Genesisi 39 - Siswati 1996 Bible

Josefa nemfati waPhotifari

¹ Ema-Ishmayeli ehla naye Josefa aya eGibhithe, efike amtsengisa kuPhotifari, siphatsimandla saFaro lesasiyindvuna yetingadzi tesigodlo.

² Simakadze waba naJosefa wamphumelelisa kuko konkhe. Josefa abehlala kalomnumzane waseGibhithe.

³ Nalomnumzane wabona kutsi Simakadze abenaJosefa nekutsi Simakadze abekwenta kuchume konkhe lokuke kwaphatfwa tandla taJosefa.

⁴ Ngako-ke Josefa wazuza umusa kuPhotifari; wambeka kutsi abe yindvuna yakhe leyengamele likhaya lakhe nayo yonkhe imphahla yakhe.

⁵ Kusukela ngalelo langa labekwa ngalo kwengamela likhaya laPhotifari netimphahla takhe, Simakadze walibusisa lelikhaya lalomGibhithe ngenca yaJosefa. Sibusiso saSimakadze sasisetikwako konkhe Photifari labenako ekhaya nasemasimini.

⁶ Ngako-ke Photifari wakuyekelela etandleni taJosefa. Abengasahlupheki ngalutfo ngaphandle kwekudla labekudla. Josefa abemuhle, alikhwa.

⁷ Ngekuhamba kwesikhatsi umkaPhotifari wafisa Josefa, waze waphahluka watsi kuye: “Lala nami.”

⁸ Kodvwa Josefa wala, watsi: “Lalela la, inkhosi yami kute lesahlupheka ngako lapha ekhaya, ngobe konkhe ikubeke esandleni sami.

⁹ Inkhosi ingilinganise nayo kulelikhaya, futsi kute lengigodlele kona ngaphandle kwakho, ngobe ungumkayo. Pho, ngingabenta kanjani lobubi lobungaka, ngone kuNkulunkulu?”

¹⁰ Kwala nome lomfati ambekele siye amcela onkhe emalanga, kodvwa akazange avume Josefa kulala naye, ngisho nekutsi ahlale naye imbala.

¹¹ Kodvwa kwatsi ngalelinye lilanga Josefa asesendlini enta umsebenti wakhe, netisebenti tasendlini tingekho,

¹² lomfati wadvumela Josefa wambamba ngengubo yakhe, watsi: “Lala nami!” Kodvwa Josefa wanyomula lengubo wabaleka wamshiya nayo, waphuma kulendlu.

¹³ Watsi kube abone lomfati kutsi Josefa sewuphunyulile, wamshiya nalengubo wabaleka waphuma,

¹⁴ wamemeta lamadvodza lasebenta kulendlu watsi kuwo: “Ase nibheke! LomHebheru uletselwe kudlala ngatsi la. Ungingenele ekamelweni wangibamba afuna kulala nami. Ngesuka mine ngahlaba inyandzaleyo.

¹⁵ Utsite kube eve kutsi ngihlaba umkhosi, wabaleka washiya nayi ingubo yakhe, waphuma la endlini.”

¹⁶ Lengubo wayigcina lomfati, kwaze kwefika indvodza yakhe.

¹⁷ Yatsi kube ifike indvodza yakhe, wayitjela leyo ndzaba ngalokufananako, watsi: “Lesigcili semHebheru, losiletse la, emkhatsini wetfu, singene seta kimi satawudlala ngami.

¹⁸ Kodvwa ngitsite kube ngihlabe inyandzaleyo, sabaleka sashiya nayi ingubo yaso, saphuma la endlini.”

¹⁹ Lomfati wagcina ngekutsi: “Singiphatse kanjena-ke lesigcili sakho.” Lendvuna yatfukutselela Josefa kamatima.

²⁰ Yamtsatsa yamfaka ejele, lapho efike wahlala khona kanye netiboshwa tenkhosi, Faro. Ngesikhatsi Josefa asesejele,

²¹ Simakadze wajinge waba naye, wamentela umusa, wamupha kutsandzeka emehlweni emgcinijele.

²² Umgcinijele wabeka tonkhe tiboshwa ngaphansi kwesandla saJosefa; yonkhe imisebenti leyayentiwa ejele yabekwa ngaphansi kwesandla saJosefa.

²³ Umgcinijele akazange aphindze ahlupheke ngaloko lokwakungaphansi kwesandla saJosefa, ngobe Simakadze abenaye, futsi konkhe labekwenta Josefa Simakadze abekuphumelelisa.