2 kuThimothi 4 - Siswati 1996 Bible

Thimothi uyalwa kutsi acine

¹ Ngiyakuyala embikwaNkulunkulu naKhristu Jesu, lotakwehlulela labaphilako nalabafile, ngikuyalisisa ngekubonakala kwakhe nembuso wakhe, ngitsi:

² Shumayela livi, ulimele nome tikhatsi tivuma nome tingavumi; sola, ucwayise, uyale ngako konkhe kubeketela nekufundzisa.

³ Ngobe siyeta sikhatsi lapho bangeyiwuyemukela imfundziso lephilile; kodvwa ngekwenkhanuko yabo bayawutibutsela bafundzisi babo, bafundziswe loko labatsandza kufundziswa kona.

⁴ Bayawufulatselisa tindlebe tabo ecinisweni baphambukele etinganekwaneni.

⁵ Kodvwa wena, zitsa etintfweni tonkhe, ubeketele ekuhluphekeni, wente umsebenti webuvangeli, utifeze tonkhe timfanelo telubito lwakho.

Pawula usibonelo

⁶ Mine sengiyanikelwa; sesifikile sikhatsi sami.

⁷ Ngikulwile kulwa lokuhle, sengiyicedzile indzima yami, ngibambelele ekukholweni.

⁸ Manje sengihlalelwe kutfola umchele wekulunga, lengibekelwe wona yiNkhosi, uMehluleli lolungile. INkhosi iyawunginika lowo mchele ngalelo langa, hhayi mine kuphela kodvwa bonkhe labetsabele kubuya kwayo.

Thimothi ucelwa kutsi efike kuPawula

⁹ Shesha ufike la kimi masinyane.

¹⁰ Demasi sewungibalekele waya eThesalonika, ngenca yekutsandza lelive. Khresensi waya eGalathiya, Thithusi waya eDalmathiya;

¹¹ nguLukha kuphela lenginaye la. Ubota naMakho, ngobe ulusito kimi emsebentini.

¹² Thikhikhusi ngimtfumele e-Efesu.

¹³ Ubota nalelo jazi lami lengalishiya kuKhaphusi eThrowasi, kanye naleto tincwadzi, ikakhulu leti tesikhumba.

¹⁴ Alekzanda, umkhandzi welitfusi, wenta tintfo letinyenti letimbi kimi, iNkhosi iyawungenanela kuye.

¹⁵ Mkhweshele nawe, ngobe wamelana kakhulu nemfundziso yetfu.

¹⁶ Ekutiphendvuleleni kwami kwekucala kute ngisho namunye lowangimela, bonkhe bangilahla. Abangabekelwa sono!

¹⁷ Kodvwa iNkhosi yema nami yangicinisa kuze inshumayelo yami ipheleliselwe ngami, nebetive beve. Ngako-ke ngakhululwa emlonyeni welibhubesi.

¹⁸ INkhosi iyawungikhulula kuyo yonkhe imisebenti lemibi, ingisindzise, ngize ngifike embusweni wayo wasezulwini. Akube kuyo bukhosi phakadze naphakadze. Amen.

Siphetfo

¹⁹ Hambisa boPhrisila na-Akhwila kanye nebaka-Onesiforusi.

²⁰ Erastusi wasala eKhorinte; Trofimusi ngamshiya agula eMilethusi.

²¹ Shesha ute la bungakefiki busika. Bayakuhambisa bo-Ebulusi, naPhudensi, naLinusi, naKlawudiya kanye nabo bonkhe bazalwane.

²² INkhosi ayibe nemoya wakho. Umusa awube nani.