2 Samuweli 4 - Siswati 1996 Bible

Kubulawa kwa-Ishboshethi

¹ Watsi kube Ishboshethi, umsa waSawula, eve kutsi Abneri ufele eHebroni, wesaba kakhulu, sonkhe sive sema-Israyeli setfuka.

² Indvodzana yaSawula yayinemadvodza lamabili labebaholi betidlova tekuhlasela. Lomunye bekunguBhana, lomunye kunguRekhabi; babengemadvodzana eRimoni, umBherothi, wesive sakaBhenjamini. IBherothi itsatfwa njengencenye yakaBhenjamini,

³ ngobe sive saseBherothi sabaleka saya kuyakwakha eGithayimu; seloku sahlala khona lapho njengebafokatana kuze kube ngulamuhla.

⁴ Jonathani, umsa waSawula, abenendvodzana leyayichwalile etinyaweni. Yayineminyaka lesihlanu, nakufika umbiko wekufa kwaSawula naJonathani eJezreyeli. Umzanyana wakhe wamtsatsa wammema, wabaleka naye; kodvwa watsi asabhudvuteliswa kubaleka, lendvodzana yawa, yabe seyiba sishosha. Libito layo bekunguMefiboshethi.

⁵ BoRekhabi naBhana, emadvodzana aRimoni, umBherothi, bahamba baya endlini ya-Ishboshethi, befika emini selishisa, naye asecambalele kwasemini.

⁶ Bangena ngekhatsi endlini, kwaba shangatsi bayawufuna kolo, bafike bamgwaza esiswini, wafa. BoRekhabi naBhana, umnakabo, besuka lapho babaleka.

⁷ Babengene endlini ngesikhatsi asalele embhedzeni, ekamelweni lakhe lekulala. Batsi kube bamgwaze bambulale, base bancuma inhloko yakhe. Bayitsatsa bahamba nayo bonkhe busuku ngendlela yase-Arabha.

⁸ Lenhloko ya-Ishboshethi bayimikisa kuDavide eHebroni, bafike kuye, batsi: “Nansi inhloko ya-Ishboshethi, umsa waSawula, sitsa sakho labetama kukubulala. Lamuhla Simakadze sewukhokhele inkhosi yami sibhongo kuSawula nentalelwane yakhe.”

⁹ Davide waphendvula boRekhabi naBhana, umnakabo, emadvodzana aRimoni, umBherothi, watsi: “Ngifunga kuphila kwaSimakadze longikhulule kuko konkhe kuhlupheka,

¹⁰ yatsi indvodza nayingitjela itsi: ‘Sawula ufile,’ yona icabanga kutsi ingiletsele tindzaba letimnandzi, ngayibamba ngayibulalela eSikilagi. Lowo kwaba ngumholo nemvuzo lengamnika wona ngaleto tindzaba takhe!

¹¹ Kubi kakhulu kanganani-ke kulabantfu lababi kangaka lababulele umuntfu longenacala, endlini yakhe atilalele embhedzeni wakhe. Mine ngitamkhiphela sibhongo kini ngekunibulala, nginitsanyele emhlabeni!”

¹² Ngako Davide wakhipha umlayeto wawucondzisa kulamadvodza akakhe, ababulala. Bajuba tandla tabo netinyawo tabo, tidvumbu tabo batilengisa ngasesitibeni saseHebroni. Kodvwa batsatsa inhloko ya-Ishboshethi bayingcwaba ethuneni la-Abneri, eHebroni.