Numere 2 - Sesotho 1909/1961 (SO)

Molao wa ho emisa diahelo.

¹ Jehova a bua le Moshe le Aarone, a re:

² Bana ba Iseraele ba tla hloma ditente tsa bona mabapa le difolaga tsa matlo a bontata bona, e mong le e mong haufi le folaga ya hae. Ba tla di hloma ba teetse tente ya pokano hare, malebana le yona.

³ Ka nqa botjhabela, pela tente, ho hlongwe folaga ya ntlo ya Juda, ka lekgotla la yona; ke morena wa banna ba Juda, Nasone, mora Amminadabe,

⁴ le lekgotla la hae, ka ba ngotsweng ba bona, bana ba dikete tse mashome a supileng a metso e mene, tse nang le makgolo a tsheletseng.

⁵ Pela hae, ho hlome ba leloko la Issaskare; ke morena wa banna ba Issaskare, Nethaneele, mora Tsuare,

⁶ le lekgotla la hae, ka ba ngotsweng ba hae, banna ba dikete tse mashome a mahlano a metso e mene, tse nang le makgolo a mane;

⁷ le ba leloko la Sabulone, e leng morena wa bana ba Sabulone, Eliabe, mora Helone,

⁸ le lekgotla la hae, ka ba ngotsweng ba hae, banna ba dikete tse mashome a mahlano a metso e supileng, tse nang le makgolo a mane.

⁹ Bongata jwa ba ngodilweng, ba diahelo tsa ntlo ya Juda, ya eba dikete tse lekgolo le le leng le nang le mashome a robileng meno e le mmedi a metso e tsheletseng, tse nang le makgolo a mane, ka palo ya makgotla a bona. Ke bona ba tla tloha pele.

¹⁰ Ka nqa borwa, ho hlongwe folaga ya ntlo ya Rubene, ka makgotla a yona; ke morena wa bana ba Rubene, Elitsure, mora Shedeure,

¹¹ le lekgotla la hae, ka ba ngotsweng ba hae, ba dikete tse mashome a mane a metso e tsheletseng, tse nang le makgolo a mahlano.

¹² Pela hae, ho hlome ba leloko la Simeone; ke morena wa bana ba Simeone, Shelumiele, mora Tsurishaddai,

¹³ le lekgotla la hae, ka ba ngotsweng ba hae, ba kete tse mashome a mahlano a metso e robileng mono o le mong, tse nang le makgolo a mararo;

¹⁴ le ba leloko la Gade; ke morena wa bana ba Gade, Eliasafe, mora Reuele,

¹⁵ le lekgotla la hae, ka ba ngotsweng ba hae, ba kete tse mashome a mane a metso e mehlano, tse nang le makgolo a tsheletseng a nang le mashome a mahlano.

¹⁶ Bongata jwa ba ngodilweng, ba diahelo tsa ntlo ya Rubene, ya eba dikete tse lekgolo le le leng le nang le mashome a mahlano a motso o mong, tse nang le makgolo a mane a nang le mashome a mahlano, ka palo ya makgotla a bona. Ke bona ba tlang ho tloha ba bobedi.

¹⁷ Jwale, ho ntoo tloha tente ya pokano le Balevi, ba le mahareng a matlo a mang; ba tla tsamaya ka mokgwa oo ba emisang ka wona, e mong le e mong ka ho boloka baka sa hae, tlasa folaga ya habo.

¹⁸ Ka nqa bophirimela, ho hlongwe folaga ya ntlo ya Efraime, ka makgotla a yona; ke morena wa bana ba Efraime, Elishama, mora Ammihude,

¹⁹ le lekgotla la hae, ka ba ngotsweng ba hae, ba dikete tse mashome a mane, tse nang le makgolo a mahlano.

²⁰ Pela hae, ho hlome ba leloko la Manasse; ke morena wa bana ba Manasse; Gamaliele, mora Pedahtsure,

²¹ le lekgotla la hae, ka ba ngotsweng ba hae, ba kete tse mashome a mararo a metso e mmedi, tse nang le makgolo a mabedi;

²² le ba leloko la Benjamine; ke morena wa bana ba Benjamine Abidane, mora Gideoni,

²³ le lekgotla la hae, ka ba ngotsweng ba hae, ba kete tse mashome a mararo a metso e mehlano, tse nang le makgolo a mane.

²⁴ Bongata jwa ba ngodilweng, ba diahelo tsa ntlo ya Efraime, ya eba dikete tse lekgolo le le leng le metso e robileng meno e le mmedi, tse nang le lekgolo le le leng, ka palo ya makgotla a bona. Ke bona ba tlang ho tloha ba boraro.

²⁵ Ka nqa leboya, ho hlongwe folaga ya ntlo ya Dane, ka makgotla a yona; ke morena wa bana ba Dane, Akiesere, mora Ammishaddai,

²⁶ le lekgotla la hae, ka ba ngotsweng ba hae, ba kete tse mashome a tsheletseng a metso e mmedi, tse nang le makgolo a supileng.

²⁷ Ba tlang ho hloma pela hae, ke ba leloko la Asere; ke morena wa bana ba Asere, Pagiele, mora Okrane,

²⁸ le lekgotla la hae, ka ba ngotsweng ba hae, ba kete tse mashome a mane a motso o mong, tse nang le makgolo a mahlano;

²⁹ le ba leloko la Nefthali; ke morena wa bana ba Nefthali, Akira, mora Enane, le lekgotla la hae, ka ba ngotsweng ba hae, ba kete tse mashome a mahlano a metso e meraro, tse nang le makgolo a mane.

³⁰ Bongata jwa ba ngodilweng, ba diahelo tsa ntlo ya Dane, ya eba dikete tse lekgolo le le leng le nang le mashome a mahlano a metso e supileng, tse nang le makgolo a tsheletseng.

³¹ Ke bona ba tlang ho tloha ba ho qetella le difolaga tsa bona.

³² Ke bona bao bana ba Iseraele, ba kileng ba ngolwa ka matlo a bontata bona. Bongata jwa ba ngodilweng ba matlo ao, ka makgotla a bona, ya eba dikete tse makgolo a tsheletseng a metso e meraro, tse nang le makgolo a mahlano a mashome a mahlano.

³³ Empa Balevi ha ba ka ba ngollwa hara bana ba Iseraele, kamoo Jehova a neng a laetse Moshe kateng.

³⁴ Bana ba Iseraele ba etsa tsohle kamoo Jehova a di laetseng Moshe kateng. Ba ne ba emisa jwalo mabapa le difolaga tsa bona, mme ba ne ba tloha jwalo, e mong le e mong ka ntlo ya hae le ka ntlo ya bontatae.