1 Samuweli 22 - Siswati 1996 Bible

Davide e-Adulamu naseMispa

¹ Davide wesuka eGathi, wabaleka, wayawubhaca emgedzeni wase-Adulamu. Batsi kube bakuve loko bomnakabo nebakubo, behla baya kuye.

² Kwatsi bonkhe laba bebahluphekile, nalababenetikwelede, nalababengeneliseki babutsana kuye, waba ngumholi wabo. Kwaba ngemadvodza labengaba ngema-400.

³ Davide wesuka lapho waya eMispa yakaMowabi, wafike wakhuluma enkhosini yakhona, watsi: “Ngicela kukhontela bobabe namake bahlale lapha kakho, ngize ngati kahle kutsi Nkulunkulu utangentelani.”

⁴ Wase uyabaletsa, beta enkhosini yakaMowabi, bahlala nayo ngaso sonkhe leso sikhatsi, yena asesebhacile enqabeni.

⁵ Kodvwa umphrofethi Gadi wakhuluma kuDavide, watsi: “Ungahlali lapha enqabeni. Hamba uye eveni lakaJuda.” Ngako Davide wesuka wahamba, waya ehlatsini laseHarethi.

Kubulawa kwebaphristi baseNobi nguSawula

⁶ Sawula weva kutsi Davide nebalandzeli bakhe utfolakele. Sawula wahlala ngephansi kwesihlahla sethamariske, aphetse sikhali sakhe ngesandla, entsabeni yaseGibeya, tonkhe tindvuna takhe tatimile timtungeletile.

⁷ Sawula wakhuluma kuto watsi: “Lalelani, madvodza akaBhenjamini! Indvodzana yaJese itaninika nonkhe yini emasimi netivini? Itanenta nonkhe yini kutsi nibe tindvuna tetinkhulungwane netindvuna temakhulu?

⁸ Kungabe nguloko yini lokunente nangibophela lifindvo? Kute namunye lowangitjela indvodzana yami nayenta sivumelwane nendvodzana yaJese. Kute namunye wenu lohluphekile ngami nalongitjelako kutsi indvodzana yami seyitsenge inceku yami kutsi ingilalele endleleni, njengobe yenta lamuhla.”

⁹ Kodvwa Dowegi, um-Edomu, labeme kanye netindvuna taSawula, watsi: “Ngiyibonile indvodzana yaJese iya eNobi ku-Ahimeleki, umsa wa-Ahitubi.

¹⁰ Ahimeleki wayibutela kuSimakadze kutsi kufanele yente njani, wayipha nemiphako kanye nenkemba yaGoliyathi, umFilisti.”

¹¹ Inkhosi yatfumela kutsi akulandvwe umphristi Ahimeleki, umsa wa-Ahitubi, nendlu yeyise yonkhe, lebekunguyona ibaphristi baseNobi; beta bonkhe enkhosini.

¹² Sawula wakhuluma ku-Ahimeleki, watsi: “Lalela-ke, msa wa-Ahitubi.” Waphendvula watsi: “Yebo, nkhosi yami.”

¹³ Sawula watsi kuye: “Ningibopheleleni lisu wena nendvodzana yaJese, ngekutsi umnike sinkhwa nenkemba, waze wambutela nakuNkulunkulu, kuze amelane nami, angilalele endleleni, njengobe enta lamuhla?”

¹⁴ Ahimeleki wayiphendvula inkhosi watsi: “Ngubani kuto tonkhe tinceku takho lowetsembeke kuwe njengaDavide, umkhwenyane wenkhosi, indvuna yemabutfo lagadza wena, umuntfu lohlonishwa kangaka endlini yakho yonkhe?

¹⁵ Bekukucala yini ngalelo langa kutsi ngimbutele kuNkulunkulu? Bengingacali vele! Inkhosi ayingayibeki licala inceku yayo, ngisho namunye webendlu yami, ngobe inceku yenkhosi ayati lutfo ngayo lendzaba.”

¹⁶ Kodvwa inkhosi yatsi: “Utakufa nome kanjani, wena Ahimeleki, kanye nayo yonkhe indlu yeyihlo.”

¹⁷ Inkhosi yase itjela letindvuna letatiyikakile, yatsi: “Babulaleni labaphristi baSimakadze, ngobe nabo bahlangene naDavide. Bebati kutsi uyabaleka, kodvwa bangete bangitjela.” Kodvwa tindvuna tenkhosi tesaba kubeka sandla sato etikwebaphristi baSimakadze.

¹⁸ Inkhosi yase itfuma Dowegi, yatsi: “Suka ubulale labaphristi.” Dowegi, um-Edomu, wagucuka wabesukela wababulala. Ngalelo langa wababulala baphristi labangema-85, emadvodza abegcoka sidziya selineni.

¹⁹ Wachubeka wahlasela nelidolobha laseNobi, lekwakulidolobha lebaphristi, wabulala emadvodza akhona, kanye nebafati bakhona, nebantfwana, netinswane, netinkhomo, netimbongolo kanye netimvu.

²⁰ Kodvwa Abiyatha, umsa wa-Ahimeleki, lotalwa ngu-Ahitubi, waphunyula wabaleka, waya kuDavide.

²¹ Wafike watjela Davide kutsi Sawula sewubabulele baphristi baSimakadze.

²² Davide wase utsi ku-Abiyatha: “Ngalela langa ngesikhatsi Dowegi, um-Edomu, alapha, ngavele ngati nje kutsi utamtjela nome kanjani Sawula; indlu yeyihlo yonkhe ife ngenca yami.

²³ Hlala lapha kimi, ungesabi; ngobe lowo lofunana nemphilo yakho ufunana neyami futsi. Utawuphepha lapha kimi.”