1 kuThimothi 2 - Siswati 1996 Bible

Kukhonta ebandleni

¹ Ngako-ke kwekucala ngiyala kutsi kukhuleka, nemithandazo, nekuncusa, nekubonga, akwentelwe bonkhe bantfu.

² Khulekelani emakhosi nabo bonkhe labasetikhundleni letiphakeme, khona sitewuphila imphilo yekuthula, ngekwesaba Nkulunkulu nangako konkhe kuhlonipheka.

³ Loku kuhle, kuyemukeleka kuNkulunkulu uMsindzisi wetfu,

⁴ lofisa kutsi bonkhe bantfu basindziswe bafinyelele ekulatini liciniso.

⁵ Ngobe munye Nkulunkulu, munye neMlamuli losemkhatsini waNkulunkulu nebantfu, lomuntfu nguKhristu Jesu,

⁶ lowatinikela kutsi abe yinhlawulo yabo bonkhe, loko kwaba bufakazi ngesikhatsi lesifanele.

⁷ Ngiko lengakhetselwa kuba ngummemeteli nemphostoli wako, ngifundzise betive kukholwa neliciniso; ngikhuluma liciniso, hhayi emanga.

⁸ Ngako-ke ngifisa shangatsi emadvodza yonkhe indzawo angakhuleka aphakamise tandla letingcwele, ate lulaka nembango.

⁹ Kanjalo futsi nalabasikati bafanele kuhloba kahle, bagcoke kahle, nangekuhlonipheka, hhayi ngemichino, nome ngemihlobiso yegolide, nome yematje laligugu, nome ngetingubo letidule kakhulu,

¹⁰ kodvwa bahlobe ngetento letinhle letifanele labasikati labatsi besaba Nkulunkulu.

¹¹ Lomsikati kufanele afundze ngekuthula nangekutfobeka konkhe.

¹² Kodvwa angimvumeli kutsi afundzise nome-ke engamele indvodza, kepha akathule.

¹³ Ngobe phela Adamu wentiwa kucala, kwase kulandzela Eva;

¹⁴ futsi Adamu akakhohliswanga, kepha ngumfati lowakhohliswa, wephula umtsetfo.

¹⁵ Kodvwa umfati uyawusindziswa ngekutala bantfwana, nabahlala ngekuzitsa konkhe ekukholweni, naselutsandvweni, nasekungcwelisweni.