Eksodusi 10 - Siswati 1996 Bible

Sishayo sesiphohlongo: Sikhonyane

¹ Simakadze wakhuluma kuMosi, watsi: “Hamba uye kuFaro, ngobe ngiyente yaba lukhuni inhlitiyo yakhe neyetiphatsimandla takhe, kuze ngitekwenta letibonakaliso tami emkhatsini wabo,

² khona nitekwati kutjela bantfwabenu nebatukulu benu kutsi emaGibhithe ngake ngawenta tilima kanjani ngekwenta letibonakaliso tami emkhatsini wawo. Nonkhe niyawungati kutsi nginguSimakadze.”

³ Ngako-ke boMosi na-Aroni bahamba baya kuFaro, bafike kuye batsi: “Simakadze, longuNkulunkulu wemaHebheru, utsi: ‘Kutawuze kube ngunini seloku wala kutitfoba kimi? Khulula bantfu bami bahambe, khona batewungikhonta.

⁴ Nawuchubeka wala, ungabakhululi bantfu bami, ngitakuletsela sikhonyane la eveni lakho kusasa lolokusako.

⁵ Sitawuba sinyenti kangangekutsi sitawusibekela wonkhe umhlaba wakho, kungasabonakali nemhlabatsi. Sitawudla konkhe lokusindze esangcotfweni, ngisho netihlahla letisele tesiganga leticala kuhluma futsi.

⁶ Sitawugcwala etigodlweni takho, nasetindlini tetiphatsimandla takho, netebantfu bakho baseGibhithe. Ngisho nabokhokho bakho abazange basibone lesinje solomane befika kulelive kuze kube ngunyalo.’ ” Mosi waphuma kuFaro, wahamba.

⁷ Tiphatsimandla taFaro takhuluma kuye, tatsi: “Kutawuze kube ngunini lomuntfu aluhlupho? Khulula labantfu bahambe, bayewukhonta Simakadze longuNkulunkulu wabo. Awuboni yini kutsi lelive laseGibhithe liyabhubha?”

⁸ Ngako boMosi na-Aroni baphindze babuyiswa kuFaro, wakhuluma kubo, watsi: “Hambani niyewukhonta Simakadze longuNkulunkulu wenu. Kodvwa empeleni bobani laba lenitawuhamba nabo?”

⁹ Mosi wamphendvula watsi: “Sitawuhamba sonkhe: kutawuhamba labasha betfu nalabadzala betfu. Sitawuhamba nemadvodzana etfu, nemadvodzakati etfu, netimvu tetfu, netimbuti tetfu, netinkhomo tetfu; ngobe kufanele sibe nemkhosi wekudvumisa Simakadze.”

¹⁰ Faro wakhuluma kubo, watsi: “Ngifunga Simakadze ngitsi ngingeke nginikhulule kutsi nihambe nebafati nebantfwabenu! Kuyakhanya kutsi nine nenta lisu lebuphekula.

¹¹ Cha! Lokungenani akuhambe nine madvodza niyewukhonta loSimakadze wenu, ngobe empeleni nguloko lenikufunako.” Bakhishwa embikwaFaro.

¹² Simakadze wakhuluma kuMosi, watsi: “Phakamisa tandla takho etikwelive laseGibhithe uletse sikhonyane. Sitawufike sidle yonkhe intfo lemilako lesele kulesangcotfo.”

¹³ Ngako Mosi waphakamisa indvuku yakhe etikwelive laseGibhithe. Simakadze wakhulula umoya wasemphumalanga kutsi uphephetse eveni lonkhe lelo langa nebusuku balo. Kwatsi kusa, wabe sewusitselile sikhonyane.

¹⁴ Sefika silifu, sasibekela lonkhe live laseGibhithe. Sasingazange sesibe khona sikhonyane lesingaka, futsi sasingeyiwuphindza sibe khona.

¹⁵ Sasibekela wonkhe umhlaba, kwadzimate kwaba mnyama khwishi. Sadla konkhe lokwakusindze esangcotfweni; sadla tonkhe titselo tetihlahla. Kute lokuluhlata lokwasala etihlahleni nakuto tonkhe tilimo, eveni lonkhe laseGibhithe.

¹⁶ Faro washesha wabita boMosi na-Aroni, wafike watsi kubo: “Ngonile kuSimakadze, longuNkulunkulu wenu, ngona nakini.

¹⁷ Ngiyacela-ke nyalo kutsi ningitsetselele kube kanye nje; ningithandazele kuSimakadze longuNkulunkulu wenu, kutsi asisuse la kimi lesishayo lesibulalako.”

¹⁸ Mosi waphuma kuFaro wayawuncusa kuSimakadze.

¹⁹ Simakadze wagucula umoya wasemphumalanga, waba ngumoya lophuma enshonalanga. Lomoya waphephula lesikhonyane wasitsatsa wasilahlela eLwandle Lolubovu. Kute nome sinye sikhonyane lesasala eveni lonkhe laseGibhithe.

²⁰ Kodvwa Simakadze wenta inhlitiyo yaFaro yaba lukhuni, wangete wawakhulula ema-Israyeli kutsi ahambe.

Sishayo semfica: Bumnyama

²¹ Simakadze wakhuluma kuMosi, watsi: “Phakamisela sandla sakho etulu esibhakabhakeni, khona kutewuba nebumnyama lobutsintsekako eveni lonkhe laseGibhithe.”

²² Mosi waphakamisela sandla sakhe etulu esibhakabhakeni, kwaba nebumnyama lobulicinsi, lobasibekela lonkhe live laseGibhithe emalanga lamatsatfu.

²³ EmaGibhithe ehluleka kubonana, futsi kwabate umuntfu lowase waphuma lapho ahlala khona kulawo malanga lamatsatfu. Kodvwa ema-Israyeli abenekukhanya lapho abehleti khona.

²⁴ Faro wabita Mosi, wafike watsi kuye: “Hambani niyewukhonta Simakadze; nihambe nebafati benu nebantfwana benu. Intfo nje nishiye timvu, netimbuti, netinkhomo tenu.”

²⁵ Mosi waphendvula Faro watsi: “Kufanele usivumele sibe nemihlatjelo yekushiswa lesitayentela Simakadze, longuNkulunkulu wetfu.

²⁶ Cha, kufanele sihambe netifuyo tetfu; kute nome sinye sifuyo lesitawusala ngemuva. Phela kufanele sihambe naletifuyo siyewukhonta Simakadze, ngobe asati kutsi sitamkhonta ngatiphi, siyawukwati sesifike khona le.”

²⁷ Simakadze wenta inhlitiyo yaFaro yaba lukhuni, akazange abakhulule kutsi bahambe.

²⁸ Faro wakhuluma kuMosi watsi: “Suka la embikwami! Ngingaphindzi ngikubone futsi! Mhlazana ngakubona, kuyawuba kufa kwakho!”

²⁹ Mosi waphendvula watsi: “Ushito kahle. Awuseyiwuphindza ungibone futsi la embikwakho.”