Genesisi 18 - Siswati 1996 Bible

Abrahama wetsenjiswa indvodzana

¹ Simakadze wabonakala ku-Abrahama ngasema-okhini aMamre, ahleti ngasemnyango welithende lakhe ngesikhatsi sekushisa kwelilanga.

² Abrahama watsi nakaphakamisa emehlo, wabona emadvodza lamatsatfu eme embikwakhe. Watsi kube awabone, wesuka emnyango welithende lakhe wagijima wawahlangabeta, wafike wakhotsama,

³ watsi: “Banumzane, nangitfole umusa emehlweni enu, ningayendluli inceku yenu.

⁴ Ase nginiletsele liyakana lemanti nitewugeza tinyawo tenu, bese niphumula la emtfuntini walesihlahla.

⁵ Ngitawulandza lucetwana lwesinkhwa, khona nitewudla kucala ningakahambi, njengobe naku senifike ekhaya lenceku yenu.” Ngako-ke batsi kuye: “Kulungile, yenta njengobe sewushito.”

⁶ Abrahama waphutfuma ethendeni kuSara, watsi: “Sheshisa utsatse emabinta lamatsatfu afulaha uyibhuce, wente emacebelengwane.”

⁷ Abrahama wagijima waya etinkhomeni, wafike wakhetsa litfole lelihle lelikhuluphele, walinika sisebenti, naso saphutfuma salilungisa.

⁸ Watsatsa emasi, nelubisi, nalenyama yelitfole leyase ilungisiwe, wakubeka embikwawo; yena wema eceleni kwawo phansi kwesihlahla ngesikhatsi asadla.

⁹ Ambuta atsi: “Uphi Sara, umkakho?” Wawaphendvula watsi: “Usethendeni.”

¹⁰ Simakadze watsi kuye: “Impela ngitawubuya kuwe ngemnyaka lotako ngasona lesikhatsi, Sara umkakho utawuba nendvodzana.” Sara wakuva loko, ngobe abesemnyango welithende emvakwa-Abrahama, alalele.

¹¹ Kepha bo-Abrahama naSara bese babadzala kakhulu, naSara abengasayi esikhatsini.

¹² Sara watihlekela nje, wadzimate watsi: “Manje sengimdzala kangaka, nenkhosi yami seyigugile, utsi ngingabe ngisaba nayo lenjabulo?”

¹³ Simakadze watsi ku-Abrahama: “Uhlekeleni Sara, atsi: ‘Ngitawutala umntfwana sengimdzala kangaka?’

¹⁴ Kukhona yini lokungamehlula Simakadze? Njengobe sengishito, ngitawubuya la kuwe ngemnyaka lotako. Sara utawuba nendvodzana.”

¹⁵ Kodvwa Sara waphika ngenca yekwesaba watsi: “Angikahleki.” Kepha waphendvula watsi: “Cha, vele uhlekile.”

Abrahama uncengela iSodoma

¹⁶ Lamadvodza esuka lapho ahamba asalibhekise eSodoma, Abrahama wawaphekeletela, entela kuwakhombisa indlela.

¹⁷ Simakadze wase utsi: “Kodvwa ngingamfihlela yini Abrahama loku lengitakwenta?

¹⁸ Phela, Abrahama utawuba sive lesikhulu lesinemandla, tonkhe tive temhlaba tiyawubusiswa ngaye.

¹⁹ Cha, ngeke, ngobe Abrahama ngimkhetsile kutsi ayale emadvodzana akhe netitukulwane takhe emvakwakhe, kutsi bagcine intsandvo yaSimakadze ngekwenta lokuhle nalokulungile. Khona-ke Simakadze uyawunika Abrahama loko lametsembisa kona.”

²⁰ Simakadze waphindza wakhuluma ku-Abrahama, watsi: “Njengobe kunekukhala lokukhulu ngeSodoma neGomora, nesono sabo simatima kakhulu,

²¹ ngitakwehla ngiyewubona kutsi ngabe bente njengekusho kwesikhalo lesifike kimi yini. Nangabe akunjalo, ngitakwati.”

²² Ngako-ke lamadvodza esuka lapho acondza ngaseSodoma; kepha Abrahama wasala embikwaSimakadze.

²³ Abrahama wasondzela kuSimakadze watsi: “Uyawubabhubhisa ngempela yini labalungile kanye nalababi?

²⁴ Nangabe-ke kulelidolobha kukhona labalungile labangema-50, utawulibhubhisa yini? Ungete walisindzisa yini ngenca yalaba labalungile labangema-50?

²⁵ Akube khashane nawe kwenta intfo lenje! Ungababhubhisi labalungile kanye nalababi, bese labalungile baba njengalabangakalungi! Akube khashane nawe loko. Angeke yini umehluleli wemhlaba wonkhe ente kulunga?”

²⁶ Simakadze wamphendvula watsi: “Nangikhandze bantfu labalungile labangema-50 eSodoma, yonkhe leyo ndzawo ngiyawuyisindzisa ngenca yabo.”

²⁷ Abrahama waphindze wakhuluma futsi, watsi: “Ngiyacolisa kuba nesibindzi sekukhuluma neNkhosi yami, mine lengilutfuli nemlotsa.

²⁸ Nakwenteka babe ngema-45, utalibhubhisa yini ngenca yalaba labasilele?” Simakadze waphendvula watsi: “Ngingeke ngilibhubhise, nangikhandze kutsi labalungile bangema-45.”

²⁹ Abrahama waphindze wakhuluma kuye futsi, watsi: “Ase ngitsi-ke kutfolakala kutsi labalungile bangema-40.” Wamphendvula watsi: “Nakukhona labangema-40 labalungile, ngingeke ngilibhubhise.”

³⁰ Abrahama watsi: “Ngicela kutsi iNkhosi ingatfukutseli ngekutsi ngisakhuluma. Nakwenteka-ke kutfolakala labalungile bangema-30?” Wamphendvula watsi: “Ngingeke ngilibhubhise, nangikhandza kutsi labalungile bangema-30.”

³¹ Abrahama watsi: “Ngiyacolisa kuba nesibindzi sekuchubeka ngikhulume neNkhosi. Ase ngitsi-ke ukhandza labalungile bangema-20?” Wamphendvula watsi: “Ngingeke ngilibhubhise, nangikhandza labalungile bangema-20.”

³² Abrahama watsi: “Ngicela kutsi iNkhosi ingatfukutseli ngobe sengitawukhuluma kwekugcina-ke manje. Ase ngitsi-ke ukhandza labalungile balishumi?” Wamphendvula watsi: “Ngenca yalabalungile labalishumi ngingeke ngilibhubhise.”

³³ Watsi kube acedze kukhuluma na-Abrahama, Simakadze wase uyahamba; Abrahama wabuyela ethendeni lakhe.