Mattheu 1 - BIBELE

Leloko la Jesu Kreste

¹ Leloko la Jesu Kreste, mora Davida, mora Aborahama.

² Aborahama a tswala Isaka, Isaka a tswala Jakobo, Jakobo a tswala Juda le bana babo,

³ Juda a tswala Farese le Sara ka Tamare, Farese a tswala Heserone, Heserone a tswala Arame,

⁴ Arame a tswala Aminadabe, Aminadabe a tswala Nashone, Nashone a tswala Salema,

⁵ Salema a tswala Boase ka Rahaba, Boase a tswala Obede ka Ruthe, Obede a tswala Jese,

⁶ Jese a tswala kgosi Davida. Davida a tswala Solomone ka mohatsa Uriya,

⁷ Solomone a tswala Roboame, Roboame a tswala Abiya, Abiya a tswala Asa,

⁸ Asa a tswala Jehoshafate, Jehoshafate a tswala Jorame, Jorame a tswala Usiya,

⁹ Usiya a tswala Jotame, Jotame a tswala Akase, Akase a tswala Hesekia,

¹⁰ Hesekia a tswala Manase, Manase a tswala Amose, Amose a tswala Josiya,

¹¹ Josiya a tswala Jekoneya le bana babo ka nako ya ho fallisetswa ha Bajuda Babilona.

¹² Jwale, kamora ho fallisetswa ha bona Babilona, Jekoneya a tswala Salatiele, Salatiele a tswala Sorobabele,

¹³ Sorobabele a tswala Abihude, Abihude a tswala Eliakime, Eliakime a tswala Asore,

¹⁴ Asore a tswala Sadoke, Sadoke a tswala Akime, Akime a tswala Eleude,

¹⁵ Eleude a tswala Eleasare, Eleasare a tswala Matane, Matane a tswala Jakobo,

¹⁶ Jakobo a tswala Josefa, mohatsa Maria, mosadi ya ileng a tswala Jesu ya bitswang Kreste.

¹⁷ Ha ho le jwalo, meloko yohle, ho tloha ho Aborahama ho isa ho Davida e bile leshome le metso e mene; ho tloha ho Davida ho isa nakong ya ho fallisetswa ha Bajuda Babilona, meloko e leshome le metso e mene; mme ho tloha nakong ya ho fallisetswa ha bona Babilona ho isa ho Kreste, meloko e leshome le metso e mene.

Tswalo ya Jesu Kreste

¹⁸ Tswalo ya Jesu Kreste e bile jwaana: Mmae Maria, ha a se a lebeleditswe ke Josefa, ba eso ka ba phela mmoho, a fumaneha e le moimana ka matla a Moya o Halalelang.

¹⁹ Erekaha Josefa, mohatsa Maria, a ne a lokile, mme a sa rate ho mo hobosa, a rera ho mo hlala ka lekunutu.

²⁰ Yare a sa hopotse jwalo, lengeloi la Morena la iponahatsa ho yena torong, la re: “Josefa, mora Davida, o se ke wa tshaba ho inkela Maria mohatsa hao, hobane se emotsweng ke yena se tswa ho Moya o Halalelang;

²¹ o tla tswala mora, mme o tla mo rea lebitso la Jesu, hobane o tla pholosa setjhaba sa hae dibeng tsa sona.”

²² Jwale tsena tsohle di etsahetse hore ho tle ho phethahale ho boletsweng ke Morena ka moporofeta, ha a re:

²³ “Bonang, morwetsana o tla emola, a tswale mora, mme mora eo o tla rewa lebitso la Emmanuele,” e leng ho re: Modimo o na le rona.

²⁴ Ha Josefa a tsoha borokong, a etsa kamoo lengeloi la Morena le mo laetseng kateng, a inkela mohatsa hae;

²⁵ mme ha a a ka a kena dikobong tsa hae ho fihlela a beleha mora; Josefa a mo rea lebitso la Jesu.