathulusi ngelitfusi nensimbi. DzadzewaboThubali Khayini kwakunguNama.

²³ Lameki wase utsi kubafati bakhe: “Ada naSila, lalelani livi lami; nine bafati baLameki, lalelani lengitakusho: Indvodza nayingilimata, ngitayibulala; lijaha nalingilimata, ngitalibulala.

²⁴ Nangabe Khayini ayawuphindziselelwa emahlandla lasikhombisa, Lameki uyawuphindziselelwa kuze kube ngemahlandla langema-77.”

Sethi na-Enoshi

²⁵ Adamu waphindze wamati umkakhe, watala indvodzana, wayetsa libito watsi nguSethi, ngobe abetsi: “Nkulunkulu sewungiphe lomunye umntfwana esikhundleni sa-Abela lowabulawa nguKhayini.”

²⁶ NaSethi watala indvodzana layetsa libito watsi ngu-Enoshi; ngaleso sikhatsi bantfu bacala kukhuleka kuSimakadze.