Eksodusi 7 - Siswati 1996 Bible

¹ Simakadze wakhuluma kuMosi, watsi: “Buka la, wena ngitakwenta ufane naNkulunkulu kuFaro; Aroni, umnakenu, yena abe ngumphrofethi wakho.

² Wena utawutjela Aroni konkhe loko lengikuyale ngako; yena-ke utabe sewutjela Faro kutsi akhulule sive sami, ema-Israyeli, siphume eveni lakhe.

³ Kodvwa ngitayenta ibe lukhuni inhlitiyo yaFaro, nome ngingaze ngente tibonakaliso netimangaliso letinyenti la eveni laseGibhithe.

⁴ Faro angeke anilalele, ngako-ke ngiyakwehlisela sandla sami eGibhithe, ngiyijezise kabuhlungu, ngikhiphe sive sami, bantfwana baka-Israyeli, eGibhithe.

⁵ EmaGibhithe ngulapho ayawungati khona kutsi nginguSimakadze, nase ngelule sandla sami ngikhulula ema-Israyeli emkhatsini wawo.”

⁶ BoMosi na-Aroni benta njengobe babeyalwe nguSimakadze.

⁷ Mosi abesaneminyaka lengema-80, kantsi Aroni abesaneminyaka lengema-83, nabakhulumisana naFaro.

Indvuku ya-Aroni

⁸ Simakadze wakhuluma kuboMosi na-Aroni, watsi:

⁹ “Faro nakatsi: ‘Ase nente ummangaliso lotanifakazela,’ ubotsi ku-Aroni: ‘Tsatsa indvuku yakho uyijike phansi embikwaFaro, itawugucuka ibe yinyoka.’ ”

¹⁰ Ngako-ke boMosi na-Aroni baya kuFaro befike benta njengobe Nkulunkulu abebayalile. Aroni wajika indvuku yakhe phansi embikwaFaro netiphatsimandla takhe, indvuku yagucuka yaba yinyoka.

¹¹ Faro wabita tihlakaniphi kanye nalabalumbako bakakhe. Nabo labalumbi baseGibhithe bakwenta loko ngemilingo yabo.

¹² Nabo batijika phansi tindvuku tabo, tagucuka taba tinyoka. Kodvwa indvuku ya-Aroni yatimita tonkhe leti letinye tindvuku.

¹³ Inhlitiyo yaFaro yajinge yaba lukhuni, akazange abalalele, njengobe Simakadze abeshito.

Tinhlupheko taseGibhithe Sishayo sekucala: Emanti agucuka aba yingati

¹⁴ Simakadze wakhuluma kuMosi, watsi: “Inhlitiyo yaFaro seyilukhuni, uyala kukhulula labantfu kutsi bahambe.

¹⁵ Hamba uye kuFaro ekuseni ngesikhatsi aya emfuleni iNayili, ubommela elusentseni lwayo. Uboyiphatsa lendvuku leyagucuka yaba yinyoka.

¹⁶ Ubokhuluma kuye utsi: ‘Simakadze, Nkulunkulu wemaHebheru, ungitfume kuwe watsi ngibofike ngitsi: “Khulula sive sami sihambe, khona sitewungikhonta ehlane;” kodvwa kuze kube ngumanje usengakakwenti loko lengikutjela kona.

¹⁷ Utsi-ke Simakadze: “Loku lengitakwenta ngiko lokutakwenta wati kutsi nginguSimakadze.” Ngitawushaya lamanti emfula iNayili ngalendvuku lesesandleni sami, bese-ke onkhe lamanti ayagucuka aba yingati.

¹⁸ Tonkhe tinhlanti titakufa, bese lomfula unuka luvundze kangangobe emaGibhithe atakwehluleka ngisho nekunatsa emanti awo.’ ”

¹⁹ Simakadze wakhuluma kuMosi, watsi: “Khuluma ku-Aroni utsi: ‘Tsatsa indvuku yakho uyengamise yonkhe imifula, nemisele yayo, netitiba tayo, netitiba tekwakhiwa la eGibhithe. Lamanti atawugucuka abe yingati, lonkhe live laseGibhithe, ngisho nasetitjeni letentiwe ngetigodvo naletentiwe ngematje.’ ”

²⁰ BoMosi na-Aroni benta njengobe babeyalwe nguSimakadze. Aroni waphakamisa indvuku yakhe embikwaFaro netiphatsimandla takhe washaya emanti emfula iNayili. Onkhe emanti lakuyo agucuka aba yingati.

²¹ Tinhlanti temfula tafa, iNayili yanuka luvundze kangangekutsi emaGibhithe ehluleka kuwanatsa emanti ayo. Live lonkhe laseGibhithe lagcwala ingati.

²² Labalumbi baseGibhithe nabo bakwenta loko ngemilingo yabo. Ngako-ke inhlitiyo yaFaro yachubeka yaba lukhuni kakhulu, akazange akulalele loko babemtjela kona, kwaya njengobe Simakadze abeshito.

²³ Faro wancandzeka wabuyela esigodlweni sakhe; akazange akunake ngisho nakancane loko.

²⁴ Onkhe emaGibhithe agubha emanti elusentseni lwemfula iNayili, ngobe emanti ayo abengasanatseki.

²⁵ Kwendlula emalanga lasikhombisa Simakadze awashayile emanti emfula iNayili.