Genesisi 36 - Siswati 1996 Bible

Titukulwane taka-Esawu

¹ Nati-ke titukulwane taka-Esawu lobitwa ngekutsi ngu-Edomu.

² Esawu watsatsa bafati etintfombini temaKhenani: Ada, indvodzakati ya-Eloni, umHethi, na-Oholibama, indvodzakati ya-Ana, umsa waSibeyoni, umHivi,

³ naBhasemathi, indvodzakati ya-Ishmayeli, dzadzewabo Nebayothi.

⁴ Ada watalela Esawu Elifazi, Bhasemathi watala Rehuweli.

⁵ Oholibama watala Jewushe, naJalamu, naKhora. Ngiwo lawa-ke emadvodzana a-Esawu lawatalelwa aseseveni laseKhenani.

⁶ Esawu wesuka lapho watsatsa bafati bakhe, nemadvodzana, nemadvodzakati akhe, nabo bonkhe bendlu yakhe, netinkhomo takhe tonkhe, nayo yonkhe imfuyo yakhe, nayo yonkhe imphahla yakhe labeyitfole aseseKhenani; wesuka kumnakaboJakobe, waya kulelinye live.

⁷ Sizatfu lesamenta ehlukane nemnakabo kutsi bobabili bese banetimphahla letinyenti kakhulu. Live labebahlala kulo lalingabe lisabenela bobabili.

⁸ Ngako-ke Esawu, labekatiwa ngekutsi ngu-Edomu, wahlala eveni letintsaba eSeyiri.

⁹ Nati-ke titukulwane taka-Esawu, uyise wema-Edomu, esifundzeni saseSeyiri.

¹⁰ Emadvodzana a-Esawu bekubo-Elifazi lamtala ku-Ada, umkakhe, naRehuweli, umsa waBhasemathi, umka-Esawu.

¹¹ Emadvodzana a-Elifazi bekubo-Themani, na-Omari, naSefo, naGatamu, naKhenazi.

¹² Umsa wa-Esawu, Elifazi, abenemfati lomunye lomncane, lekwakutsiwa nguThimna. Yena-ke wamtalela indvodzana lekwakutsiwa ngu-Amaleki. Ngulawo-ke emadvodzana a-Ada, umka-Esawu.

¹³ Emadvodzana a-Rehuweli bekuboNahathi, naZera, naShama, naMiza. Ngulabo-ke batukulu baBhasemathi, umka-Esawu.

¹⁴ Oholibama, umka-Esawu, labeyindvodzakati ya-Ana, aphindze abe ngumtukulu waSibeyoni, watalela Esawu nankha emadvodzana: boJewushe, naJalamu, naKhora.

¹⁵ Nati-ke tive letadzabuka ku-Esawu. Emadvodzana a-Elifazi, litubulo la-Esawu, bekutikhulu bo-Themani, na-Omari, saSefo, naKhenazi,

¹⁶ naKhora, naGatamu, na-Amaleki. Ngito-ke tikhulu letadzabuka ku-Elifazi, eveni lase-Edomu. Ngulawo-ke emadvodzana a-Ada.

¹⁷ Emadvodzana aRehuweli, umsa wa-Esawu, labetikhulu bekubo-Nahathi, naSera, naShama, naMiza. Ngito leto-ke tikhulu letadzabuka kuRehuweli eveni lase-Edomu. Ngulawo lamanye emadvodzana aBhasemathi, umka-Esawu.

¹⁸ Emadvodzana a-Oholibama, umka-Esawu, bekutikhulu boJewushe, naJalamu, naKhora. Ngito leto-ke tikhulu letatalwa ngu-Oholibama, indvodzakati ya-Ana, umka-Esawu.

¹⁹ Ngulawo-ke emadvodzana netikhulu ta-Esawu; Esawu bekungu-Edomu.

Titukulwane takaSeyiri

²⁰ Emadvodzana aSeyiri, umHori, takhamiti temdzabu kulelo live, bekuboLotani, naShobali, naSibeyoni, na-Ana,

²¹ na-Dishoni, na-Eseri, naDishani. Ngito leto-ke tikhulu temaHori letatingemadvodzana aSeyiri, kulaka-Edomu.

²² Emadvodzana aLotani bekuboHori naHemami. Thimna bekungudzadzewaboLotani.

²³ Emadvodzana aShobali bekubo-Alvani, naManahati, na-Ebali, naShefo, na-Onamu.

²⁴ Sibeyoni abenemadvodzana lamabili bo-Aya, na-Ana. Ngulo-Ana lowatsi eluse timbongolo teyise, Sibeyoni, watfola manzana ehlane.

²⁵ Bantfwana ba-Ana bekuboDishoni, na-Oholibama labeyindvodzakati.

²⁶ Emadvodzana aDishoni bekubo-Hemdani, na-Eshbani, naJithrani, naKherani.

²⁷ Emadvodzana a-Eseri bekuboBilhani, naZavani, na-Akhani.

²⁸ Emadvodzana aDishani bekubo-Use na-Arani.

²⁹ Tikhulu temaHori bekuboLotani, naShobali, naSibeyoni, na-Ana,

³⁰ naDishoni, na-Eseri, naDishani. Leti-ke kwakutikhulu temaHori eveni laka-Edomu.

Emakhosi aka-Edomu

³¹ Lawa ngemabito emakhosi labebusa eveni laka-Edomu kusengakabusi inkhosi ka-Israyeli:

³² Bela, umsa waBheyori, waba yinkhosi ka-Edomu; inhlokodolobha yakhe bekuyiDinihabha.

³³ Kwatsi kube kufe Bela, kwase kubekwa Jobabi, umsa waZera. Inhlokodolobha yakhe bekuyiBhosra.

³⁴ Kwatsi kube kufe Jobabi, kwase kubekwa Hushamu welive lemaThemani.

³⁵ Kwatsi kube kufe Hushamu, kwase kubekwa Hadadi, umsa waBedadi. Bedadi ngulona lowancoba emaMidiyani eveni lakaMowabi. Inhlokodolobha yakhe bekuyi-Avithi.

³⁶ Kwatsi kube kufe Hadadi, kwase kubekwa Samla waseMasreka.

³⁷ Kwatsi kube kufe Samla, kwase kubekwa Shawula waseRehobothi ngasemfuleni.

³⁸ Kwatsi kube kufe Shawula, kwase kubekwa Bhali Hanani, umsa wa-Akbori.

³⁹ Kwatsi kube kufe Bhali Hanani, kwase kubekwa Hadadi. Inhlokodolobha yakhe bekutsiwa yiPhawu, kantsi umkakhe bekunguMehethabeli, indvodzakati yaMatredi, indvodzakati yaMe Zahabe.

⁴⁰ Emabito etikhulu letatidzabuka ku-Esawu, imindeni yato netindzawo tato bekuboThimna, na-Alva, naJethethi,

⁴¹ na-Oholibama, na-Ela, naPhinoni,

⁴² naKhenazi, naThemani, naMibsari,

⁴³ naMagdiyeli, na-Iramu. Ngito leti-ke tikhulu taka-Edomu netindzawo lapho tatihlala khona, eveni lelalilifa lato. Esawu abenguyise wema-Edomu.