1 Samuweli 11 - Siswati 1996 Bible

Kuncotjwa kwema-Amoni nguSawula

¹ Nahashi, um-Amoni, wakhuphuka wayawuvimbetela iJabeshi Gileyadi. Onkhe emadvodza aseJabeshi amncenga atsi: “Yenta sivumelwane natsi, sitawuba tinceku takho.”

² Kodvwa Nahashi, um-Amoni, watsi: “Ngitasenta sivumelwane nani kuphela naningangivumela kutsi ngikupulute liso langasekudla kini nonkhe, kuze ngitsele lihlazo kuso sonkhe sive sema-Israyeli.”

³ Baholi baseJabeshi batsi kuye: “Sinike emalanga lasikhombisa, kuze sitfumele emancusa kulo lonkhe leli laka-Israyeli; nakute lotasephula, sitatinikela kuwe.”

⁴ Tatsi letigijimi natifika eGibeya kaSawula tibika ngaletincomo esiveni, sonkhe sive sakhala kakhulu, samemeta.

⁵ Ngaleso sikhatsi Sawula abebuya emasimini, achuba tinkhabi takhe, wabuta watsi: “Kwente njani esiveni? Sive sikhalelani?” Base bamlandzisa ngako konkhe lokwakushiwo ngemadvodza aseJabeshi.

⁶ Watsi Sawula nakakuva loko, Moya waSimakadze wehlela etikwakhe ngemandla lamakhulu, watfukutsela wabila.

⁷ Watsatsa tinkhabi letimbili, watijuba ticucu, watfumela ngetigijimi licatsa ngalinye kulo lonkhe laka-Israyeli, timemetela titsi: “Nguloku-ke lokutakwentiwa etinkhabini tayo yonkhe indvodza lengalandzeli boSawula naSamuweli.” Kwesabeka kwaSimakaze kwehlela kubo bonkhe bantfu, bagucuka bonkhe baba njengemuntfu munye.

⁸ Kwatsi Sawula nakababutsela eBhezeki, emadvodza aka-Israyeli aba ti-300 000, kwatsi bakaJuda baba ti-30 000.

⁹ Batjela letigijimi letatifikile batsi: “Tjelani lamadvodza aseJabeshi Gileyadi nitsi: ‘Kusasa lilanga litawutsi licala kufutfumala, nine nitabe senikhululekile.’ ” Tatsi letigijimi natifika tikubika loko kulamadvodza aseJabeshi, ajabula kakhulu.

¹⁰ Akhuluma kulama-Amoni atsi: “Kusasa sitatinikela kini, nitakwenta kitsi loko lokubonakala kukuhle kini.”

¹¹ Ngakusasa Sawula wahlela imphi yakhe, wayehlukanisa ticheme letintsatfu; kwatsi ekuseni nakudzabuka kusa batseleka enkambu yema-Amoni, bawagwaza bawabulala, laze lafutfumala lilanga. Kwatsi labo labaphunyula bahlakaka, kwabate namunye lobaleka nalomunye.

Kufakazeleka kwaSawula kutsi uyinkhosi

¹² Bantfu bakhuluma kuSamuweli, batsi: “Ngubani-ke lona bekabuta atsi: ‘Sawula angabusa yini etikwetfu?’ Wabuyiseni lapha lawo madvodza, sitewabulala.”

¹³ Kodvwa Sawula watsi: “Kute namunye lotawubulawa lamuhla, ngobe lamuhla Simakadze uwephulile ema-Israyeli.”

¹⁴ Samuweli wase ukhuluma kubantfu, watsi: “Wotani sihambe siye eGilgali siyewucinisa khona bukhosi.”

¹⁵ Ngako sonkhe sive saya eGilgali, sayawucinisa khona kubekwa kwaSawula kutsi abe yinkhosi embikwaSimakadze. Ngulapho-ke lapho bafike benta imihlatjelo yekuthula embikwaSimakadze. Sawula naso sonkhe sive sema-Israyeli sajabula kakhulu ngalelo langa.