2 Samuweli 6 - Siswati 1996 Bible

Kuletfwa kwelibhokisi lesivumelwane eJerusalema

¹ Davide waphindze wabutsela ndzawonye emadvodza elikhetselo aka-Israyeli, labeti-30 000 asawonkhe.

² Davide kanye nawo onkhe lamadvodza labewabutsile bashuca besuka eBhala lakaJuda kuyakwenyusa libhokisi lesivumelwane saSimakadze khona, lelalibitwa ngeLibito, libito laSimakadze longuSomandla, lobusela esihlalweni sebukhosi asemkhatsini wemakherubhi lasetikwelibhokisi lesivumelwane.

³ Bekhweta libhokisi lesivumelwane saNkulunkulu encoleni lensha, balikhipha endlini yaka-Abinadabi, leyayisetulu entsatjananeni. Bo-Uza na-Ahiyo, emadvodzana a-Abinadabi, babeshayela lencola lensha,

⁴ leyayetfwele libhokisi lesivumelwane saNkulunkulu; Ahiyo yena abelihambela embili.

⁵ Davide kanye nayo yonkhe indlu yaka-Israyeli babejabula bagidza ngawo onkhe emandla abo embikwaSimakadze bamdvumisa ngetingoma, nangemahabhu, nangemalire, nangemafahlawane, nangetikhelekehle, nangabokhencekhence.

⁶ Batsi nabefika ebaleni lekubhulela lakaNakhoni, letinkhabi takhubatela, ngako Uza welula sandla, wabamba libhokisi lesivumelwane saNkulunkulu.

⁷ Lulaka lwaSimakadze lwamvutsela Uza, ngenca yesento sakhe sekungahloniphi. Ngako Nkulunkulu wamshaya, wafa, wafela khona lapho eceleni kwelibhokisi lesivumelwane saNkulunkulu.

⁸ Davide wase uyatfukutsela, ngobe lulaka lwaSimakadze lwalwehlele etikwa-Uza. Kuze kube ngulamhla loku leyo ndzawo seyabitwa ngekutsi yiPheresi Uza.

⁹ Ngalelo langa Davide wesaba Simakadze, wadzimate watsi: “Lingeta kanjani-ke libhokisi lesivumelwane kami?”

¹⁰ Ngako wangabe asavuma kulitsatsa ahambe nalo aye eJerusalema, Lidolobha laDavide. Wabe sewuyaphambuka, walimikisa ekhaya ka-Obedi Edomu, waseGathi.

¹¹ Libhokisi lesivumelwane saSimakadze lahlala ekhaya ka-Obedi Edomu, waseGathi, tinyanga letintsatfu; Simakadze wambusisa Obedi Edomu kanye nayo yonkhe indlu yakhe.

¹² Inkhosi Davide bayitjela batsi: “Simakadze sewuyibusisile indlu yaka-Obedi Edomu, kanye nako konkhe kwakakhe ngenca yelibhokisi lesivumelwane saSimakadze.” Ngako Davide wase uyehla uyawulandza libhokisi lesivumelwane saNkulunkulu ekhaya ka-Obedi Edomu, weta nalo, waliletsa eJerusalema, Lidolobha laDavide, ahamba ajabula.

¹³ Kwatsi laba lababetfwele lelibhokisi lesivumelwane nase batsetse tinyatselo letisitfupha, wase unikela ngemhlatjelo wenkunzi nangelitfokati lelikhuluphele.

¹⁴ Davide abembetse sidziya sebaphristi lesasentiwe ngelineni, wagidza embikwaSimakadze ngawo onkhe emandla akhe ajabulile,

¹⁵ ngesikhatsi yena kanye nayo yonkhe indlu yema-Israyeli beta nelibhokisi lesivumelwane saSimakadze badvumisa ngekuhlabela nangekushaya emacilongo.

¹⁶ Latsi libhokisi lesivumelwane saSimakadze nalingena eDolobheni laDavide, Mikhali, indvodzakati yaSawula, wabukela, avele ngelifasitelo. Watsi nakabona inkhosi Davide igiya igcabashula embikwaSimakadze, wayedzelela enhlitiyweni yakhe.

¹⁷ Libhokisi laSimakadze baliletsa balibeka endzaweni yalo ekhatsi ethendeni Davide labelakhele lona, Davide wenta umhlatjelo wekushiswa kanye neminikelo yebudlelwane embikwaSimakadze.

¹⁸ Watsi nase acedzile kwenta iminikelo yekushiswa neminikelo yebudlelwane, wase ubusisa sive egameni laSimakadze longuSomandla.

¹⁹ Wase uniketa wonkhe umuntfu labekhona kuleso sicuku umkhama wesinkhwa, nelicebelengwane lemasundvu kanye nelemagelebisi lomisiwe, onkhe ema-Israyeli, labadvuna nalabasikati. Bonkhe bantfu bacitseka babuyela emakhaya abo.

²⁰ Watsi Davide nasabuyele ekhaya lakhe kuyawubusisa indlu yakakhe, wahlangatjetwa nguMikhali, indvodzakati yaSawula, wafike watsi: “Inkhosi yema-Israyeli itentele ligama lelikhulu lamuhla, itivete njengalesikhulu silima emehlweni aletidzandzane tetindvuna tayo!”

²¹ Davide wamphendvula watsi: “Bengigcabashula embikwaSimakadze lona lowakhetsa mine kuneyihlo, nakubo bonkhe bantfu basendlini kakhe, mzukwane angigcoba kutsi ngibe ngumholi etikwesive saSimakadze, ema-Israyeli. Ngisetawugiya embikwaSimakadze.

²² Ngisetakwehla kakhulu kunaloku, futsi ngitakwedzeleleka kakhulu emehlweni ami. Kodvwa-ke kuletigcili letitintfombi lokhuluma ngato ngitawuhlonipheka.”

²³ Mikhali, indvodzakati yaSawula, akazange abe namntfwana, kwaze kwaba lilanga lakhe lekufa.