2 Samuweli 9 - Siswati 1996 Bible

Davide naMefiboshethi

¹ Ngalelinye lilanga Davide wabuta watsi: “Sekwabate ngisho namunye yini loyinsali yendlu yakaSawula lengingamentela umusa ngenca yaJonathani?”

² Kwakukhona sisebenti sasendlini yakaSawula lekwakutsiwa nguSiba, libito laso. Ngako bambita kutsi avele embikwaDavide, inkhosi. Davide wafike watsi kuye: “Nguwe yini Siba?” Yena waphendvula watsi: “Ngiyinceku yakho.”

³ Inkhosi yabuta yatsi: “Sekwabate ngisho namunye yini wendlu yakaSawula lengingamentela umusa waNkulunkulu?” Siba waphendvula inkhosi watsi: “Isekhona indvodzana yaJonathani; mane nje yachwala tinyawo totimbili.”

⁴ Inkhosi yabuta yatsi: “Iphi?” Siba watsi: “Isendlini kaMakhire, umsa wa-Amiyeli, eLo Dabari.”

⁵ Ngako inkhosi Davide, yatsi ayilandvwe endlini kaMakhire, umsa wa-Amiyeli, eLo Dabari.

⁶ Watsi Mefiboshethi, umsa waJonathani, lotalwa nguSawula, nefika kuDavide, wakhotsama, akhombisa kumhlonipha. Davide watsi: “Mefiboshethi!” Mefiboshethi watsi: “Ngiyinceku yakho.”

⁷ Davide watsi: “Ungesabi, ngobe ngempela ngitakwentela umusa ngenca yeyihlo Jonathani. Ngitalibuyisela kuwe lonkhe lelo live lelalilamkhulu wakho Sawula, wena-ke utabodla nami njalo nje etafuleni lami.”

⁸ Mefiboshethi wakhotsama, watsi: “Iyini inceku yakho, kutsi ungaze unakekele inja lefile njengami?”

⁹ Ngako inkhosi yase ibita Siba, sisebenti sakaSawula, yatsi kuye: “Senginike umntfwanemntfwanenkhosi yakho konkhe loko bekukwaSawula kanye nekwendlu yakhe.

¹⁰ Wena-ke kanye nemadvodzana akho netisebenti takho kufanele nilime lomhlaba wakhe niletse tivuno, kuze lomntfwanemntfwanenkhosi yakho angetiwulamba. Mefiboshethi-ke, umntfwanemntfwanenkhosi yakho, yena utabodla kanye nami etafuleni lami onkhe emalanga.” Siba abesanemadvodzana lali-15 kanye netisebenti letingema-20.

¹¹ Siba wakhuluma enkhosini, watsi: “Inceku yakho itakwenta konkhe loko lokushiwo yinkhosi yami, inkhosi, kutsi inceku ikwente.” Ngako-ke Mefiboshethi abesadla etafuleni laDavide kanye naye njengalomunye wemadvodzana enkhosi Davide.

¹² Mefiboshethi-ke abenendvodzana yakhe leyayiseyincane, libito layo kunguMikha; bonkhe bendlu yaSiba bebatisebenti taMefiboshethi.

¹³ Mefiboshethi-ke abesahlala eJerusalema, ngobe abesadla nenkhosi etafuleni layo njalo nje. Abechwale tinyawo totimbili.