1 Samuweli 23 - Siswati 1996 Bible

Kukhululwa kwelidolobha laseKheyila

¹ Base batjela Davide, batsi: “Buka la, emaFilisti asahlasele iKheyila, atfumba nemabala ekubhulela.”

² Davide wabuta kuSimakadze watsi: “Ngihambe yini ngiyewuhlasela lamaFilisti?” Simakadze wamphendvula watsi: “Hamba uyewuhlasela emaFilisti, usindzise iKheyila.”

³ Kodvwa emadvodza aDavide akhuluma kuye, atsi: “Lapha kaJuda siyesaba, kangakanani-ke nase sisukela iKheyila siyewuhlaselana nemabutfo emaFilisti.”

⁴ Davide waphindza futsi wabutisisa kuSimakadze. Simakadze wamphendvula watsi: “Yehla uye eKheyila, ngobe emaFilisti ngiwanikela esandleni sakho.”

⁵ Ngako Davide nemphi yakhe behlela eKheyila, bahlasela emaFilisti bawabulala, batfumba netifuyo tawo. Davide wabasindzisa kanjalo bantfu baseKheyila.

⁶ Abiyatha, umsa wa Ahimeleki, abete nesidziya sebaphristi ngesikhatsi abalekela kuDavide eKheyila.

Kucoshwa kwaDavide nguSawula

⁷ Sawula watjelwa kutsi Davide sewehlele eKheyila; ngako watsi: “Simakadze sewumnikele esandleni sami, ngobe Davide sewutivalele yena enkambu ngekutsi angene edolobheni lelinemasango lanemishudvo.”

⁸ Sawula wabutsa onkhe emabutfo akhe kutsi ehlele eKheyila ayewuhlasela Davide nemadvodza akakhe.

⁹ Watsi kube Davide aluve loluzungu lolwase luboshwe nguSawula ngaye, wakhuluma ku-Abiyatha, umphristi, watsi: “Letsa lapha lesidziya sebaphristi.”

¹⁰ Davide wachubeka watsi: “Awu! Simakadze, Nkulunkulu wesive sema-Israyeli, inceku yakho seyivile kutsi ngempela Sawula ufuna kwehlela eKheyila atewubhubhisa lelidolobha ngenca yami.

¹¹ Bantfu baseKheyila batanginikela yini kuye? Yena Sawula usetakwehla ngempela yini, njengobe inceku yakho ivile? Awu! Simakadze, Nkulunkulu wema-Israyeli, tjela inceku yakho.” Simakadze watsi: “Utakwehla.”

¹² Davide wabuta watsi: “Bantfu baseKheyila batanginikela yini mine nalamadvodza akami esandleni saSawula?” Simakadze wamphendvula watsi: “Bataninikela.”

¹³ Ngako Davide nemabutfo akhe, emadvodza langema-600, babaleka eKheyila, besuka behla benyuka tindzawo ngetindzawo. Kwatsi Sawula nakatjelwa kutsi Davide sewubalekile eKheyila, wangabe asehla.

¹⁴ Davide wahlala etinqabeni tasehlane, lekwakutintsaba telihlane laseZifu. Sawula abesolomane amfuna onkhe emalanga, kodvwa Simakadze akazange amnikele etandleni takhe.

¹⁵ Davide wabona kutsi Sawula abephume umkhankhaso wekumbulala, ngako wavele wahlala eHoreshi, ehlane laseZifu.

¹⁶ Jonathani, umsa waSawula, wesuka lapho waya eHoreshi kuDavide kuyawucinisa sandla sakhe kuNkulunkulu.

¹⁷ Wafike wakhuluma kuye watsi: “Ungesabi, ngobe sandla sababe, Sawula, singeke sifinyelele kuwe. Wena utawuba yinkhosi ka-Israyeli, mine nje ngitawuba wesibili kuwe. Ngisho nababe Sawula uyakwati loko.”

¹⁸ Bobabili base benta sivumelwane embikwaSimakadze. Jonathani wase uyancandzeka ubuyela ekhaya kubo, kodvwa Davide wasala, wahlala khona lapho eHoreshi.

¹⁹ Bantfu baseZifu bakhuphukela kuSawula eGibeya, bafike bamtjela batsi: “Davide akabhaci yini lapha etinqabeni taseHoreshi, entsabeni iHakhila, ngaseningizimu nelihlane?

²⁰ Manje-ke, nkhosi, wota, nangabe kukuhle kuwe loko, yewuka; tsine sitamnikela esandleni senkhosi.”

²¹ Sawula waphendvula watsi: “Simakadze akanibusise, ngobe nibe nesihawu kimi.

²² Hambani nente lamanye emalungiselelo, nimfunisise, nize nati, niyibone kahle futsi lendzawo lapho Davide akhona, nalapho ahamba khona, nekutsi ngubani lose wambona alapho. Sengivile kutsi ulicili kakhulu.

²³ Ngako-ke tifuneni nitati kahle tonkhe leto tindzawo labhaca kuto, nibuye nite lapha kimi senineliciniso ngato. Mine-ke ngitawube sengihamba nani, nangabe akulelo live, ngitawutfunguluta ngimfune emkhatsini wato tonkhe tinsendvo temaJuda.”

²⁴ Ngako-ke base bayesuka kuSawula bacondza eZifu. Ngaleso sikhatsi Davide nebalandzeli bakhe bese basehlane laseMayoni, e-Arabha, ngaseningizimu nelihlane.

²⁵ BoSawula nemabutfo akhe bacala batfungatsa, bafuna Davide, naDavide watjelwa ngaloko. Davide wabe sewehlela entansi edvwaleni, wahlala ehlane laseMayoni. Watsi kube eve Sawula, wahamba waya ehlane laseMayoni, acosha Davide.

²⁶ Sawula abehamba ngakulelinye licele lentsaba, kantsi naDavide nebalandzeli bakhe babehamba ngale kulelinye licele. Davide washesha wahamba lapho, ngobe abesaba Sawula. Kwatsi lapho Sawula nemabutfo akhe asatungelete Davide nemadvodza akakhe asacondze kubatfumba,

²⁷ kwefika sigijimi kuSawula, satsi: “Phutfuma! EmaFilisti asatseleke ngekhatsi eveni lakho lena emuva.”

²⁸ Sawula washiya phansi kucoshana naDavide, wahamba wayakulwa nemaFilisti. Nguko nje leyo ndzawo yetsiwa libito, kwatsiwa Lidvwala Lekwehlukanisa.

²⁹ Davide wakhuphuka kusuka lapho, wayawubhaca etinqabeni tase-Eni Gedi.