Mapisarema 84 - Shona BIBLE

Mufaro uri paimba yaMwari

Kumutungamiriri wokuimba; nomuimbirwo weGititi. Pisarema ravanakomana vaKora.

¹ Ugaro hwenyu hunodikanwa sei, Imi Jehovha wehondo!

² Mweya wangu unoshuva, zvirokwazvo unopanga vazhe dzaJehovha; Mwoyo wangu nenyama yangu zvinodana kuna Mwari mupenyu.

³ Zvirokwazvo, shiri yakazviwanira imba, Nyenganyenga yakazviwanira dendere, painoisa vana vayo, Ipo paatari dzenyu, Jehovha wehondo, Mambo wangu, naMwari wangu.

⁴ Vakaropafadzwa vanogara mumba menyu; Vachagara vachikurumbidzai.

⁵ Akaropafadzwa munhu ane simba rake mamuri; Ane migwagwa inoenda Zioni mumwoyo make.

⁶ Kana vachipfuura nomumupata wakaoma, vanouita nzvimbo ina matsime; Zvirokwazvo, mvura yomunhuruka inoufukidza nemikomborero.

⁷ Vanowedzera simba pasimba ravo, Mumwe nomumwe wavo anosvika pamberi paMwari paZioni.

⁸ Haiwa, Jehovha wehondo, inzwa munyengetero wangu; Teererai nenzeve, Mwari waJakobho.

⁹ Tarirai, Mwari, nhoo yedu, Muone chiso chomuzodzwa wenyu.

¹⁰ Nokuti zuva rimwe pavazhe dzenyu rinokunda mamwe ane chiuru pakunaka. Ndinoti zviri nani kuti ndive murindi womukova mumba maMwari wangu, Pakuti ndigare pamatende avane zvakaipa.

¹¹ Nokuti Jehovha Mwari izuva nenhoo; Jehovha achapa nyasha nokukudzwa; Hapana chinhu chakanaka chaanganyima vanofamba nokururama.

¹² Jehovha wehondo, Akaropafadzwa munhu anovimba nemi.