Genesisi 11 - Siswati 1996 Bible

Umbhoshongo waseBhabheli

¹ Umhlaba wonkhe wawukhuluma lulwimi lunye lunemagama manye etintfo.

² Batsi basahambahamba ngasemphumalanga, bakhandza litsafa eveni laseShinari, bafike bahlala khona.

³ Base bakhulumisana bodvwana, batsi: “Wotani, asente titini, sitishise.” Basebentisa titini esikhundleni sematje, nelitiyela esikhundleni seludzaka.

⁴ Batsi: “Wotani, sitakhele lidolobha, nembhoshongo lotawufikela ezulwini, sitentele ligama, sitekwatiwa, khona singetiwulahlekelana sisakateke nemhlaba wonkhe.”

⁵ Simakadze wehla atewubona lelidolobha nalombhoshongo lowawakhiwa bantfu.

⁶ Simakadze watsi: “Ase nibheke labantfu basive sinye, nelulwimi lunye; loku kusicalo saloko labatakwenta, kute labatawutsi nabatimisele kukwenta behluleke kukwenta.

⁷ Wotani, sehle, siyewusanganisa lulwimi lwabo, khona bangetiwuvana.”

⁸ Ngako Simakadze wabahlakata nemhlaba wonkhe, bayekela kulakha lelo dolobha.

⁹ Ngako-ke wetsiwa libito kwatsiwa yiBhabheli, ngobe Simakadze wasanganisa lulwimi lwemhlaba wonkhe. Kusuka lapho Simakadze bantfu wabasakata nemhlaba wonkhe.

Titukulwane taShemi

¹⁰ Nati-ke titukulwane taShemi. Emvakweminyaka lemibili kwendlule zamcolo, Shemi abesaneminyaka lelikhulu, watala Aphakshadi.

¹¹ Emvakwekutalwa kwa-Aphakshadi, Shemi waphila iminyaka lengema-500, watala emadvodzana nemadvodzakati.

¹² Aphakshadi abesaneminyaka lengema-35, nakatala Shela.

¹³ Emvakwekutalwa kwaShela, Aphakshadi waphila iminyaka lengema-403, watala emadvodzana nemadvodzakati.

¹⁴ Shela abesaneminyaka lengema-30, nakatala Ebheri.

¹⁵ Emvakwekutalwa kwa-Ebheri, Shela waphila iminyaka lengema-403, watala emadvodzana nemadvodzakati.

¹⁶ Ebheri abesaneminyaka lengema-34, nakatala Phelegi.

¹⁷ Emvakwekutalwa kwaPhelegi, Ebheri waphila iminyaka lengema-430, watala emadvodzana nemadvodzakati.

¹⁸ Phelegi abesaneminyaka lengema-30, nakatala Rehu.

¹⁹ Emvakwekutalwa kwaRehu, Phelegi waphila iminyaka lengema-209, watala emadvodzana nemadvodzakati.

²⁰ Rehu abesaneminyaka lengema-32, nakatala Serugi.

²¹ Emvakwekutalwa kwaSerugi, Rehu waphila iminyaka lengema-207, watala emadvodzana nemadvodzakati.

²² Serugi abesaneminyaka lengema-30, nakatala Nahori.

²³ Emvakwekutalwa kwaNahori, Serugi waphila iminyaka lengema-200, watala emadvodzana nemadvodzakati.

²⁴ Nahori abesaneminyaka lengema-29, nakatala Thera.

²⁵ Emvakwekutalwa kwaThera, Nahori waphila iminyaka leli-119, watala emadvodzana nemadvodzakati.

²⁶ Thera waphila iminyaka lengema-70, watala telamani bo-Abrama, naNahori, naHarani.

Titukulwane takaThera

²⁷ Nati-ke titukulwane taThera: Thera abenguyise wa-Abrama, naNahori, naHarani. Harani abenguyise waLoti.

²⁸ Harani wafa kucala kuneyise, Thera; wafela eveni latalelwa kulo, i-Uri yemaKhaledi.

²⁹ Bo-Abrama naNahori batsatsa bafati. Libito lemka-Abrama kwakunguSarayi; libito lemkaNahori kwakunguMilkha, indvodzakati yaHarani, uyise waMilkha naJiskha.

³⁰ Sarayi abeyinyumba, ate bantfwana.

³¹ Thera watsatsa Abrama, indvodzana yakhe, naLoti, umtukulu wakhe umsa waHarani, namalukatana wakhe Sarayi, labengumka-Abrama, umsa wakhe, wahamba nabo esuka e-Uri yemaKhaledi, bacondze eveni laseKhenani. Batsi kube befike eHarani, bakha khona.

³² Thera wafela lapho eHarani asaneminyaka lengema-205.