1 yaPhetro 3 - Siswati 1996 Bible

Bafati nemadvodza abo

¹ Ngalokufananako-ke, nani bafati, tfobelani emadvodza enu, kuze kutsi nakukhona emadvodza langalikholwa livi, nawo azuzeke ngaphandle kwenkhulumo, azuzwe yintfobeko yebafati bawo,

² nakabona similo senu lesimsulwa lesinekwesaba Nkulunkulu.

³ Kuhloba kwenu kungabi kwekubukisa ngemichino, nangekugaba, nangekufaka imihlobohlobo yegolide, nome-ke ngekugcoka.

⁴ Kodvwa akube kuhloba kwemuntfu longekhatsi, lohloba ngalokungabhubhi kwemoya lomnene nalonekuthula, lokuligugu lelimcoka emehlweni aNkulunkulu.

⁵ Babetihlobisa kanjalo-ke bafati bakadzeni labangcwele lababetsembela kuNkulunkulu, babewatfobela emadvodza abo.

⁶ Abenta njalo-ke naSara, ahlonipha Abrahama, ambita ngekutsi “yinkhosi” yakhe, lese naba bakhe nanenta lokulungile, ningesatjiswa lutfo.

⁷ Ngalokufananako nani, madvodza, hlalisanani kahle nebafati benu, nati kutsi umuntfu lomsikati unjengesitja lesibutsakatsaka; nibahloniphe, ngobe batindlalifa temusa wekuphila kanye nani; loku nikwente, khona ingetiwuvimbeleka imithandazo yenu.

Kuhlupheka ngekwenta lokuhle

⁸ Kwekugcina-ke, hawukelanani, nibe munye nonkhe, nitsandzane ngebuzalwane, nibe nebubele nekutfobeka.

⁹ Ningaphindziseli lokubi ngalokubi, nome inhlamba ngenhlamba; kodvwa esikhundleni saloko busisani, ngobe nabitelwa loko kutsi nidle lifa lekubusiswa.

¹⁰ Ngobe umBhalo utsi: “Lowo lotsandza kuphila nekubona emalanga lamahle, akabambe lulwimi lwakhe kulokubi, nemlomo wakhe ekukhulumeni inkhohliso.

¹¹ Akakhweshe kulokubi ente lokulungile; akajonge kuthula ngemandla akhe onkhe.

¹² Ngobe emehlo eNkhosi ayababona labalungile, netindlebe teNkhosi tiyayiva imithandazo yabo. Kodvwa iNkhosi iyemelana nalabo labenta lokubi.”

¹³ Pho, ngubani longahle anilimate nangabe ninenshisekelo yekwenta lokulungile?

¹⁴ Kepha nangabe nihlushwa ngenca yekwenta lokulungile, nibusisiwe. Ningesabi muntfu, ningakhatsateki.

¹⁵ Kepha mngcweliseni Khristu abe yiNkhosi etinhlitiyweni tenu, nimhloniphe, nihlale nilungele kubaphendvula bonkhe labanibuta ngelitsemba lelikini.

¹⁶ Loku nikwente ngebumnene nangekuhlonipha, nibe nanembeza lomsulwa, kuze kutsi kuloko labanihleba ngako bajabhiswe labo labetfuka kuhamba kwenu lokuhle kuKhristu.

¹⁷ Ngobe kuncono kuhlupheka ngekwenta lokuhle, nakuyintsandvo yaNkulunkulu, kunekuhlupheka ngekwenta lokubi.

¹⁸ Khristu wafela tono tetfu, kwaba kanye, kwenela. Yena lolungile wafela labangakalungi, kuze animikise kuNkulunkulu. Wabulawa ngekwemtimba, kepha wavuswa ngaMoya waNkulunkulu.

¹⁹ Wahamba ngaye loMoya wayawushumayela imiphefumulo yalabasekuboshweni.

²⁰ Labo-ke ngulabo lekwatsi endvulo bala kulalela Nkulunkulu ngesikhatsi Nkulunkulu abalindzele ngekubeketela ngemalanga ekwakhiwa kwemkhumbi waNowa. Bantfu labambalwa, lababesiphohlongo, bangena kulomkhumbi basindza emantini.

²¹ Emanti wona emele umbhabhatiso. Umbhabhatiso awusiwo wekususa insila yemtimba, kodvwa wekucela nembeza lomsulwa kuNkulunkulu. Lombhabhatiso uyanisindzisa ngekuvuka kwaJesu Khristu ekufeni.

²² Yena sewahamba waya ezulwini, lapho asahleti khona ngesekudla saNkulunkulu; emagunya, nemandla, netingilosi sekwabekwa ngaphansi kwakhe loJesu.