1 Samuweli 16 - Siswati 1996 Bible

Kugcotjwa kwaDavide kutsi abe inkhosi

¹ Simakadze wakhuluma kuSamuweli, watsi: “Utamkhalela kuze kube ngunini Sawula, ngobe sengimalile kutsi abe yinkhosi yema-Israyeli? Gcwalisa luphondvo lwakho ngemafutsa, ungenele indlela yakho. Ngikutfuma endlini yakaJese waseBhetlehema, ngobe ngitikhetsele lomunye wemadvodzana akhe kutsi abe yinkhosi.”

² Kodvwa Samuweli watsi: “Ngingahamba kanjani? Sawula utawuva ngaloko, bese uyangibulala.” Simakadze watsi: “Tsatsa sitfokati uhambe naso, ufike utsi: ‘Ngitekwenta umhlatjelo kuSimakadze.’

³ Ubobe sewumema Jese kulomhlatjelo, mine ngitawube sengiyakulayela kutsi wente njani. Uyawungigcobela lowo lengitakulayela yena.”

⁴ Samuweli wenta loko labekutjelwe nguSimakadze. Watsi nakefika eBhetlehema, baholi belidolobha batfutfumela nabahlangana naye. Bambuta batsi: “Ute ngesihle yini?”

⁵ Samuweli waphendvula watsi: “Yebo, ngite ngesihle; ngitekwenta umhlatjelo kuSimakadze. Tingcweliseni, bese nita emhlatjelweni kanye nami.” Ngako wase ungcwelisa boJese kanye nemadvodzana akhe wabamemela emhlatjelweni.

⁶ Batsi nabefika, Samuweli wabona Eliyabe, wase ucabanga utsi: “Impela logcotjiwe waSimakadze nguye lona losembikwaSimakadze.”

⁷ Kodvwa Simakadze wakhuluma kuSamuweli, watsi: “Ungabheki kubukeka nebudze bakhe, ngobe yena ngimalile. Simakadze akabuki tona tintfo letinakwa ngumuntfu. Umuntfu ubuka lingaphandle lemuntfu, kodvwa Simakadze ubuka inhlitiyo.”

⁸ Jese wase ubita Abinadabi, wamendlulisa embikwaSamuweli, kodvwa Samuweli watsi: “Simakadze nalona akamkhetsi.”

⁹ Jese wase uletsa Shama, wamendlulisa, kodvwa Samuweli watsi: “Nalona Simakadze akamkhetsi.”

¹⁰ Jese wendlulisa emadvodzana akhe lasikhombisa embikwaSamuweli, kodvwa Samuweli watsi kuye: “Nalawa Simakadze akawakhetsi.”

¹¹ Ngako Samuweli wabuta Jese watsi: “Ngulawa kuphela yini emadvodzana akho?” Jese wamphendvula watsi: “Kusasele lencane kunawo onkhe, kodvwa yeluse timvu.” Samuweli watsi: “Tfumela iyewubitwa, singeke sihlale phansi, sidle umhlatjelo, ingakefiki.”

¹² Ngako Jese wase uyatfumela, yalandvwa, nayo yangeniswa kuye. Yayibovana inebuso lobuhle itsandzeka. Simakadze watsi: “Sukuma umgcobe, ngobe nguye yena lowo.”

¹³ Ngako Samuweli watsatsa luphondvo lwakhe lwemafutsa wamgcoba ebaleni embikwabomnakabo. Kusukela ngalelo langa Moya waSimakadze wehlela etikwaDavide ngemandla lamakhulu. Samuweli wesuka lapho waya eRama.

Davide esigodlweni saSawula

¹⁴ Moya waSimakadze abesasukile kuSawula, umoya lomubi lowavela kuSimakadze wamkhatsata.

¹⁵ Tinceku taSawula tatsi kuye: “Buka la, ngumoya lomubi lovela kuSimakadze lona lokuhluphako.

¹⁶ Shangatsi inkhosi yetfu ngabe itfumela tinceku tayo letikhona lapha embikwayo kutsi tiyeyifunela umuntfu lonelikhono lekudlala ihabhu. Kutawutsi umoya lomubi lovela kuSimakadze nawufika etikwakho, lomuntfu utawube sewudlala lehabhu, nawe utawube sewuba ncono.”

¹⁷ Sawula wase ukhuluma etincekwini takhe, watsi: “Ngifuneleni umuntfu lodlala kahle ihabhu, nimletse lapha kimi.”

¹⁸ Lenye yetinceku yaphendvula yatsi: “Ngibone indvodzana yaJese waseBhetlehema lenelikhono ekudlaleni ihabhu. Uyindvodza lenesibindzi, futsi uyingwazi. Ukhuluma kahle futsi, ulikhwa, naSimakadze unaye.”

¹⁹ Ngako Sawula watfumela tigijimi kuJese, watsi: “Ngitfumelele indvodzana yakho lenguDavide, leyelusa timvu.”

²⁰ Ngako Jese, watsatsa imbongolo yakhe wayetfwesa tinkhwa netikhumbasikhwama letatigcwele liwayini, nelizinyane lembuti, wakutfumela kanye nendvodzana yakhe, Davide, kuSawula.

²¹ Davide wefika kuSawula, wangena emsebentini wakhe. Sawula wamtsandza kakhulu Davide, waze wambeka nekutsi abe ludzibi lwakhe.

²² Sawula wabe sewutfumela ligama kuJese watsi: “Ngicela kutsi uvumele Davide kutsi asale asahlala lapha emsebentini wami, ngobe uyangijabulisa.”

²³ Kwakutsi njalo nje Sawula nakahlushwa ngumoya lomubi lovela kuSimakadze, Davide bese utsatsa ihabhu yakhe uyayidlala. Abetsi angayidlala, bese kuba nebuncono kuSawula, ative asancono, nemoya lomubi usuke kuye.