Dutheronomi 11 - Siswati 1996 Bible

Bukhulu baSimakadze

¹ “Niyawutsandza Simakadze Nkulunkulu wenu nente konkhe lafuna kutsi nikwente, nilalele timiso takhe, nemitsetfo yakhe kanye nemiyalo yakhe ngaso sonkhe sikhatsi.

² Khumbulani-ke lamuhla kutsi bekungini, hhayi bantfwabenu, labakubona nalabakuva kujeziswa nekucondziswa nguSimakadze Nkulunkulu wenu: bukhosi bakhe, nesandla sakhe lesinemandla kanye nengalo yakhe leyelulekile,

³ tibonakaliso latenta netintfo latenta ekhatsi esigodlweni saseGibhithe kuFaro, inkhosi yaseGibhithe, naseveni lakhe lonkhe;

⁴ kutsi wentani emabutfweni aseGibhithe, nasemahhashini awo, nasetincoleni tawo, ngekutsi akudvungulule ngemanti eLwandle Lolubovu ngesikhatsi emaGibhithe anicosha, aphela onkhe atsi nya.

⁵ Bekungini, hhayi bantfwabenu, lababona kutsi wanentelani ehlane naze nefika lapha,

⁶ nekutsi wentani kuboDathani na-Abiramu, emadvodzana a-Eliyabe, labengumRubeni, ngesikhatsi umhlaba ukhamisa, onkhe ema-Israyeli abuka, wabagwinya bona kanye nemindeni yabo, nemathende abo, nako konkhe lokuphefumulako lokwakungekwabo.

⁷ Kodvwa ngini lenatibonela ngewenu emehlo tonkhe tintfo letinkhulu letentiwa nguSimakadze.”

Tibusiso telive lesetsembiso

⁸ “Niboyigcina yonkhe imiyalo lengininika yona lamuhla, khona nitewucina nilidle lelive leningena kulo kutsi nitewulenta libe lenu,

⁹ nekutsi nitewuphila imphilo lendze kulelo live leligcwele lubisi neluju lwetinyosi, Simakadze lafunga ngalo kubokhokho benu kutsi utalinika bona kanye netitukulwane tabo.

¹⁰ Ngobe lelive leningena kulo kutsi nilidle libe lenu alifanani nelive laseGibhithe, lapho niphuma khona. Lapho nanihlanyela khona inhlanyelo yenu, bese ninisela ngemisele njengengadze yetibhidvo.

¹¹ Kodvwa lelive leningena kulo kuyawulidla live letintsaba netihosha temifula, yebo, live lelinemvula.

¹² Leli live Simakadze Nkulunkulu wenu lalinakekelako; emehlo aSimakadze Nkulunkulu wenu akesuki kulo, kusukela ekucaleni kwemnyaka kuze kube ngusekupheleni kwawo.

¹³ “Nangabe niyayilalela imiyalo lengininika yona lamuhla, nitsandze Simakadze Nkulunkulu wenu, nimkhonte ngayo yonkhe inhlitiyo yenu, nangawo wonkhe umphefumulo wenu,

¹⁴ uyawunipha imvula eveni lenu ngesikhatsi sayo, imvula yekucala neyekugcina, kuze nibutse kahle kudla kwenu, neliwayini lenu, kanye nemafutsa enu.

¹⁵ Uyawuhlumisa tjani emadlelweni enu, kuze tinkhomo tenu titewudla kahle, nani niyawudla nesutse.

¹⁶ “Caphelani-ke kutsi tinhlitiyo tenu tingayengeki bese niyaphambuka nikhonte labanye bonkulunkulu nikhotsamele bona.

¹⁷ Ngobe lulaka lwaSimakadze luyawunivutsela, avale emazulu kuze kungabikho mvula lenako, nemhlaba ubete sitselo, nani nibhubhe niphele kulelo live lelihle Simakadze lanipha lona.

¹⁸ “Lamavi ami niyakuwagcina etinhlitiyweni tenu, niwanamatselise nasetingcondvweni tenu, niyakuwabophela abe luphawu etandleni tenu, abe ngimihlobiso yemabunti enu.

¹⁹ Niyakuwafundzisa bantfwabenu nikhulume ngawo nanihleti emakhaya, nome nihamba endleleni, nome nilala, nome nivuka.

²⁰ Wabhaleni etinsikeni teminyango yetindlu tenu nasemasangweni enu,

²¹ khona kutawutsi emalanga enu newebantfwana benu atewuba madze kulelo live Simakadze lafunga ngalo kubokhokho benu kutsi uyawubanika lona, yingci sibhakabhaka nasisengetulu kwemhlaba.

²² “Nangabe ninakekela kahle yonkhe lemiyalo lengininika yona, ngekutsi nitsandze Simakadze Nkulunkulu wenu, nihambe etindleleni takhe tonkhe, nibambelele kuye,

²³ Simakadze utatikhipha aticoshe tonkhe letive letisembikwenu, nilidle nalelo live lelinetive letinkhulu naletinemandla kunani.

²⁴ Yonkhe indzawo lapho niyawunyatsela khona iyawuba live lenu: Kusukela ehlane kuze kube nguseLebanoni, nekusuka emfuleni iYufrathe kuze kube nguseLwandle Lwasenshonalanga.

²⁵ Kute umuntfu loyawuba nemandla ekumelana nani. Simakadze Nkulunkulu wenu uyakwenta bantfu batfutfumele ngani banesabe eveni lonkhe leniyawunyatsela kulo, njengobe anetsembisa.

²⁶ “Bukani la, ngibeka embikwenu sibusiso nesicalekiso.

²⁷ Kuyawuba sibusiso kini, naniyilalela imiyalo yaSimakadze Nkulunkulu wenu lengininika yona lamuhla.

²⁸ Kuyawuba sicalekiso kini, naningayilaleli imiyalo yaSimakadze Nkulunkulu wenu, niphindze niphambuke endleleni lenginiyale ngayo lamuhla, bese nilandzela labanye bonkulunkulu leningazange senibati.

²⁹ Ngesikhatsi Simakadze Nkulunkulu wenu aniletsa kulelive leningena kulo kutsi nitewulidla, tibusiso niyawutimemetela eNtsabeni iGerizimu, ticalekiso nitimemetele eNtsabeni i-Ebhali.

³⁰ Letintsaba leti tingesheya kweJordane ngasenshonalanga kwemgwaco loya lapho kushona ngakhona lilanga, eceleni kwetihlahla letikhulu taseMore, eveni lalawo maKhenani labehlala e-Arabha esigodzini saseGilgali.

³¹ Senitayewela iJordane nitewudla lelive Simakadze Nkulunkulu wenu lanipha lona. Niyawutsi ningalidla nasenihleti kulo,

³² nicaphele kutsi nitigcina tonkhe timiso nemitsetfo lengiyibeka lapha embikwenu lamuhla.”