2 Samuweli 2 - Siswati 1996 Bible

Kubekwa kwaDavide kuba yinkhosi yakaJuda

¹ Emvakwesikhatsi Davide wabuta kuSimakadze, watsi: “Kufanele yini ngenyuke kuyawutsatsa lelinye lalamadolobha akaJuda?” Simakadze watsi: “Yenyuka.” Davide wabuta watsi: “Kufanele ngiye kuphi?” Simakadze wamphendvula watsi: “EHebroni.”

² Ngako Davide wenyuka kanye nebafati bakhe lababili, bo-Ahinowami waseJezreyeli kanye na-Abigayili, umfelokati waNabali waseKhameli.

³ Davide wahamba kanye nalamadvodza labemsingatsile, nguleyo naleyo inemndeni wayo; bafike bakha emadolobhaneni aseHebroni.

⁴ Emadvodza akaJuda eta eHebroni, afike amgcobela lapho Davide kutsi abe yinkhosi etikwendlu yakaJuda. Watsi kube Davide eve kutsi emadvodza aseJabeshi Gileyadi ngiwo labengcwabe Sawula,

⁵ watfumela titfunywa kulawo madvodza aseJabeshi Gileyadi, tafike tatsi: “Simakadze akanibusise ngekukhombisa umusa wenu ngekungcwaba Sawula, inkhosi yenu.

⁶ Shangatsi Simakadze manje anganiphatsa ngemusa nangekwetsembeka, nami futsi ngitaniphatsa ngalowo musa, njengobe nani nentile.

⁷ Manje-ke, cinani nibe nesibindzi, ngobe Sawula, inkhosi yenu, sewufile, kodvwa indlu yakaJuda seyigcobe mine kutsi ngibe yinkhosi etikwayo.”

Kubekwa kwa-Ishboshethi, inkhosi yaka-Israyeli

⁸ Ngaso leso sikhatsi Abneri, umsa waNeri, labeyindvuna yemphi yaSawula abesatsetse Ishboshethi, umsa waSawula, wamletsa eMahanayimu.

⁹ Wafike wambeka inkhosi yakaGileyadi, neyaka-Asheri, neyaseJezreyeli, neyaka-Efrayimu, neyakaBhenjamini, naku-Israyeli wonkhe.

¹⁰ Ishboshethi, umsa waSawula, abesaneminyaka lengema-40, nakabekwa kuba yinkhosi etikwa-Israyeli; wabusa iminyaka lemibili. Kodvwa indlu yakaJuda yona yalandzela Davide.

¹¹ Davide waba yinkhosi eHebroni etikwaJuda iminyaka lesikhombisa netinyanga letisitfupha.

Kulwa kwa-Israyeli naJuda

¹² Abneri, umsa waNeri, kanye nemadvodza labelandzela Ishboshethi, umsa waSawula, besuka eMahanayimu baya eGibeyoni.

¹³ Jowabe, umsa waSeruya, kanye nemadvodza akaDavide bahamba bahlangana nabo esitibeni saseGibeyoni. Lelinye licembu lahlala ngalapha kwalesitiba, kwatsi leli lelinye lahlala ngale kwaso, abukana.

¹⁴ Abneri wakhuluma kuJowabe, watsi: “Ake sivulele lamajaha alwe, embikwetfu sibuka.” Jowabe watsi: “Kulungile, ase balwe.”

¹⁵ Ngako asukuma abalwa, kwaba ngemadvodza lali-12 akaBhenjamini na-Ishboshethi, umsa waSawula, kwatsi lali-12 aba ngakaDavide.

¹⁶ Lelo nalelo jaha labamba lelo lelicondzene nalo ngenhloko laligwaza ngenkemba emhlubulweni, awa phansi kanyekanye. Ngako lendzawo yaseGibeyoni yetsiwa libito kwatsiwa yiHelkathi Hasurimu.

¹⁷ Ngalelo langa imphi yayesabeka kakhulu, Abneri nemadvodza aka-Israyeli behlulwa ngemadvodza akaDavide.

¹⁸ Emadvodzana aSeruya lamatsatfu abelapho, boJowabe na-Abishayi kanye na-Asaheli. Asaheli abegijimisa kwenyamatane yesiganga.

¹⁹ Wacosha Abneri, wacondzana naye; abengajikeli ngesekudla nome ngesancele, asamcosha.

²⁰ Abneri wabuka emvakwakhe, wabuta watsi: “Asaheli, nguwe yini lowo?” Waphendvula watsi: “Ngimi.”

²¹ Abneri wakhuluma kuye watsi: “Phambukela ngasesandleni sekudla nome sesancele ucondzane nalelinye lalamajaha ulemuke letikhali talo.” Kodvwa Asaheli akazange ayekele kumcosha.

²² Waphindza futsi Abneri wecwayisa Asaheli, watsi: “Yekela kungicosha ngemuva! Ungiphocelelelani kutsi ngikugwaze? Ngingambukelwa ngubani umnakenu, Jowabe?”

²³ Kodvwa Asaheli akayekelanga kumcosha ngemuva; ngako Abneri wagucuka wamgwaza ngesikhali sakhe esiswini, saze saphumela ngemuva. Wawela phansi, wafa khona lapho. Bonkhe babefike beme lapho Asaheli abewele khona, wafa.

²⁴ Kodvwa Jowabe na-Abishayi bachubeka bacosha Abneri; latsi lilanga nalishona, befika egcumeni lase-Ama, edvute naGiya, endleleni leya emacwacwasini aseGibeyoni.

²⁵ Ngako emadvodza akaBhenjamini abutsana ndzawonye emvakwa-Abneri. Aba sicumbi, abese ema esicongweni seligcuma.

²⁶ Abneri wamemeta Jowabe, watsi: “Kufanele sichubeke nekulwa siphelane yini? Awuboni ngani kutsi loku kuyawugcina sekumunyu? Lamadvodza akakho utawatjela nini kutsi akakuyekele lokucosha bomnakabo ngemuva?”

²⁷ Jowabe waphendvula watsi: “Ngifunga kuphila kwaNkulunkulu, ngitsi kube awukakhulumi, lamadvodza akami abetawuchubeka nekunicosha, kuze kube ngukusasa ekuseni.”

²⁸ Ngako Jowabe washaya licilongo lakhe, onkhe emadvodza ema. Akazange achubeke nekuwacosha lamadvodza aka-Israyeli, kantsi futsi akazange aphindze alwe nawo.

²⁹ Kubo bonkhe lobo busuku Abneri nemadvodza akakhe bashuca badzabula sihosha saseJordane, i-Arabha. Bewela iJordane, badzabula iBhithroni ekhatsi, baye befika eMahanayimu.

³⁰ Jowabe wabuya ekucosheni Abneri, wahlanganisa onkhe emadvodza akakhe. Ngaphandle kwa-Asaheli, kwatfolakala kutsi emadvodza akaDavide lali-19 abesanyamalele.

³¹ Kodvwa emadvodza akaDavide abebulele bakaBhenjamini labangema-360 labebahamba na-Abneri.

³² BoJowabe batsatsa Asaheli bamngcwaba ethuneni leyise eBhetlehema. Base bashuca busuku bonkhe, befika eHebroni nakudzabuka kusa.