Genesisi 31 - Siswati 1996 Bible

Jakobe ubaleka kaLabani

¹ Jakobe weva emadvodzana aLabani akhuluma atsi: “Jakobe sewutsetse konkhe lobekukwababe. Sewunjinge ngaletimphahla tababe.”

² Jakobe wabona kutsi buso baLabani babungasamjabuleli njengakucala.

³ Simakadze wakhuluma kuJakobe watsi: “Hamba ubuyele eveni lakini, lapho watalelwa khona, ngitawuba nawe.”

⁴ Ngako-ke Jakobe wabita boRakheli naLeya kutsi bete kuye emadlelweni, lapho abelusele khona imfuyo yakhe.

⁵ Wafike wakhuluma kubo watsi: “Sengibonile kutsi buso beyihlo abusangijabuleli njengakucala, kodvwa Nkulunkulu wababe abenami.

⁶ Nani niyati kutsi uyihlo ngimsebentele ngawo onkhe emandla ami.

⁷ Kodvwa uyihlo sewungiphambile ngekutsi agucule liholo lami ngalokuphindvwe kalishumi, noko Nkulunkulu akamvumeli kutsi ente lokubi kimi.

⁸ Utsite nakatsi: ‘Liholo lakho kutawuba nguletimacabhacabha todvwa,’ umhlambi wonkhe wesuka watala letimacabhacabha. Nome asatsite: ‘Liholo lakho kutawuba nguletinemishi,’ umhlambi wonkhe wesuka watala letinemishi todvwa.

⁹ Nkulunkulu uyitsatse kanjalo-ke imfuyo yeyihlo wayinika mine.

¹⁰ “Kwatsi ngesikhatsi tekhwelwa letimbuti ngabhudza, ngatsi ngiyabuka ngabona letiphongo letekhwela letimbutikati kutsi tatinemishi, timacabhacabha, naletimabalabala.

¹¹ Ingilosi yaNkulunkulu yangibita ephusheni yatsi: ‘Jakobe!’ Ngasabela ngatsi: ‘Ngilapha.’

¹² Yakhuluma kimi yatsi: ‘Buka la, tonkhe letiphongo letekhwela letimbutikati tinemishi, timacabhacabha, timabalabala; ngobe sengikubone konkhe lokwentiwa nguLabani kuwe.

¹³ NginguNkulunkulu waseBetheli, lapho wagcoba khona litje ngemafutsa, walenta sikhumbuto, wafunga kimi. Sukuma-ke manje, utfutse kulelive, ubuyele eveni lakini, lapho kunenkhaba yakho khona.’ ”

¹⁴ BoRakheli naLeya baphendvula batsi: “Pho, sisenaso yini sabelo nome lifa lekungeletfu endlini yababe?

¹⁵ Kambe asisesibo bafokati yini? Ngobe sewatsengisa ngatsi, nemali layitfola ngatsi sewayidla wayicedza.

¹⁶ Yonkhe ingcebo letsetfwe nguNkulunkulu kubabe ngeyetfu nebantfwabetfu. Ngako-ke, yenta loko Nkulunkulu lakukhulume kuwe.”

¹⁷ Jakobe wesuka lapho wagibelisa bantfwabakhe nebafati bakhe emakameleni,

¹⁸ wayichuba yonkhe imfuyo yakhe kanye nako konkhe kwakhe labekuholile eMesophothamiya, wancandzeka wabuyela kuyise, Isaka, eveni laseKhenani.

¹⁹ Labani abengekho ayewuhhula timvu takhe, Rakheli weba tithico takabo.

²⁰ Jakobe wamnyenyela Labani, umSiriya, ngobe akazange amtjele kutsi utawuhamba.

²¹ Wabaleka nako konkhe labenako, wewela umfula iYufrathe, emabombo awabhekise ngasetintsabeni takaGileyadi.

Labani ucosha Jakobe

²² Watsi kube Labani atjelwe ngelilanga lesitsatfu kutsi Jakobe akasekho ubalekile,

²³ watsatsa bomnakabo wamlandzela amcosha ngemuva, kwadzimate kwaphela emalanga lasikhombisa, waze wamkhandza etintsabeni takaGileyadi.

²⁴ Kodvwa Nkulunkulu weta wakhuluma ngeliphupho kuLabani, umSiriya, watsi: “Ucaphele ungakhulumi lokuhle nome lokubi kuJakobe.”

²⁵ Labani wamkhandza Jakobe. Jakobe abemise lithende lakhe kuleto tintsaba takaGileyadi, naLabani kanye nabomnakabo naye wakanekisa kuto leto tintsaba.

²⁶ Labani wafike wakhuluma kuJakobe, watsi: “Seyini-ke lena lose uyentile, unginyenyeleleni ngekuhamba nemadvodzakati ami kungatsi bafati lobatfumbe emphini?

²⁷ Uhambeleni ngekunyenya? Awukangitjeli ngani, khona phela ngitekukhipa ngekujabula, nangekuhlabela, nangelugubhu, nangelihabhu?

²⁸ Awukangivumeli ngani kutsi ngivalelise emadvodzana nemadvodzakati ami ngekuwanga? Ibulima-ke lentfo loyentile.

²⁹ Nginawo emandla ekukulimata; kodvwa Nkulunkulu weyihlo ukhulume kimi itolo ebusuku ephusheni watsi: ‘Ucaphele, ungakhulumi lokuhle nome lokubi kuJakobe.’

³⁰ Nyalo-ke njengobe sewuhamba ukhumbule bakini, utebeleni letithico tami?”

³¹ Jakobe waphendvula Labani, watsi: “Kungobe ngesabile kutsi ungahle ungemuke lamadvodzakati akho.

³² Kodvwa lowo loyawukhandza tithico takho kuye akafe nekufa. Phenya la emkhatsini wetfu ukhombe lokukwakho lokukimi ukutsatse bonkhe bantfu babuka.” Phela Jakobe abengati kutsi letithico tatebiwe nguRakheli.

³³ Ngako-ke Labani waya ethendeni laJakobe, nelaLeya, nasethendeni letisebenti letisikati letimbili; kodvwa akatitfolanga tithico. Waphuma ethendeni laLeya waya ethendeni laRakheli.

³⁴ Rakheli bekatsetse letithico watifihla ngaphansi kwesihlalo selikamela, wahlala etikwato. Labani, watiphumphutsa lonkhe lithende laRakheli, wangete watitfola.

³⁵ Rakheli watsi kuyise: “Shangatsi inkhosi yami ingete yangitfukutselela ngekutsi ngingeke ngiphakame embikwayo, ngobe ngisesikhatsini.” Labani waphenya, wanyakulula, kodvwa akazange atitfole letithico.

³⁶ Jakobe watfukutsela wagcwala kokana, watsetsisa Labani watsi: “Siphi-ke siphambuko sami? Sono sami siphi, kutsi bewungaze ungitfungatse kangaka?

³⁷ Njengobe sewuphenye watinyakulula kangaka letimphahla tami, tiphi-ke temndeni wakho? Tibeke la embikwabo bonkhe labantfu babuka kutsi kube ngibo lababehluleli emkhatsini wakho nami.

³⁸ Ngicedze iminyaka lengema-20 ngihleti nawe. Timvu takho netimbuti takho atizange setiphunte, angizange sengidle kwasasihhanca sakho.

³⁹ Ngisho naleti letatidliwe tilwane tesiganga ngangingatiletsi kuwe, kodvwa ngangivele ngitenane ngetami. Nawe wawuvele utifune kimi letebiwe emini nome ebusuku.

⁴⁰ Emini bengibhadliswa lilanga, ebusuku ngishushwe lichwa, ngiphelelwe nabutfongo.

⁴¹ Bengihleti nawe iminyaka lengemashumi lamabili, emadvodzakati akho ngiwasebentele iminyaka lelishumi namine, timphahla takho ngatelusa iminyaka lesitfupha, nakhona lapho wangidlelela umholo wami ngekuwugucula emahlandla lalishumi.

⁴² Kube Nkulunkulu wababe, naNkulunkulu wa-Abrahama, lokwesaba kwa-Isaka, abengekho ngakimi, ngineliciniso kutsi ngabe ungicoshile ngahamba mahhala ngite lutfo. Kodvwa Nkulunkulu ukubonile kuhlupheka kwami nemsebenti wetandla tami, wase uyakwekhuta kulobusuku bayitolo.”

Sivumelwane emkhatsini waJakobe naLabani

⁴³ Labani waphendvula Jakobe watsi: “Lamadvodzakati lawa ngami, nalabantfwana bami, nalemihlambi yami, nako konkhe loku lokubonako kwami. Kodvwa kute lengingabuye ngikwente ngalamadvodzakati nalabantfwabawo lababatele.

⁴⁴ Lokuncono kota sente sivumelwane, wena nami, kube bufakazi emkhatsini wetfu sobabili.”

⁴⁵ Ngako-ke Jakobe watsatsa litje walimisa kutsi libe sikhumbuto.

⁴⁶ Jakobe wakhuluma kulamadvodza labehamba nawo watsi ababutse ematje. Nembala awabutsa enta ngawo sivivane, badla ndzawonye badlela eceleni kwaso.

⁴⁷ Labani wasetsa watsi yiJega Sahadutha; kodvwa Jakobe wasetsa watsi yiGaledi.

⁴⁸ Labani wakhuluma kuJakobe watsi: “Lamuhla lesivivane sibufakazi emkhatsini wakho nami.” Ngako-ke wasetsa watsi yiGaledi.

⁴⁹ Lelinye libito laso watsi yiMispa, ngobe abetsi: “Shangatsi Simakadze angasigcina sobabili nome sesehlukene.

⁵⁰ Nawuwaphatsa kabi lamadvodzakati ami nome sewutsatsa labanye bafati ngaphandle kwawo nome ungabonwa ngumuntfu, kodvwa ubokhumbula kutsi Nkulunkulu ungufakazi emkhatsini wetfu sobabili.”

⁵¹ Labani wachubeka wakhuluma kuJakobe, watsi: “Buka nasi sivivane nalelitje lelisikhumbuto lengikubeke embikwetfu sobabili.

⁵² Lesivivane asibe bufakazi, nalelitje kube ngulona bufakazi, bekutsi ngingeke ngendlule lesivivane nalelitje ngewelele ngakuwe, nawe futsi ungeke wendlule lesivivane nalelitje wewelele ngakimi kutakwenta bubi.

⁵³ Nkulunkulu wa-Abrahama naNkulunkulu waNahori, utakwehlulela emkhatsini wetfu.” Ngako-ke Jakobe wafunga ngaNkulunkulu weyise Isaka, wagomela kutsi utasigcina lesetsembiso.

⁵⁴ Jakobe wanikela ngemhlatjelo etikwentsaba, wase umema lamadvodza kutsi atewudla sinkhwa. Adla ahlala busuku bonkhe kuleyo ntsaba.

⁵⁵ Labani wavuka ngakusasa ekuseni ngetingweti, wanga batukulu bakhe nemadvodzakati akhe, wababusisa, wancandzeka wabuyela ekhaya kakhe.