Eksodusi 12 - Siswati 1996 Bible

LiPhasika

¹ Simakadze wakhuluma kuMosi naku-Aroni baseseGibhithe, watsi:

² “Lenyanga kufanele ibe yinyanga yekucala emnyakeni wenu.

³ Yendlulisela lomlayeto esiveni sonkhe sema-Israyeli kutsi ngelilanga lelishumi kulenyanga, nguleyo naleyo ndvodza kufanele ikhetsele umndeni wayo lizinyane.

⁴ Nangabe umndeni umncane kakhulu kutsi ungeke ulicedze lelizinyane, ungalidla ndzawonye namakhelwane wawo, kuye ngebunyenti bebantfu balowo mndeni.

⁵ Lelizinyane lenu kufanele kube ngulelite sici, libe nemnyaka munye budzala; nilehlukanise nemhlambi wetimvu nome wetimbuti.

⁶ Niyawuligcina kuze kube lilanga leli-14 kuyo lenyanga kusihlwa, mhlazana sonkhe sive sema-Israyeli sitawahlaba lamazinyane.

⁷ Lengati ibobhocwa etinsikeni temnyango nangetulu kwawo kuleyondlu lekuyawube kudlelwa kuyo.

⁸ Kulobo busuku inyama ibokosiwa idliwe kanye nemibhidvo lebabako kanye nesinkhwa lesite imbiliso.

⁹ Lenyama ningayidli iluhlata nome iphekiwe, kodvwa niboyidla yosiwe yonkhe, kanye nenhloko yayo, nemilente yayo, nekwangekhatsi kwayo.

¹⁰ Lenyama niboyidla ningalishiyeli likusasa; nakukhona lesele, niboyishisa.

¹¹ Nibotsi niyidla, nibe tinkhalo tenu tiboshiwe, netinyawo tenu tiseticatfulweni, nendvuku ibe isesandleni; niyidle ngekushesha. Lelo-ke liPhasika lekudvumisa Simakadze.

¹² “Ngalobo busuku ngiyawuhamba ngidzabule emkhatsini welive laseGibhithe ngishaye onkhe ematubulo lamadvuna aseGibhithe ebantfu newetifuyo, ngehlulele tonkhe tithico taseGibhithe; nginguSimakadze!

¹³ Lengati iyawuba luphawu kini, kuletindlu lenitawube ningekhatsi kwato. Nangibona lengati, ngiyakwengca, lesishayo singeke sehlele kini nangijezisa emaGibhithe.

¹⁴ Lelilanga liyawuba sikhumbuto kini, niyawuligcina libe lilanga lemkhosi kuSimakadze. Tonkhe titukulwane tenu tiyawulenta libe lilanga lemkhosi kuze kube ngunini nanini.”

UMkhosi Wesinkhwa Lesingenambiliso

¹⁵ Simakadze wachubeka watsi: “Sinkhwa lesinembiliso ningabosidla kuze kuphele emalanga lasikhombisa; nibodla sinkhwa lesite imbiliso kuphela. Ngelilanga lekucala niboyisusa yonkhe imbiliso etindlini tenu, ngobe lotawudla lokufakwe imbiliso emkhatsini welilanga lekucala kuze kube lilanga lesikhombisa, utawuncunywa emkhatsini wesive sema-Israyeli.

¹⁶ Ngelilanga lekucala nangelilanga lesikhombisa niyawuba nemhlangano longcwele. Kufanele kubete lowenta umsebenti kulawo malanga, kodvwa ningakulungisa kudla lenitakudla.

¹⁷ LoMkhosi Wesinkhwa Lesingenambiliso niyawuhlala njalo niwenta, ngobe kungalo lelo langa lengakhipha ngalo tive tenu eGibhithe. Lelilanga niyawuligcina titukulwane ngetitukulwane. Kuyawuba nguwona msimeto wenu longeke uphele nome uguculwe.

¹⁸ Kusukela kusihlwa ngelilanga leli-14 lenyanga yekucala kuze kube kusihlwa ngelilanga lema-21 ningasidli sinkhwa lesinembiliso.

¹⁹ Kuyawuze kuphele emalanga lasikhombisa imbiliso ingatfolakali etindlini tenu; lowo loyawutfolakala kutsi udle lokufakwe imbiliso, uyawuncunywa esiveni sema-Israyeli, nome ngabe wekutalwa, nome ngabe wekuhamba kulelo live.

²⁰ Ningakudli lokufakwe imbiliso, yonkhe indzawo lapho nihlala khona nibodla sinkhwa lesite imbiliso.”

LiPhasika lekucala

²¹ Mosi wase ubita bonkhe baholi baka-Israyeli, wakhuluma kubo watsi: “Ngulowo nalowo mndeni awutikhetsele liwundlu ulihlabele liPhasika,

²² utsatse sitfungo sehisophu usenye engatini lesemgezelweni bese uyibhoca etinsikeni temnyango emaceleni nasetulu kwawo kuleyondlu lapho uhleti khona. Kufanele kungabikho muntfu lophumako kuleyondlu kuze kube ngusekuseni.

²³ Kutawutsi Simakadze nadzabula live, atewubulala emaGibhithe, abone ingati etinsikeni nasetulu eminyango yenu, bese uyendlula angayivumeli ingilosi yekufa kutsi ingene etindlini tenu inibulale.

²⁴ Lemiyalo niyawuyigcina nine netitukulwane tenu kuze kube nguphakadze naphakadze.

²⁵ Lomkhosi niyawuchubeka kuwenta nome seningenile eveni Simakadze laninika lona njengobe abetsembisile.

²⁶ Nangabe bantfwana benu banibuta batsi: ‘Niwentelani lomkhosi?’

²⁷ niyawubaphendvula nitsi: ‘Lona ngumhlatjelo weliPhasika wekudvumisa Simakadze, ngobe watengca tindlu tema-Israyeli eGibhithe, ngesikhatsi Simakadze abulala ematubulo emaGibhithe, tsine wasiphephisa.’ ” Ema-Israyeli aguca phansi akhotsama.

²⁸ Ahamba-ke ema-Israyeli ayawukwenta njengobe abeyalwe nguSimakadze ngaMosi na-Aroni.

Sishayo selishumi: Kufa kwematubulo

²⁹ Ekhatsi nebusuku Simakadze wabulala onkhe ematubulo eveni laseGibhithe: kusukela esigodlweni etubulweni laFaro lelaliyindlalifa yakhe, kuye etubulweni lesiboshwa lesisejele, nasematubulweni etifuyo.

³⁰ Kulobo busuku Faro, netiphatsimandla takhe, nemaGibhithe onkhe bavuka; kwaba nekukhala nekulila lokukhulu eveni lonkhe laseGibhithe, ngobe kute umuti lowawungenamuntfu lofile.

³¹ Ngabo lobo busuku Faro wabita boMosi na-Aroni; befika, watsi kubo: “Hambani la! Sukani emkhatsini webantfu bami, ngisho nine nawo onkhe ema-Israyeli. Hambani niyewukhonta Simakadze njengekucela kwenu.

³² Hambani nemihlambi yenu yetimvu, neyetimbuti, neyetinkhomo, nisuke nihambe la. Ningibusise nami.”

³³ EmaGibhithe akhutsalela kugcugcutela ema-Israyeli kutsi aphume eGibhithe ngekushesha, atsi: “Natsi sitakufa sonkhe, naningahambi nine.”

³⁴ Ngako bantfu bagcwalisa titja ngenhlama leyayite imbiliso batigocotela ngetimphahla tabo tekwembatsa batetjatsa emahlombe.

³⁵ Ema-Israyeli enta njengobe abeyalwe nguMosi, ngobe ase ayicelile imihlobiso yegolide, neyesiliva, kanye nekwekwembatsa.

³⁶ Simakadze wenta emaGibhithe kutsi atsambele ema-Israyeli ngekutsi awaphe konkhe labekucela. Ema-Israyeli awaphanga kanjalo-ke emaGibhithe.

Ema-Israyeli ayahamba eGibhithe

³⁷ Ema-Israyeli aphuma eRamsesi; ahamba aze efika eSukhothi. Emadvodza labekhona lapho ahamba ngetinyawo abengaba ti-600 000 ngaphandle kwebafati nebantfwana.

³⁸ Bahamba nenhlanganisela lenkhulu yebantfu betive ngetive, nemihlambi lemikhulu yetimbuti neyetimvu, kanye neyetinkhomo.

³⁹ Benta tinkhwa letite imbiliso ngenhlama lababesuke nayo eGibhithe, ngobe bakhishwa ngendluzula bangabe basasitfola nesikhatsi sekutilungiselela ingcamu imbala.

⁴⁰ Ema-Israyeli abesahlale eGibhithe iminyaka lengema-430.

⁴¹ Tonkhe letive tema-Israyeli taphuma eveni laseGibhithe mhlazana kuhlangana leminyaka lengema-430.

⁴² Kwakubusuku Simakadze lalindzela ngabo kuze abakhiphe eGibhithe; ngako-ke lobo busuku behlukaniselwa Simakadze kutsi ema-Israyeli onkhe alindzele ngabo titukulwane ngetitukulwane.

Leminye imitsetfo macondzana neliPhasika

⁴³ Simakadze wakhuluma kuMosi naku-Aroni, watsi: “Lena-ke ngimitsetfo lecondzene neliPhasika: Kufanele kubete wetive lolidlako;

⁴⁴ kodvwa sonkhe sigcili lesidvuna lenisitsengile singalidla, nangabe senisisokile.

⁴⁵ Kufanele kubete wekuhamba nome sisebenti lesicashiwe lesilidlako.

⁴⁶ Konkhe lokudla kweliPhasika kufanele kudliwe kuphelele kuleyondlu, kungaphunyelwa nako ngephandle; lingephulwa nome linye litsambo.

⁴⁷ Sonkhe sive sema-Israyeli kufanele siwugubhe loMkhosi.

⁴⁸ Nangabe kunewetive lowakhe emkhatsini wenu lofisa kuwugcina naye lomkhosi, kufanele bonkhe labadvuna labasendlini yakhe basokwe. Naye-ke angalidla, ngobe sewuyawutsatfwa njengewekutalwa. Longakasoki akufanele alidle leliPhasika.

⁴⁹ Niyawuba nemtsetfo munye nine ma-Israyeli ekutalwa nalabo labangumsinsi wekumbelwa labakhe emkhatsini wenu.”

⁵⁰ Onkhe ema-Israyeli akwenta konkhe loko labetjelwe kona nguSimakadze ngaboMosi na-Aroni.

⁵¹ Simakadze wawakhipha ngalo lelo langa ema-Israyeli eGibhithe ngetive tawo.