Genesisi 19 - Siswati 1996 Bible

Konakala kweSodoma

¹ Natifika eSodoma letingilosi letimbili, Loti abehleti esangweni lalowo muti. Watsi kube atibone, Loti wasukuma watihlangabeta; watikhotsamela,

² watsi kuto: “Makhosi, ngiyanicela kutsi niphambuke nitewungenisa endlini yenceku yenu kulobusuku balamuhla, khona nitewugeza tinyawo tenu. Kusasa ngeluvivi seningahamba niye lapho niya khona.” Kodvwa taphendvula tatsi: “Cha, sitawuhlala lapha ngaphandle.”

³ Kepha Loti watincenga kakhulu letingilosi, tadzimate taphambuka taya tangenisa endlini kakhe. Watentela lidzili, watibhakela sinkhwa lesite imbiliso, tadla.

⁴ Kepha tatsi tisengakalali, onkhe emadvodza alomuti waseSodoma, lamadzala nalamancane, ayitungeleta lendlu.

⁵ Amemeta Loti atsi: “Aphi lamadvodza langenise lapha kakho kuyo lentsambama? Wakhiphe uwaletse la, khona sitewulala nawo!”

⁶ Loti waphuma waya kuwo, wavala umnyango emvakwakhe,

⁷ watsi: “Ngiyanincenga, bomnaketfu, kutsi ningayenti lentfo lembi kangaka.

⁸ Ase nilalele la, nginemadvodzakati lamabili langazange asalale nemuntfu lomdvuna. Angimane nginiletsele wona, nente lenikutsandzako kuwo. Kepha ningenti lutfo kulamadvodza, ngobe angenise endlini kami.”

⁹ Kepha atsi kuye: “Khwesha wena mchamuki-ndzini, sewufuna kuba ngumehluleli wetfu! Wena-ke sesitakuphatsa matima kakhulu kunawo.” Bafuca Loti bamcindzetela betama kwephula sivalo.

¹⁰ Kepha lamadvodza lamabili aveta tandla tawo, advonsa Loti amngenisa endlini kuwo, avala umnyango.

¹¹ Ashaya lamadvodza labesemnyango ngebumphumphutse onkhe lawo labengaphandle kwendlu, lamancane nalamadzala, kangangekutsi abatse ayawufuna umnyango angete awutfola.

Loti uphuma eSodoma

¹² Lamadvodza lamabili atsi kuLoti: “Nangabe bakhona labanye bantfu lonabo, labanjengebakhwenyana, nemadvodzana, nemadvodzakati nome ngangubani lokulelidolobha, bakhiphe lapha,

¹³ ngobe lendzawo sesitayibhubhisa, ngesizatfu sekutsi sikhalo ngalabantfu balapha sesikhulu kakhulu kuSimakadze; ngako Simakadze usitfume kutsi siteyibhubhisa.”

¹⁴ Ngako-ke Loti waphuma waya kubakhwenyana bakhe lababetawutsatsa emadvodzakati akhe, wefike watsi: “Sheshisani siphume, ngobe Simakadze sewutayibhubhisa lendzawo.” Kepha bamtsatsa njengemuntfu lonamako nje.

¹⁵ Ekuseni kuseluvivi tingilosi tamgcugcuta Loti tatsi: “Vuka, utsatse umkakho nemadvodzakati akho lamabili lakhona la, ningahle nehlelwe ngulesijeziso salelidolobha.”

¹⁶ Kepha Loti wabina; ngako-ke ngobe Simakadze waba nesihawu kuye, lamadvodza lamabili ababamba ngetandla, yena nemkakhe kanye nemadvodzakati akhe abakhiphela ngaphandle kwalelidolobha.

¹⁷ Atsi kube abakhiphele ngaphandle, lomunye wawo watsi: “Balekani nitewusindza! Ningasabuki nasemuva, ningemi ndzawo kulelitsafa. Balekani nicondze ngasetintsabeni, ningahle nehlelwe ngulesijeziso.”

¹⁸ Loti waphendvula watsi: “Cha, Nkhosi, akungabi njalo.

¹⁹ Inceku yakho itfole umusa emehlweni akho, wayentela sihawu lesikhulu ngekusindzisa imphilo yayo; kodvwa ngingeke ngikwati kubalekela etintsabeni, ngobe lesijeziso singahle singijubele ngembili, bese ngiyafa.

²⁰ Ase ubuke naliya lidolobha ngesheya, kumalula kubalekela kulo ngobe lisedvutane, futsi lincane. Ngicela kubalekela kulelidolobha lelincane, khona ngitewusindza.”

²¹ Yatsi kuye: “Yebo-ke naloko ngiyakwemukela. Ngingeke ngilibhubhise lelidolobha lokhuluma ngalo.

²² Phangisa-ke ubalekele khona; ngobe ngingeke ngente lutfo ungakefiki khona.” Ngako-ke, njengobe Loti watsi lelidolobha lincane, lase letsiwa ngekutsi yiSowari.

Kubhujiswa kweGomora neSodoma

²³ Watsi Loti nakefika eSowari, lilanga lase liphuma.

²⁴ Simakadze wanisa imvula yesibabule nemlilo, iphuma ezulwini, kwana etikweSodoma neGomora.

²⁵ Wawabhubhisa lawo madolobha kanye nalo lonkhe lelo tsafa, nebantfu bawo bonkhe, nako konkhe lokwakumile emhlabatsini.

²⁶ Kepha umkaLoti wabuka emuva, wagucuka masinyane waba yinsika yeluswayi.

²⁷ Abrahama wavuka ekuseni kuseluvivi waya kulendzawo lapho abehlangene naSimakadze khona.

²⁸ Wabuka entansi ngaseSodoma neGomora, ematsafeni angakhona. Wabona intfutfu yalelo live yenyuka njengemusi wenkhehlewane yemlilo.

²⁹ Ngako-ke Nkulunkulu nakabhubhisa lamadolobha alawo matsafa, wakhumbula Abrahama ngekutsi akhiphe Loti ekubhujisweni kwalamadolobha, Loti labehlala kuwo.

Kusunguleka kwemaMowabi nema-Amoni

³⁰ Njengobe Loti bekesaba kuhlala eSowari, waphuma wayawuhlala etintsabeni yena nemadvodzakati akhe lamabili; likhaya labo kwaba ngumgedze.

³¹ Lendvodzakati yaLoti yematubulo yakhuluma kulena lencane, yatsi: “Babe wetfu semdzala, kantsi futsi kulelive kute indvodza lengalala natsi njengobe bonkhe bantfu benta.

³² Kota, sitewunatsisa babe liwayini, bese silala naye, sentele kutatitfolela bantfwana kubabe.”

³³ Kulobo busuku uyise bamnatsisa liwayini, wadzakwa. Litubulo lakhe langena kuye, lalala neyise. Loti akazange asamuve nekutsi wangena nini waphuma nini engutjeni, ngobe bekadzakwe kakhulu.

³⁴ Ngakusasa lelitubulo latsi kulona lomncane: “Awuboni-ke, mine ngilele naye babe ebusuku bayitolo, asiphindze simnatsise futsi nalamuhla bese uyangena nawe ulale naye, sentele kutitfolela bantfwana kubabe.”

³⁵ Ngako-ke baphindza bamnatsisa uyise nakubo lobo busuku wadzakwa. Lona lomncane wahamba wafike walala neyise. Loti akamvanga nakangena nome asaphuma, ngobe bekadzakwe kakhulu.

³⁶ Ngako-ke omabili emadvodzakati aLoti akhuleliswa nguyise.

³⁷ Litubulo lakhe latala indvodzana, layetsa libito latsi nguMowabi. Unguyise wemaMowabi alamuhla.

³⁸ Lencane nayo yatala indvodzana, yayetsa libito yatsi nguBhenani. Unguyise wema-Amoni alamuhla.