1 Samuweli 10 - Siswati 1996 Bible

¹ Samuweli wase utsatsa lichaga lelalinemafutsa, wawatsela enhloko yaSawula, wamanga, watsi: “Angitsi Simakadze ukugcobile kutsi ube ngumholi welifa lakhe?

² Utawutsi nawusuka lapha kimi lamuhla nje, uhlangane nemadvodza lamabili ngasethuneni laRakheli leliseSelsa emnyeleni wakaBhenjamini. Batawutsi kuwe: ‘Letimbongolo lebewuyewutifuna setitfolakele. Manje uyihlo sewuyekele kucabanga ngato, sewukhatsateke ngani. Utibuta atiphendvule atsi: “Ngitakwenta njani mine ngendvodzana yami?” ’

³ “Utawusuka-ke lapho uchubeke uhambe, uze ufike esihlahleni lesikhulu sem-okhi saseThabori. Utawuhlangana nemadvodza lamatsatfu lapho, akhuphukela kuNkulunkulu eBetheli. Lenye itabe iphetse emazinyane lamatsatfu etimbuti, lena lenye iphetse imikhama yetinkhwa letintsatfu, lenye iphetse sikhumbasikhwama lesigcwele liwayini.

⁴ Batakubingelela bakuphe tinkhwa letimbili, ubotitsatsa.

⁵ “Nawusuka lapho, ubokhuphukela eGibeya yaNkulunkulu, lapho kunenkambu yemaFilisti khona. Utawutsi nawuyawungena kulelidolobha, uhlangane neludvwendvwe lwebaphrofethi lwehla lubuya endzaweni lephakeme, luphetse emahabhu, netingitali, netingubhu, nemintjingozi, luhambe lushaya, luphrofetha.

⁶ Moya waSimakadze utakwehlela etikwakho ngemandla lamakhulu, nawe uyawube sewuphrofetha kanye nabo. Uyawugucuka ube ngulomunye umuntfu.

⁷ Nase kwentekile konkhe loko, ubobe sewenta loko sandla sakho lesifinyelela kukwenta, ngobe Nkulunkulu unawe.

⁸ “Hamba embikwami wehlele eGilgali. Ngitakulandzela ngite kuwe ngitekwenta umnikelo wekushiswa nemnikelo wekuthula, kodvwa wena kufanele ungilindzele emalanga lasikhombisa, ngize ngifike kuwe ngikutjele lofanele kutsi ukwente.”

Kubekwa kwaSawula kutsi abe yinkhosi

⁹ Watsi Sawula nakagucuka asesuka kuSamuweli, Nkulunkulu wayigucula inhlitiyo yaSawula, kwatsi tonkhe leto tibonakaliso labetitjeliwe tagcwaliseka ngalona lelo langa.

¹⁰ Batsi nabefika eGibeya, ludvwendvwe lwebaphrofethi lwahlangana naSawula; Moya waNkulunkulu wehlela etikwakhe ngemandla lamakhulu, naye wase uhlanganyela nabo ekuphrofetheni.

¹¹ Kwatsi bonkhe labo bebamati ngaphambili nabambona aphrofetha kanye nebaphrofethi, babutana bodvwa batsi: “Yini-ke lena leseyehlele indvodzana yaKhishi? Kantsi naSawula sewungumphrofethi yini?”

¹² Indvodza leyayihlala lapho yaphendvula, yatsi: “Ngubani yena uyise wabo?” Ngako kwase kube siga sabo kutsi: “Kantsi naSawula sewungumphrofethi yini?”

¹³ Watsi kube Sawula acedze kuphrofetha, wase ukhuphukela endzaweni lephakeme.

¹⁴ Malume waSawula wababuta kanye nalesisebenti sakhe, watsi: “Benikuphi nine?” Sawula waphendvula watsi: “Besisafunana netimbongolo, kodvwa sitsite kube sibone kutsi tingeke titfolakale, sase siya kuSamuweli.”

¹⁵ Wachubeka malume wakhe watsi: “Ngitjeleni kutsi Samuweli utsiteni kini?”

¹⁶ Sawula waphendvula watsi: “Usitjele liciniso lonkhe, watsi timbongolo setitfolakele.” Kodvwa akazange amtjele malume wakhe kutsi utsiteni ngekubekwa kwakhe kuba yinkhosi.

¹⁷ Samuweli wabita sive sema-Israyeli kutsi site kuSimakadze eMispa.

¹⁸ Watsi kuso: “Naku lokushiwo nguSimakadze Nkulunkulu wema-Israyeli, utsi: ‘Israyeli ngamkhuphula, ngamkhipha eveni laseGibhithe; nganephula emandleni ebaseGibhithe, nakuyo yonkhe imibuso leyayinigcilata.’

¹⁹ Kodvwa nyalo senimlahlile Nkulunkulu wenu lowanisindzisa kuto tonkhe tinhlupheko tenu netinhlungu tenu, nase nitsi: ‘Hhayi, sibekele inkhosi.’ Ngako-ke tetfuleni nine cobo lwenu embikwaSimakadze ngetive tenu, nangemindeni yenu.”

²⁰ Kwatsi Samuweli nakasondzeta tonkhe tive tema-Israyeli, kwakhetfwa sive sakaBhenjamini.

²¹ Wase usondzeta sive sakaBhenjamini lusendvo ngelusendvo, kwakhetfwa umndeni wakaMatri. Ekugcineni Sawula, indvodzana yaKhishi, wakhetfwa. Kodvwa batsi bayamfuna, wangete watfolakala.

²² Ngako baphindza babutisisa kuSimakadze, batsi: “Kungabe lomuntfu sewufikile yini lapha?” Simakadze wabaphendvula watsi: “Yebo, sewufikile, mane ubhace emkhatsini wemitfwalo.”

²³ Bagijima bamlandza, watsi nakemiswa emkhatsini wesive, wabonakala amudze avela ngenhloko, bonkhe labanye bantfu bakhawula emahlombe akhe.

²⁴ Samuweli watsi kubantfu: “Niyambona-ke umuntfu lokhetfwe nguSimakadze? Kute namunye lofanana naye kubo bonkhe labanye bantfu.” Sive sonkhe samemeta satsi: “Lunwele loludze! Nkhosi!”

²⁵ Samuweli wachazela sive imitsetfo yebukhosi. Wayibhala phansi encwadzini legocotwako, wayetfula embikwaSimakadze. Samuweli wase uyasicitsa sive; nguloyo naloyo waya ekhaya lakhe.

²⁶ Sawula naye wabuyela ekhaya kakhe eGibeya asasingatfwe ngemadvodza labalulekile, latinhlitiyo tawo tatitsintfwe nguNkulunkulu.

²⁷ Kodvwa labanye belutfutfuva babebuta batsi: “Kodvwa lomuntfu angasisindzisa kanjani?” Bamedzelela, bangete baletsa ngisho nasinye setfulo. Kodvwa Sawula watithulela nje.