1 kuThimothi 4 - Siswati 1996 Bible

Bafundzisi bemanga

¹ Moya ukhuluma ngalokusebaleni kutsi ngetikhatsi tekugcina labanye bayawuhlubuka ekukholweni, balandzele imimoya ledukisako netimfundziso temadimoni.

² Bantfu labatentisako bayawufundzisa emanga, ngobe bonembeza babo bashiswe luphawu.

³ Bayawuvimbela kushada nekuteka, batsi akuzilwe kudla lokutsite. Phela konkhe kudla kwadalwa nguNkulunkulu lekufanele kutsi labakholwako bakwemukele ngekubonga, njengobe babantfu labalatiko liciniso lonkhe.

⁴ Ngobe konkhe lokudalwe nguNkulunkulu kulungile. Kuko konkhe lokwemukelwa ngekubonga kute lokufanele kwaliwe,

⁵ ngobe konkhe kungcweliswe ngelivi laNkulunkulu nangemthandazo.

Sisebenti saKhristu Jesu lesincomekako

⁶ Utawuba sisebenti saKhristu lesincomekako nawungayendlulisela kubazalwane lemiyalo. Nawe utakondleka emoyeni ngemavi ekukholwa nangemfundziso yeliciniso, lobambelele kuyo.

⁷ Ungahambisani netinganekwane tebulukati letingakalungi. Tetayete wena kumesaba Nkulunkulu.

⁸ Ngobe kwetayeta umtimba ngekwelula imisipha kunenzuzo kwesikhashana nje, kodvwa kumesaba Nkulunkulu kunenzuzo etintfweni letinyenti, ngobe kucuketse setsembiso semphilo yamanje kanye nesemphilo letako.

⁹ Lelivi letsembekile, lifanele kwemukelwa ngibo bonkhe.

¹⁰ Kuze kube manje siyasebenta sishikaneke, ngobe sibeke litsemba letfu kuNkulunkulu lophilako, longuMsindzisi wabo bonkhe bantfu, ikakhulu walabo labakholwako.

¹¹ Yala ufundzise ngaletintfo.

Pawula weluleka Thimothi kutsi abe sibonelo emsebentini wakhe

¹² Ungavumi kutsi busha bakho bedzeleleke kubantfu. Kodvwa bani sibonelo kulabakholwako; ube sibonelo ngekukhuluma, nangesimilo, nangelutsandvo, nangekukholwa, nangekuba msulwa.

¹³ Tinikele kufundzela bantfu umBhalo, ubayale, ubafundzise, ngize ngifike.

¹⁴ Ungasivilapheli sipho sakho lowasinikwa ngelivi lesiphrofetho ngesikhatsi baholi belibandla babeka tandla etikwakho.

¹⁵ Khutsala kakhulu kuloko, khona batewubona kuchubekela kwakho embili.

¹⁶ Uticaphele wena nekufundzisa kwakho, ungesuki kuko; ngobe ngekwenta njalo utawube utisindzisa wena kanye nalabakuvako.