Mapisarema 81 - Shona BIBLE

Vanhu ngavarumbidze Jehovha, vamutende iye oga

Kumutungamiriri wokuimba; neGititi. Pisarema raAsafi.

¹ Imbirai Mwari kwazvo, iye simba redu; Pururudzai kuna Mwari waJakobho.

² Vambai rwiyo, muridze ngoma, Nembira dzinonakidza nomutengeranwa.

³ Ridzai hwamanda pakugara kwomwedzi, Napakuchena kwomwedzi, pamutambo wedu wakatarwa.

⁴ Nokuti ndizvo zvakatemerwa Isiraeri, Zvakarairwa naMwari waJakobho.

⁵ Wakazvitema muna Josefa kuti chive chipupuriro, Panguva yaakandorwa nenyika yeIjipiti; Pandakanzwa rurimi rwandakanga ndisingazivi.

⁶ “Ndakabvisa mutoro pafudzi rake; Maoko ake akaregedza dengu.

⁷ Iwe wakadana pakutambudzika, ndikakurwira; Ndakakupindura ndiri panovanda kutinhira; Ndakakuidza pamvura zhinji yeMeribha.

⁸ Inzwai vanhu vangu, ndikupupurirei; Haiwa Isiraeri, dai waida hako kunditeerera!

⁹ Ngakurege kuvapo pakati penyu mwari wokumwe; Musanamata kuno mumwe mwari wavatorwa.

¹⁰ Ndini Jehovha Mwari wako, Akakubudisa panyika yeIjipiti; Shamisa muromo wako kwazvo, ndigouzadza.

¹¹ Asi vanhu vangu havana kuteerera izwi rangu; Isiraeri wakandiramba chose.

¹² Saka ndakavaregera paukukutu hwemwoyo yavo, Kuti vafambe namano avo.

¹³ Haiwa, dai vanhu vangu vainditeerera havo, Dai Isiraeri aifamba nenzira dzangu!

¹⁴ Ndingadai ndakakurumidza kukunda vavengi vavo, Nokurova vadzivisi vavo noruoko rwangu.

¹⁵ Vanovenga Jehovha vaizviisa pasi pake; Asi nguva yavo yaivapo nokusingaperi.

¹⁶ Angadai aivadyisawo zviyo zvakaisvonaka; Ndaikugutsa nohuchi hunobva padombo.”