Genesisi 35 - Siswati 1996 Bible

Nkulunkulu ubusisa Jakobe eBetheli

¹ Nkulunkulu wakhuluma kuJakobe watsi: “Suka lapha, ukhuphuke uye eBetheli uyewuhlala khona; ungakhele lilati lapho mine Nkulunkulu ngabonakala kuwe ngesikhatsi ubalekela Esawu, umnakenu.”

² Ngako-ke Jakobe wakhuluma emndenini wakhe nakubo bonkhe lababekakhe, watsi: “Lahlani tonkhe tithico tebetive leninato, nitihlambulule, nembatse tingubo letihlobile.

³ Sitawusuka la siye eBetheli, lapho ngitawufika ngakhe khona lilati laNkulunkulu, lowangiva wangiphendvula ngesikhatsi sekuhlupheka kwami, nalowaba nami yonkhe indzawo lapho ngangihamba khona.”

⁴ Ngako-ke base batinika Jakobe tithico tebetive lababenato kanye nemacici lababewafake etindlebeni tabo. Jakobe wakumbela ngaphansi kwesihlahla se-okhi edvute neShekemu.

⁵ Ngako-ke base bayesuka boJakobe nemadvodzana akhe. Bantfu balamadolobha abesedvutane behlelwa kwesaba lokukhulu lobekuvela kuNkulunkulu, abazange babacoshe ngemuva.

⁶ Jakobe nabo bonkhe bantfu labehamba nabo wefika eLuzi, leseyatiwa ngekutsi yiBetheli eveni laseKhenani.

⁷ Wafike wakha lilati lapho. Lendzawo wayetsa libito watsi yi-Eli Betheli ngobe ngukhona lapho Nkulunkulu atibonakalisa kuye ngesikhatsi abalekela umnakabo.

⁸ Debhora, sisebenti saRebheka, wafa wangcwatjwa ngaphansi kwesihlahla se-okhi eningizimu neBetheli, ngako-ke Jakobe lendzawo wayetsa libito watsi yi-Aloni Bhakhuthi.

⁹ Waphindze futsi Nkulunkulu watibonakalisa kuJakobe ngesikhatsi asabuyile eMesophothamiya, wambusisa.

¹⁰ Nkulunkulu watsi kuJakobe: “Libito lakho nguJakobe, kodvwa kusukela nyalo sewutawubitwa ngekutsi ungu-Israyeli.” Ngako-ke Nkulunkulu wametsa ngekutsi ngu-Israyeli.

¹¹ Nkulunkulu wachubeka watsi kuye: “NginguNkulunkulu, Somandla. Tala, wandze ube sive. Tive letinyenti titawuphuma kuwe, ube ngukhokho wemakhosi.

¹² Ngikunika lelive, lona leli lengalinika bo-Abrahama na-Isaka ngiyawuphindze ngilinike titukulwane takho nasufile wena.”

¹³ Nkulunkulu wase uyesuka kuleyo ndzawo bekakhulumela kuyo, wamshiya wenyuka.

¹⁴ Kwase kutsi lapho akhuluma khona naNkulunkulu Jakobe wemisa litje lesikhumbuto, walitsela ngeliwayini nangemafutsa.

¹⁵ Jakobe wayetsa lendzawo Nkulunkulu abebonakale kuye khona watsi yiBetheli.

Kufa kwaRakheli

¹⁶ Jakobe nemuti wakhe batfutsa eBetheli, batsi basesekhashane ne-Efratha, Rakheli wafikelwa sikhatsi sekubeleka; wahelwa kamatima.

¹⁷ Kodvwa asahelwa kamatima umbelekisi wamdvudvuta watsi: “Ungesabi, Rakheli, sewutfole lenye indvodzana.”

¹⁸ Kwatsi nasafa wetsa loluswane lwakhe watsi nguBhenoni, kodvwa uyise wametsa libito watsi nguBhenjamini.

¹⁹ Rakheli wafa wangcwatjwa eceleni kwemgwaco loya e-Efratha, lendzawo leseyatiwa ngekutsi yiBhetlehema.

²⁰ Jakobe wemisa litje lesikhumbuto kuleyo ndzawo, kuze kube ngulamuhla seloku lisakhombisa lelitje lapho kunelithuna laRakheli khona.

²¹ Israyeli wesuka lapho wemisa lithende lakhe ngesheya kweMigdala Ederi.

Emadvodzana aJakobe

²² Israyeli asahleti kuleyo ndzawo, Rubeni walala nenina lomncane, Bhilha, lomunye webafati beyise. Israyeli wakuva loko. Asawonkhe emadvodzana aJakobe abelishumi namabili.

²³ Emadvodzana aLeya bekuboRubeni, litubulo laJakobe, bese kuba nguSimeyoni, naLevi, naJuda, na-Isakhari, naZebuloni.

²⁴ Emadvodzana aRakheli bekuboJosefa naBhenjamini.

²⁵ Emadvodzana aBhilha, sisebenti saRakheli, bekuboDani naNaftali.

²⁶ Emadvodzana aZilpha, sisebenti saLeya, bekuboGadi na-Asheri. Ngiwo lawa-ke emadvodzana aJakobe lawatalelwa eMesophothamiya.

Kufa kwa-Isaka

²⁷ Jakobe wahamba waze wefika ekhaya leyise, Isaka, eMamre ngaseKhiriyathi Abha leseyatiwa ngekutsi iHebroni, lapho kwakuhlala khona Abrahama na-Isaka.

²⁸ Isaka wafa asaneminyaka leli-180.

²⁹ Wafa asamdzala kakhulu, walandzela bokhokho bakhe. Wangcwatjwa bo-Esawu naJakobe, emadvodzana akhe.