Eksodusi 25 - Siswati 1996 Bible

Kunikelela indzawo lengcwele

¹ Simakadze wakhuluma kuMosi, watsi:

² “Khuluma esiveni saka-Israyeli kutsi asingiletsele umnikelo, ukhishwe ngibo bonkhe bantfu labanenhlitiyo levumako, wena uwemukele egameni lami.

³ Leminikelo lotawuyemukela kufanele kube ngulena: yigolide, nesiliva, nelitfusi,

⁴ nensontfo leluhlata njengesibhakabhaka, nalebukhwebeletane, nalebovu ngalokutopele, nendvwangu yelineni lecolisakele, neboya bembuti,

⁵ netikhumba tetihhanca letishukiwe taguculwa taba bovu, netikhumba temahhashi aselwandle, netingodvo temgamba,

⁶ nemafutsa ekukhanyisa tibane, netinongo temafutsa ekugcobisa, netemphepho lenuka kamnandzi,

⁷ nematje e-oniksi, nalamanye ematje laligugu ekufakwa esidziyeni nasesembatfweni sesifuba semPhristi Lomkhulu.

⁸ Labantfu kufanele bangentele indlu lengcwele, khona ngitawuhlala emkhatsini wabo.

⁹ Nawakha lendlu lengcwele nato tonkhe timphahla tayo, ubokwenta konkhe ngendlela lengitakukhombisa yona.”

Libhokisi lesivumelwane

¹⁰ “Kufanele bangakhele libhokisi lesivumelwane ngemgamba: budze balo bube ngemasentimitha langaba li-110, bubanti bube ngemasentimitha langaba ngema-66, kuphakama kube ngemasentimitha langaba ngema-66.

¹¹ Ulembese ngegolide lecengekile ngekhatsi nangephandle; ulephetse ngegolide.

¹² Utakwakha emajiva egolide ekuletfwala lekufanele ashayelwe kulo etinyaweni talo, abe mane, abe mabili nganhlanye, nanganhlanye abe mabili.

¹³ Ubenta timboko tekuletfwala tibe temgamba, bese utembesa ngegolide.

¹⁴ Letimboko utifake ekhatsi kulamajiva lasetinhlangotsini talelibhokisi; tisetjentiswe ekwetfwaleni lelibhokisi.

¹⁵ Tiyawuhlala ekhatsi emajiveni alelibhokisi, tingakhishwa kulo.

¹⁶ Ekhatsi kwalelibhokisi ubofaka letibhelekeca tematje letimbili lengitakunika tona.

¹⁷ “Simbonyo salo lesisihlalo semusa, usente ngegolide lecengekile: budze baso bube ngemasentimitha langaba li-110, bubanti bube ngemasentimitha langaba ngema-66.

¹⁸ Uyawukwenta emakherubhi lamabili ngegolide legcotjiwe uwabetsele lelinye likherubhi libe ngala, lelinye libe ngale.

¹⁹ Yenta lelinye likherubhi libe ngale ngekugcineni kwesihlalo semusa, lelinye libe ngala ekugcineni, bese kuba yintfo yinye nesimbonyo.

²⁰ Lamakherubhi kufanele avule emaphiko awo engamele lesihlalo semusa abukane, abheke lesihlalo semusa.

²¹ Letibhelekeca tematje letimbili ubotifaka ekhatsi kulelibhokisi, bese ulimbonya ngalesihlalo semusa.

²² Ngitawuhlangana nawe lapho, ngikhulume nawe ngisetikwalesihlalo semusa emkhatsini walamakherubhi lamabili lasetikwelibhokisi. Ngulapho ngitakunika khona yonkhe imitsetfo yami yesive sema-Israyeli.”

Litafula lesinkhwa lesinikelwe kuNkulunkulu

²³ “Ubenta litafula ngemapulango emgamba: budze balo bube ngemasentimitha langaba ngema-88, bubanti bube ngemasentimitha langaba ngema-44, kuphakama kube ngemasentimitha langaba ngema-66.

²⁴ Ubolembesa ngegolide lecengekile, ulephetse ngegolide.

²⁵ Lapha emaceleni wakhe emaphetselo lanebubanti besandla, alitungelete ndzawo tonkhe, bese uwahlobisa ngelugebhezi lwegolide.

²⁶ Lelitafula ubolentela emajiva egolide lamane, lamajiva uwabophele emakoneni omane alemilente yalo.

²⁷ Lamajiva ekufaka letimboko tekwetfwala kufanele abesedvute nemaphetselo alelitafula.

²⁸ Uyakwenta timboko ngemgamba, utembese ngegolide, lelitafula liyakwetfwalwa ngato.

²⁹ Ubenta emapulede, netindzebe, nemajeke, netindishi temnikelo wewayini; tonkhe letintfo kufanele tentiwe ngegolide lecengekile.

³⁰ Etikwalelitafula kufanele ubeke sinkhwa lesinikelwe kimi, lekufanele sibesembikwami ngaso sonkhe sikhatsi.”

Lutsi lwetibane

³¹ “Yenta lutsi lwetibane ngegolide lecengekile; sibunu salo nesicu salo nako kwentiwe ngegolide legcotjiwe. Imihlobiso yalo ibe njengetimbali letisengimidvumba nalesetichakazile, ukwente kube sikhatsa sinye nalolutsi.

³² Kuboba nemagala lasitfupha esicwini salo, lamatsatfu abe nganhlanye, nalamatsatfu abe nganhlanye.

³³ Lelo nalelo gala kufanele libe nemihlobiso lemitsatfu lenesimo setimbali te-alimondi, letinye tibe nguletisengimidvumba, letinye tibe ngulesetichakazile.

³⁴ Lolutsi lwetibane kufanele lube nemihlobiso lemine leyentiwe yaba njengetimbali te-alimondi, letisengimidvumba nalesetichakazile.

³⁵ Ngako kusho kutsi kutawuba nalesengumdvumba ngaphansi kwemagala lamabili ekucala lesuka esicwini, kulandzele lenye lesengumdvumba ngaphansi kwemagala lamabili lalandzelako, kanjalo nakulawo lamabili ekugcina. Leto totintsatfu titawucondzana nalamagala lasitfupha.

³⁶ Letimbali letisengimidvumba, nalamagala, nelutsi lwesibane kufanele kube sikhatsa sinye segolide lecengekile legcotjiwe.

³⁷ Yenta tibane letisikhombisa kulesicu utimise titewukhanyisa ngembili kwalesicu.

³⁸ Tijubantsambo netitsebe talo utente ngegolide lecengekile.

³⁹ Ubosebentisa igolide lecengekile lengemakhilogremu langaba ngema-35, nawakha lolutsi lwetibane nako konkhe lokuhambisana nalo.

⁴⁰ Ucaphele kutsi letintfo utakha ngaleyo ndlela lengakukhombisa yona entsabeni.”