1 yaPhetro 2 - Siswati 1996 Bible

Litje leliphilako nesive lesingcwele

¹ Ngako lahlani bonkhe bubi, nebucili bonkhe, nekutentisa, nemona, nako konkhe kuhleba.

² Njengebantfwana labasandza kutalwa, langatelelani lubisi lwaMoya loluhlantekile nalolungakabhicwa nalutfo, lolulivi laNkulunkulu, lenitawutsi ngekulunatsa nikhule, nize nisindziswe.

³ Nani senitibonele ngekwenu kutsi iNkhosi inemusa, njengobe kusho umBhalo.

⁴ Sondzelani eNkhosini, ngobe yona ilitje leliphilile lelaliwa bantfu, batsi alinamsebenti, kepha lakhetfwa nguNkulunkulu njengelitje leliligugu.

⁵ Nani-ke wotani kuyo, nibe ngematje laphilile, nakhiwe nibe yindlu yaMoya, khona-ke niyawuba baphristi labangcwele bekunikela imihlatjelo yaMoya, leyemukelekako kuNkulunkulu ngaJesu Khristu.

⁶ Ngobe umBhalo utsi: “Ase nibuke, ngibeka eSiyoni litje lekusimisa indlu, lelikhetsiwe, naleliligugu. Lowo lokholwa kulo, angeke ajabhiswe.”

⁷ Ngako-ke kini lenikholwako liligugu; kodvwa kulabo labangakholwa umBhalo utsi: “Lelitje lelaliwa bakhi seligucuke laba litje lekusimisa indlu.”

⁸ Kulenye indzawo utsi: “Leli litje leliyawukhuba bantfu, lidvwala lekubawisa.” Nembala bayakhutjwa labo labangalilaleli livi; vele bamiselwe kona loko.

⁹ Kodvwa nine nibeluhlanga lolukhetsiwe, nibaphristi bebukhosi, sive lesingcwele; nibantfu baNkulunkulu labakhetselwe kumemetela imisebenti lemihle yaNkulunkulu. Nguye lowanibita kutsi niphume ebumnyameni nitewungena ekukhanyeni kwakhe lokumangalisako.

¹⁰ Nine naningesiso sive, kodvwa nyalo senisive saNkulunkulu. Nake naba ngaphandle kwemusa, kepha nyalo seniwemukele.

Philani njengalokufanele tinceku taNkulunkulu

¹¹ Batsandzekako, ngiyanincenga, njengobe nitihambi nalabendlulako kulomhlaba, kutsi nitikhweshele tinkhanuko tenyama letilwa nemphefumulo.

¹² Philani imphilo yekulunga emkhatsini wemahedeni, khona kutawutsi nome banihleba ngekutsi nenta lokubi, kodvwa batsi bangabona imisebenti yenu lemihle, badvumise Nkulunkulu ngelilanga lekubuya kwakhe.

¹³ Tfobelani bonkhe bantfu labasetikhundleni; loko nikwente ngenca yeNkhosi: uMbusi, ngobe mukhulu,

¹⁴ nome tindvuna, ngobe nato titfunywe nguye kutsi titewujezisa labo labenta lokubi, tibonge labo labenta lokuhle.

¹⁵ Ngobe Nkulunkulu ufuna kona loko kutsi nibavale imilomo labo labatilima, ngekutsi nente lokuhle.

¹⁶ Nitiphatse njengebantfu labakhululekile, kodvwa ningakusebentisi kukhululeka kwenu kube simbonyo salokubi; kodvwa tiphatseni njengetinceku taNkulunkulu.

¹⁷ Hloniphani bonkhe bantfu, nitsandze bazalwane, nesabe Nkulunkulu, nihloniphe uMbusi.

Sibonelo sekuhlupheka kwaKhristu

¹⁸ Nine tisebenti, tfobelani baphatsi benu ngako konkhe kwesaba, hhayi labalungile nalabatfobekile kuphela, kodvwa nalabatiklokloklo.

¹⁹ Ngobe Nkulunkulu uyambusisa umuntfu lotsi ngekwesaba Nkulunkulu abeketele, nome ahlushwa ngaphandle kwesono.

²⁰ Sikhona yini sibusiso lenifanele kusitfola, nanibeketelela kushaywa, ngobe nente lokubi? Kepha nanibeketelela kuhlushwa, ngobe nente lokuhle, Nkulunkulu utawunibusisa ngako.

²¹ Ngobe vele, nabitelwa kona loko; ngobe Khristu naye wanihluphekela, wanishiyela sibonelo sekutsi nimlandzele etinyatselweni takhe.

²² UmBhalo utsi ngaye: “Akazange asasente sono, nasemlonyeni wakhe akuzange sekuphume emanga.”

²³ Kwatsi etfukwa, wangete waphindzisela ngenhlamba; kwatsi ahlushwa, wangete wasongela. Kodvwa watinikela kuNkulunkulu lowehlulela ngekulunga.

²⁴ Khristu cobo lwakhe wetfwala tono tetfu emtimbeni wakhe, emtsini, kuze kutsi tsine singabe sisabuswa tono kodvwa siphile ekulungeni. “Niphiliswe ngemivimbo yakhe.”

²⁵ Ngobe beninjengetimvu letedukile; kodvwa manje seniphendvukele kuMelusi neMlondvoloti wemiphefumulo yenu.