Genesisi 28 - Siswati 1996 Bible

¹ Isaka wabita Jakobe, wambusisa wamyala watsi: “Ungamtsatsi umfati kulamaKhenani.

² Hamba uye eMesophothamiya ekhabonyoko, kaBethuweli, utitsatsele khona umfati emadvodzakatini aLabani, malume wakho.

³ Shangatsi Nkulunkulu Somandla angakubusisa akuchumise, akwandzise, udzimate ube tive letinyenti.

⁴ Shangatsi angakunika sibusiso sa-Abrahama, wena kanye netitukulwane takho, uze ulitsatse libe lakho lelive losihambi kulo kwamanje, Nkulunkulu lalinika Abrahama!”

⁵ Ngako-ke Isaka wahambisa Jakobe wamyisa eMesophothamiya kaLabani umsa waBethuweli, um-Aramu, umnakaboRebheka, unaboJakobe na-Esawu.

Esawu utsatsa lomunye umfati

⁶ Esawu weva kutsi Isaka abesabusise Jakobe, wabuye wamhambisa watsi akaye eMesophothamiya, kutsi ayewutsatsa khona umfati. Esawu weva nekutsi Isaka abesayale Jakobe watsi: “Ungamtsatsi umfati kulamaKhenani.”

⁷ Weva nekutsi Jakobe abebahloniphile boyise nenina ngekutsi ahambe aye eMesophothamiya.

⁸ Esawu watsi kube abone kutsi emadvodzakati emaKhenani abengamjabulisi uyise,

⁹ wesuka wayawutsatsa Mahalathi wamenta umkakhe etikwalabafati labenabo. Mahalathi abengudzadzewaboNebayothi, indvodzakati ya-Ishmayeli, umsa wa-Abrahama.

Liphupho la-Jakobe eBetheli

¹⁰ Jakobe wesuka eBherisheba waya eHarani.

¹¹ Wefika endzaweni lengcwele wahlala khona busuku, ngobe lilanga lase lishonile. Watsatsa lelinye lematje akuleyo ndzawo wacamela etikwalo, walala.

¹² Wabhudza abona liladi limiswe emhlabatsini, laze lefika ezulwini, wabona tingilosi taNkulunkulu tehla tenyuka ngalo.

¹³ Simakadze abeme etikwalo; wakhuluma naye watsi: “NginguSimakadze, Nkulunkulu weyihlo Abrahama, naNkulunkulu wa-Isaka. Lelive lolele kulo ngiyawulinika wena kanye netitukulwane takho.

¹⁴ Titukulwane takho tiyawuba ngangelutfuli lwemhlaba. Uyakwandza nemhlaba wonkhe wenabele enshonalanga, nasemphumalanga, nasenyakatfo, naseningizimu. Tonkhe tive temhlaba tiyawubusiswa ngawe nangetitukulwane takho.

¹⁵ Ukhumbule kutsi ngitawuba nawe ngikulondvolote nome uyaphi, ngikubuyise kulo lelive. Ngobe ngingeke ngikushiye ngingakakwenti loku lesengikwetsembise kona.”

¹⁶ Jakobe waphaphama ebutfongweni, watsi: “Kantsi Simakadze ukulendzawo, bengingakwati-ke loku.”

¹⁷ Wefikelwa kwesaba, watsi: “Maye, lendzawo iyesabeka! Ngempela lendzawo iyindlu yaNkulunkulu. Leli lisango lasezulwini.”

¹⁸ Ngako-ke Jakobe wavuka ekuseni kuseluvivi, walitsatsa lelitje abecamele kulo, walimisa laba luphawu lwesikhumbuto, watsela emafutsa etikwalo.

¹⁹ Lendzawo wayetsa libito watsi yiBetheli, kodvwa ekucaleni lelidolobha lalibitwa ngekutsi yiLuzi.

²⁰ Jakobe wase wenta sifungo, watsi: “Nangabe Nkulunkulu atawuba nami angilondvolote kuloluhambo lwami, anginike kudla, netimphahla tekwembatsa, ngembatse,

²¹ ngidzimate ngibuyele ngekuthula ekhaya ketfu, khona-ke Simakadze uyawuba nguNkulunkulu wami.

²² Lelitje lengilimise la, kutsi libe sikhumbuto, litawuba yindlu yaNkulunkulu. Kuko konkhe langipha kona ngiyakumnika kwelishumi.”