Dutheronomi 15 - Siswati 1996 Bible

Umnyaka wesikhombisa

¹ “Ekupheleni kwayo yonkhe iminyaka lesikhombisa kufanele nitesule tikwelede talabo labanikweledako.

² Loku kuyakwentiwa kanje: Wonkhe umbolekisi kufanele asesule sikwelede umnakabo longum-Israyeli lanaso kuye. Angeke aphindze asihambele sikwelede sakhe kumnakabo longum-Israyeli, ngobe phela sikhatsi saSimakadze sekwesula tikwelede sesimenyetelwe.

³ Ungamhambela sikwelede umuntfu wetive, kodvwa kufanele ukwesule konkhe lokweledwa kona ngumnakenu.

⁴ “Noko akufanele kube nalomphofu emkhatsini wenu, ngobe kulelive Simakadze Nkulunkulu wenu lanipha lona kutsi nilidle libe lifa lenu utanibusisa kakhulu ngemcebo,

⁵ nangabe kambe nimlalela kuko konkhe Simakadze Nkulunkulu wenu, futsi ninakekela nilandzele yonkhe lemiyalo lengininika yona lamuhla.

⁶ Ngobe Simakadze Nkulunkulu wenu utanibusisa njengobe etsembisile, niyakwebolekisa etiveni letinyenti, kodvwa nine ningeke neboleke lutfo kunome ngukusinye sato. Niyawubusa tive letinyenti, kodvwa kute nome sinye lesiyakunibusa.

⁷ “Nangabe kukhona lomphofu emkhatsini webanakenu nome ngukuliphi lalamadolobha alelive Simakadze Nkulunkulu wenu lanipha lona, ningacali nibe nelunya nekwemana kumnakenu lomphofu.

⁸ Kepha nine niyakwephana nimeboleke ngekukhululeka nangesihle nome ngabe yini layidzingako.

⁹ Nicaphele kutsi ningawufukameli lomcabango lomubi lotsi: ‘Umnyaka wesikhombisa lekungumnyaka wekwesulwa kwetikwelede sewusondzele,’ nize nikhombise inhlitiyo lembi kumnakenu lonesidzingo ngekungamniki lutfo. Ngobe angahle akhale ngani kuSimakadze, bese-ke nine nitfolakala ninelicala lesono.

¹⁰ Mupheni ngaphandle kwenhlitiyo lebubulako nalenemagcubu; ngobe ngenca yaloko Simakadze Nkulunkulu wenu uyawunibusisa emsebentini wenu wonkhe nakuko konkhe lenikwenta ngetandla tenu.

¹¹ Bantfu labamphofu bayawuhlala bakhona njalo nje eveni. Ngako-ke ngiyaniyala ngitsi banini ngulabephanako kubomnakenu, nakulabamphofu, nalabeswele eveni lenu.”

Kuphatfwa kwetigcili

¹² “Nangabe umnakenu longumHebheru, indvodza nome umfati, atsengiswa kuwe, abotsi angakusebentela iminyaka lesitfupha, ngemnyaka wesikhombisa umkhulule ahambe.

¹³ Nawumkhulula ungacali umhambise yabayaba.

¹⁴ Muphe ngekukhululeka, umkhetsele emihlambini yakho, umkhiphele nasengungwini yekudla, kanye nasetjeni lakho lekuhluta liwayini. Uyawumupha ngangekubusiswa kwakho nguSimakadze Nkulunkulu wakho.

¹⁵ Khumbula kutsi nawe wake waba sigcili eGibhithe, Simakadze Nkulunkulu wakho wakuhlenga. Nguko nje ngikunika lomyalo lamuhla.

¹⁶ “Kodvwa nangabe lesigcili sakho sitsi kuwe: ‘Angifuni kusuka lapha kuwe,’ ngesizatfu sekutsi sitsandza wena kanye nemndeni wakho, futsi siphatseke kahle lapha kakho,

¹⁷ ubobe sewutsatsa lusungulo ubhobosele lihwandza lalendlebe yaso etikwesivalo; sesiyakuba sigcili sakho size sife. Uyakwenta njalo nakuso sigcilikati sakho.

¹⁸ Ungakutsatsi ngekutsi kuyintfo lematima kakhulu kukhulula sigcili sakho, ngobe kukusebentela kwaso kuleminyaka lesitfupha kulingana nalokuphindvwe kabili lebekungentiwa sisebenti lesicashiwe. Simakadze Nkulunkulu wakho uyakukubusisa kuko konkhe lokwentako.”

Ematubulo etilwane

¹⁹ “Simakadze Nkulunkulu wakho uyakumehlukanisela onkhe ematubulo lamadvuna etinkhomo netimvu kanye netimbuti. Ungawabopheli ematubulo etinkhomo takho futsi ungawahhuli ematubulo etimvu takho.

²⁰ Yonkhe iminyaka wena nemndeni wakho uyawutidlela embikwaSimakadze Nkulunkulu wakho kuleyo ndzawo leyawukhetfwa nguye.

²¹ Nangabe sifuyo sichwalile, sichuta nome siyimphumphutse, nome sinesiyela lesibi kabi, ungacali usente umhlatjelo kuSimakadze Nkulunkulu wakho.

²² Uyakusidlela edolobheni lakho. Bonkhe, labangcolile ngekwemtsetfo nalabahlantekile, bangasidla, kube shangatsi badla inswephe nome inyamatane.

²³ Kodvwa ungaboyidla ingati; uboyicitsa phansi emhlabatsini njengemanti.”