Genesisi 34 - Siswati 1996 Bible

Kudlwengulwa kwaDina

¹ Ngalelinye lilanga, Dina, indvodzakati yaJakobe layitala kuLeya, wavakashela lamanye emantfombatana akuleyo ndzawo labengemaKhenani.

² Shekhemu, umsa waHamori umHivi, labesikhulu saleyo ndzawo, watsi nakambona, wamtsatsa wayakumdlwengula, wamhlazisa.

³ Inhlitiyo yakhe yanamatsela kuDina, wayitsandza lentfombatana, ngako wayisoma.

⁴ Shekhemu wakhuluma kuyise, Hamori, watsi: “Ngicela ungitsatsele lentfombi, ngifuna kuyiteka ibe ngumkami.”

⁵ Jakobe weva kutsi Shekhemu ungcolise indvodzakati yakhe; kodvwa akazange akhulume lutfo, kwaze kwabuya emadvodzana akhe labengekho asekweluseni.

⁶ Hamori, uyise waShekhemu, wahamba wayawukhuluma naJakobe.

⁷ Atsi emadvodzana aJakobe nakefika eva ngaloku, eva buhlungu atfukutsela agcwala kokana, ngobe Shekhemu abente sento lesibi lesiphambene nesive saka-Israyeli ngekudlwengula lendvodzakati yaJakobe. Leyo kwakuyintfo lengentiwa nje vele ka-Israyeli.

⁸ Hamori wefika kuJakobe watsi: “Shekhemu, indvodzana yami, utsandze intfombi yakakho. Ngiyakucela kutsi umane umnike yona ayiteke ibe ngumkakhe.

⁹ Yendziselanani natsi: nisendzisele tintfombi tenu nani nititsatsele bafati etintfombini tetfu.

¹⁰ Ningakha kulelive letfu nihlale kanye natsi, ningahlala nome ngukuphi lapho nitsandza khona, ningasebenta ngekukhululeka nome kukuphi, nome nitisikele yenu indzawo.”

¹¹ Shekhemu wakhuluma kuyise waDina kanye nebanakabo watsi: “Ngicela nimane ningihawukele, ngitaninika nome ngabe yini leniyifunako.

¹² Ningabita lapho nitsandza khona ngelilobolo kanye nesipho, ngitakukhipha, kuphela nje naningivumele kutsi ngiteke lentfombi.”

¹³ Njengobe Shekhemu abesangcolise Dina, dzadzewabo lamadvodzana aJakobe, wona aphendvula boShekhemu neyise Hamori ngebucili,

¹⁴ atsi: “Ngeke sesikwente-ke loko! Dzadzewetfu singeke simnike indvodza lengakasoki, ngobe phela loko kulihlazo lapha kitsi.

¹⁵ Singavuma kuphela, nangabe nani ningalingisa tsine, nisoke bonkhe labadvuna benu.

¹⁶ Nase nente njalo-ke, singendziselana nani, sihlale emkhatsini wenu, sibe sive sinye nani.

¹⁷ Kodvwa nangabe asivumelani kuloko, sitamtsatsa lodzadzewetfu sihambe naye, sisuke kulendzawo.”

¹⁸ Lesiphakamiso semukeleka kuboHamori nemsa wakhe Shekhemu.

¹⁹ Lelijaha lelibaluleke kakhulu ekhaya kubo alicitsanga sikhatsi, lavele lasokwa ngekushesha, ngobe beliyitsandza kakhulu lendvodzakati yaJakobe.

²⁰ Ngako-ke Hamoni nemsa wakhe Shekhemu bancandzeka baya enkhundleni yakubo esangweni lelidolobha, bafike bamemetela kutakhamiti tabo batsi:

²¹ “Labantfu balungile, asibavumele kutsi bakhe bahlale ngekukhululeka kulelive letfu. Lelive lingasenela tsine nabo. Singawateka emadvodzakati abo, nabo bateke emadvodzakati etfu.

²² Kodvwa lamadvodza ayavuma kutsi angahlala natsi sibe sive sinye nabo kuphela nasingenta naku: kutsi sisoke bonkhe labadvuna betfu sibe njengawo.

²³ Kepha nitsi tifuyo tawo kanye nako konkhe kwawo kungeke yini kube kwetfu? Ngako-ke asivume, kuze atekwakha emkhatsini wetfu.”

²⁴ Tonkhe takhamiti telidolobha tasemukela siphakamiso saHamori naShekhemu. Ngako-ke bonkhe labadvuna basokwa.

²⁵ Kwatsi ngelilanga lesitsatfu basokile, basesebuhlungwini, emadvodzana lamabili aJakobe, lekwakubomnakaboDina, boSimeyoni naLevi, batsatsa tinkemba tabo. Banyenya, bangenela lelidolobha, bafike babulala bonkhe labadvuna.

²⁶ Bahlahlela Hamori naShekhemu, indvodzana yakhe, ngenkemba. Batsatsa Dina, dzadzewabo, endlini kaShekhemu bahamba naye.

²⁷ Emvakwekubulawa kwalabantfu, lamanye emadvodzana aJakobe eta kulelidolobha afike akhipha sibhongo sekungcoliswa kwadzadzewabo baze baphanga lelidolobha.

²⁸ Batsatsa imihlambi yetimvu, netimbuti, netinkhomo, netimbongolo, nako konkhe lokwakungekhatsi nangaphandle kwelidolobha, nasemaphandleni.

²⁹ Bahamba nato tonkhe timphahla, batfumba bonkhe labasikati nebantfwana, batsatsa konkhe lokwakusetindlini.

³⁰ Jakobe wakhuluma kuboSimeyoni naLevi watsi: “Manje seningiletsele luhlupho, seningibangele kutsi ngitondzeke lapha kulabantfu bakulendzawo, kumaKhenani nakumaPheresi. Mine nginemadvodza lambalwa, ngako nabangahlangana bangihlasele bonkhe kanyekanye, bangangibhubhisa kanye nemndeni wami.”

³¹ Kodvwa bamphendvula batsi: “Besingeke sivume kutsi dzadzewetfu entiwe ingwadla.”