Genesisi 27 - Siswati 1996 Bible

Isaka ubusisa Jakobe

¹ Kwatsi Isaka asamdzala kakhulu, emehlo akhe asafiphele angasaboni kahle. Watfumela wabita Esawu, indvodzana yakhe lendzala, wafike watsi kuye: “Msawami!” Wasabela watsi: “Ngilapha, babe.”

² Isaka watsi: “Manje sengimdzala, angilati lilanga lami lekuhamba emhlabeni.

³ Manje-ke, tsatsa tinsungulo nebutjoki bakho, uhambe uye etsafeni, uyekungitingelela inyamatane,

⁴ ungilungisele kudla lokumnandzi, ungiletsele kona ngitewudla, bese ngiyakubusisa, ngingakafi.”

⁵ Rebheka bekalalele ngesikhatsi Isaka akhuluma nemsa wakhe, Esawu. Ngako watsi kube Esawu ahambe aye etsafeni kuyewutingela inyamatane atewuyiletsa kuyise,

⁶ Rebheka watsi kuJakobe, indvodzana yakhe: “Ngive uyihlo akhuluma nemnakenu Esawu atsi:

⁷ ‘Ngiletsele inyama yenyamatane ungilungiselele kudla lokumnandzi, kuze ngitekudla, ngikubusise embikwaSimakadze, ngisengakafi.’

⁸ Manje-ke, ndvodzana yami, lalela emavi ami, wente lengikushoko.

⁹ Hamba uye etimbutini ungilandzele emazinyane lamabili lakhuluphele, kuze ngitewulungiselela uyihlo kudla lokumnandzi.

¹⁰ Utawube sewukumikisa kuyihlo kutsi adle, khona atekubusisa asengakafi.”

¹¹ Kepha Jakobe watsi kuRebheka, unina: “Ingani Esawu, umnaketfu, ulihwanca, mine ngibusheleleti.

¹² Babe angahle angiphatse ngesandla, bese ngitfolakala ngingulonebucili, esikhundleni sekutsi angibusise angicalekise.”

¹³ Unina watsi kuye: “Ndvodzana yami, leso sicalekiso asehlele kimi; wena yenta loko lengikutjela kona, hamba ungilandzele lamazinyane.”

¹⁴ Wahamba, wafike wawatsatsa wawaletsa kunina. Unina walungiselela Isaka kudla lokumnandzi.

¹⁵ Rebheka watsatsa timphahla letincono kakhulu ta-Esawu letatisendlini kabo, watembatsisa Jakobe.

¹⁶ Wamembatsisa letikhumba temazinyane etimbuti etandleni takhe nasentsanyeni yakhe, lapho abeshelela khona.

¹⁷ Watsatsa lokudla lokumnandzi nesinkhwa labesasentile wakunika indvodzana yakhe Jakobe.

¹⁸ Jakobe waya kuyise wafike watsi: “Babe.” Wamphendvula watsi: “Yebo, msawami. Ungubani wena?”

¹⁹ Jakobe wamphendvula watsi: “Ngingu-Esawu, litubulo lakho; sengikwentile konkhe longitfume kona, babe. Vuka, utekudla inyama yenyamatane, bese uyangibusisa.”

²⁰ Kepha Isaka watsi kulomsa wakhe: “Hhawu, ndvodzana yami, washesha kangaka kuyitfola, wente njani?” Jakobe waphendvula watsi: “Kungobe Simakadze, Nkulunkulu wakho, ungiphumelelisile.”

²¹ Isaka watsi kuJakobe: “Sondzela ngitekuphatsa, msawami, ngiteba neliciniso kutsi unguye sibili yini Esawu, indvodzana yami, nome cha.”

²² Nembala Jakobe wasondzela ku-Isaka. Isaka welula sandla wamphatsa watsi: “Livi lona laJakobe, kodvwa tandla ta-Esawu.”

²³ Akazange ati kutsi nguJakobe, ngobe tandla takhe tatineboya njengetandla ta-Esawu. Ngako-ke wase uyambusisa.

²⁴ Waphindze wambutisisa watsi: “Unguye ngempela yini Esawu?” Jakobe wamphendvula watsi: “Nginguye.”

²⁵ Isaka watsi: “Ngisondzetele inyama yenyamatane yakho, msawami, ngitekudla ngikubusise.” Wamsondzetela, wadla. Wamniketa neliwayini, walinatsa.

²⁶ Emvakwaloko uyise Isaka watsi kuye: “Sondzela, ndvodzana yami, ungange.”

²⁷ Wasondzela, wamanga. Watsi nakaliva liphunga letimphahla takhe, wambusisa watsi: “Awu, liphunga lendvodzana yami linjengeliphunga lasetsafeni, litsafa lelabusiswa nguSimakadze.

²⁸ Shangatsi Nkulunkulu angakunika ematolo asezulwini, avundzise nemasimi akho, akuphe inala yemabele neyeliwayini.

²⁹ Shangatsi tive tingasebenta wena, nemindeni ikukhotsamele. Ube yinkhosi kubomnakenu, emadvodzana enyoko akukhotsamele. Akacalekiswe lokucalekisako, abusiswe lokubusisako.”

Esawu uncenga Isaka kutsi ambusise

³⁰ Kwatsi acedza nje Isaka kubusisa Jakobe, naJakobe asandza kusuka nje ku-Isaka, uyise, watseleka Esawu, umnakabo, aphuma ekutingeleni.

³¹ Naye walungisa kudla lokumnandzi wakumikisa kuyise. Wafike watsi kuye: “Ngicela asale avuka babe, adle inyama yenyamatane layilungiselwe yindvodzana yakhe, khona atekuyibusisa.”

³² Uyise, Isaka, wambuta watsi: “Ungubani wena?” Wamphendvula watsi: “Ngingumsa wakho, Esawu, litubulo lakho.”

³³ Isaka wetfuka wachachatela kamatima wonkhe umtimba watsi: “Kantsi ngubani lona loletse inyama yenyamatane lapha kimi, ngayidla yonkhe ungakefiki wena, ngase ngiyambusisa? Ngempela utawubusiswa yena.”

³⁴ Watsi Esawu nakeva lamavi eyise, wakhala kakhulu, wadzimate watsi kuyise: “Babe, nami ngibusise.”

³⁵ Isaka wamphendvula watsi: “Umnakenu ufike wangiyenga, watsatsa sibusiso sakho.”

³⁶ Esawu watsi: “Utsi aketsiwanga kahle yini kutsi kutsiwe nguJakobe? Ngobe loku sekwesibili angiphamba. Wacale watsatsa lifa lebutubulo bami, manje-ke sewutsatse sibusiso sami.” Wachubeka Esawu wabuta uyise watsi: “Awukangibekeli yini sakami sibusiso?”

³⁷ Isaka wamphendvula watsi: “Asubuke nje, sengimente waba yinkhosi yakho, ngimnike bonkhe bomnakabo kutsi babe tisebenti takhe. Ngimuphe inala yemabele neyeliwayini. Pho, wena ngingabe ngisakwentelani, ndvodzana yami?”

³⁸ Esawu watsi kuyise: “Babe, sekukuphela kwato letibusiso bewunato yini, awunaso yini lesinye sibusiso? Babe, nami ngibusise!” Esawu wadzatimula wakhala.

³⁹ Wamphendvula uyise, Isaka, watsi: “Umuti wakho ungeke ube nemvundvo, uyawuba khashane nematolo elizulu.

⁴⁰ Uyawuphila ngenkemba yakho, usebente umnakenu, kodvwa kuyawutsi nawudlubulundzela, uyawulephula lijoko lakhe entsanyeni yakho.”

⁴¹ Esawu wamtondza Jakobe ngenca yesibusiso labesitsatse kuyise, wadzimate watsi enhlitiyweni yakhe: “Emalanga ekulilela babe asayasondzela, emvakwawo Jakobe, umnaketfu, ngitambulala.”

Rebheka utjela Jakobe kutsi akabalekele eHarani kaLabani

⁴² Kodvwa Rebheka watsi kube atjelwe ngaloku Esawu, indvodzana yakhe lendzala, labesatimisele kukwenta, Rebheka wabita Jakobe, indvodzana yakhe lencane, wayitjela watsi: “Lalela la, umnakenu Esawu utidvudvuta ngekutsi utakubulala.

⁴³ Ngako-ke, ndvodzana yami, lalela livi lami: Baleka masinyane uye kamnaketfu Labani eHarani;

⁴⁴ ufike uhlalahlale khona, kuze kuphole kutfukutsela kwemnakenu.

⁴⁵ Nangabe kutfukutsela kwakhe sekutse gogololo, asakukhohliwe naloku lokwente kuye, ngiyakutfumela ngikulandze. Ngesaba kulahlekelwa ngini nobabili ngalanga linye.”

Isaka utfumela Jakobe kuLabani

⁴⁶ Rebheka watsi ku-Isaka: “Ngidziniwe kuphila ngenca yalabalukatana baka-Esawu labatsatsa kumaHethi. Nangabe naJakobe angatsatsa umfati emkhatsini walamaHethi, lafanana nalawa lengihleti nawo, kungaba ncono ngimane ngife lokungenani!”