Genesisi 30 - Siswati 1996 Bible

Labanye bantfwana baJakobe

¹ Watsi kube Rakheli abone kutsi akamtaleli Jakobe bantfwana, waba nesikhwele ngadzadzewabo. Watsi kuJakobe: “Ngiphe bantfwana, ngaphandle kwaloko ngitakufa!”

² Jakobe watfukutselela Rakheli, wadzimate watsi: “Kantsi mine nginguNkulunkulu yini, longuyena avale sitalo sakho?”

³ Rakheli waphendvula Jakobe watsi: “Nasi sisebenti sami lesinguBilha, ngena kuso, kuze atengitalela, khona nami ngitewuba nebantfwana ngaye.”

⁴ Ngako wamnika Bilha, sisebenti sakhe, kutsi abe ngumkakhe. Jakobe wangena kuBilha, walala naye.

⁵ Bilha wakhulelwa, watalela Jakobe indvodzana.

⁶ Rakheli watsi: “Nkulunkulu ungehlulele, waliva nelivi lami, wangipha indvodzana.” Ngako-ke wayetsa libito layo watsi nguDani.

⁷ Waphindze Bilha, sisebenti saRakheli, wakhulelwa, watalela Jakobe indvodzana yesibili.

⁸ Rakheli watsi: “Ngekubambana lokunemandla ngibambene nadzadzewetfu ngamehlula.” Wayetsa libito watsi nguNaftali.

⁹ Watsi kube abone Leya kutsi sewumile kutala, watsatsa Zilpha, sisebenti sakhe, wasinika Jakobe kutsi sibe ngumkakhe.

¹⁰ Zilpha sisebenti saLeya, watalela Jakobe indvodzana.

¹¹ Leya watsi: “Yinhlanhla lenhle,” ngako wayetsa libito watsi nguGadi.

¹² Zilpha, sisebenti saLeya, saphindze selamisa ngendvodzana yesibili.

¹³ Leya watsi: “Maye, ngiyajabula! Nyalo labasikati sebayawutsi ngibusisekile.” Ngako wayetsa libito watsi ngu-Asheri.

¹⁴ Ngesikhatsi kuvunwa kolo, Rubeni watsi uyahamba, watfola umutsi wentalo ensimini, wawumikisa kuLeya, unina. Ngako Rakheli watsi kuLeya: “Ngicela sewumane ungiphe lomunye walomutsi wentalo lotfolwe yindvodzana yakho.”

¹⁵ Leya watsi kuRakheli: “Wena nanyalo awukeneliswa kutsi wena sewugovuke nendvodza yami? Nyalo sewufuna kutsatsa nalomutsi lengiwutfolelwe yindvodzana yami?” Rakheli waphendvula Leya watsi: “Ungamane ulale nayo kulobusuku balamuhla, nawungamane nje ungiphe lomutsi wendvodzana yakho.”

¹⁶ Entsambama nakabuya etsafeni Jakobe, wahlangabetwa nguLeya. Wafike watsi kuJakobe: “Ubota utewulala nami lamuhla, ngobe ngikucashe ngemutsi wentalo lotfolwe yindvodzana yami.” Ngako-ke wavele wayawulala naye kulobo busuku.

¹⁷ Nkulunkulu wawuva umthandazo waLeya. Leya wakhulelwa, watalela Jakobe indvodzana yesihlanu.

¹⁸ Leya watsi: “Nkulunkulu unginike umvuzo wami, ngobe indvodza yami ngayinika sisebenti sami.” Lendvodzana wayetsa libito watsi ngu-Isakhari.

¹⁹ Leya waphindze wakhulelwa futsi. Watalela Jakobe indvodzana yesitfupha.

²⁰ Leya watsi: “Nkulunkulu unginike sipho lesihle. Manje indvodza yami seyitawubambelela kimi, ngobe sengiyitalele emadvodzana lasitfupha.” Ngako wayetsa libito watsi nguZebuloni.

²¹ Emvakwaloko Leya watalela Jakobe indvodzakati, wayetsa libito watsi nguDina.

²² Nkulunkulu wakhumbula Rakheli, wawuva umthandazo wakhe, wasivula sitalo sakhe.

²³ Rakheli wakhulelwa, watala indvodzana, watsi: “Nkulunkulu sewulisusile lihlazo lami.”

²⁴ Wayetsa libito watsi nguJosefa, atsi: “Shangatsi Simakadze angangengetela lenye indvodzana.”

Sivumelwane saJakobe naLabani

²⁵ Watsi Rakheli asatele Josefa, Jakobe watsi kuLabani: “Ase ungikhulule, ngihambe ngibuyele ekhaya kitsi naseveni lakitsi.

²⁶ Sale unginika bafati bami, nebantfwabami lengikusebentele ngabo ngitewuhamba, ngobe nawe uyawati umsebenti lengikwentele wona.”

²⁷ Labani watsi kuye: “Ase ngisho naku: Sengifundzile, futsi sengiyile ngeva kubemanga kutsi Simakadze ungibusise ngenca yakho.

²⁸ Shano liholo lakho, ngitakunika.”

²⁹ Jakobe watsi kuye: “Nawe matfupha uyati kutsi ngikusebentele kanjani, nekutsi timphahla takho tandze kanganani tiseluswa ngimi.

³⁰ Leto letimbalwa lewawunato ngisengakefiki setandze kakhulu. Simakadze ukubusise kuyo yonkhe indzawo lapho bengifika khona. Kodvwa-ke manje mine ngitayisebentela nini indlu yami?”

³¹ Labani wambuta watsi: “Ufuna ngikuholele ngani?” Jakobe wamphendvula watsi: “Angiwufuni umholo. Ngitawuchubeka ngikwelusele lomhlambi wakho, nawungasemukela nasi sicelo sami:

³² Ase ngiyibhidle ekhatsi lemihlambi yakho. Ngitawukhetsa kuyo tonkhe timvu letinemibala naletingemacabhacabha kanye nemazinyane lamnyama, ngikhetse tonkhe timbuti letinemibala naletinemacabhacabha; ngito-ke letitawuba ngumholo wami.

³³ Ngako kwetsembeka nekulunga kwami ngiko lokuyawungifakazela, nase uta ngemuso utewuhlola umholo wami. Nawukhandza imbuti lengenamabala nalengesiwo emacabhacabha nemvu lengemnyama kuleti takami kuyawukhanya kutsi ngitebile.”

³⁴ Labani waphendvula watsi: “Kulungile! Akube njengekusho kwakho.”

³⁵ Kodvwa ngalo lelo langa Labani watikhetsa tonkhe timphongo letinemibala naletimacabhacabha, tonkhe letinalokumhlophe nemazinyane lamnyama, watinika emadvodzana akhe kutsi ateluse,

³⁶ watsatsa luhambo lwemalanga lamatsatfu kusuka kuJakobe. Jakobe wachubeka wayelusa imihlambi yaLabani leyayisasele.

³⁷ Jakobe watsatsa imizaca leyayisemanti yetihlahla telibhabhabhulomu, ne-alimondi, nepleni, wayebula wayenta imishi, yasala yaba mhlophe.

³⁸ Lemizaca wayibeka embikwaletimvu etinkelebheni, lapho tatinatsa khona, ngobe tatekhwelwa natiye kuyewunatsa.

³⁹ Tekhwelelwa etikwayo lemizaca, temitsa, tatala emazinyane lanemibala, nalangemacabhacabha, nalanemishi.

⁴⁰ Jakobe wakhetsa onkhe lamazinyane labetelwe; lemihlambi yeluphawu lwaLabani wayibhekisa ngakulamazinyane. Umhlambi wakhe wawakha ngalendlela wawehlukanisa nemihlambi yaLabani.

⁴¹ Kwakutsi njalo nje letifuyo naseticinile setekhwelwa, Jakobe abeke lemizaca kuletinkelebha tekunatsa embikwalomhlambi entele kutsi titekwemitsela eceleni kwalemizaca.

⁴² Kodvwa abengayibeki lemizaca embikwaletifuyo letatiwombile. Ngako-ke Labani wagcina asasalelwe nguletiwombile todvwa, kwatsi leticinile taba taJakobe.

⁴³ Jakobe wagcina asanjinge kakhulu, waba nemihlambi lemikhulu, netincekukati, netinceku, nemakamela, netimbongolo.