Mattheu 17 - Sesotho 1909/1961 (SO)

Ponahalo e kganyang ya Jesu thabeng.

¹ Matsatsi a tsheletseng ha a fetile, Jesu a nka Petrose, le Jakobo, le Johanne, ngwanabo Jakobo, mme a ya le bona kathoko, thabeng e telele.

² A fetoha pontsheng ho bona; sefahleho sa hae sa kganya jwaloka letsatsi, mme diaparo tsa hae tsa eba tshweu jwaloka lesedi,

³ mme hang, Moshe le Elia ba ba hlahela, ba buisana le yena.

⁴ Yaba Petrose o bua, a re ho Jesu: Morena, ho molemo ha re ka dula mona; ha o rata, a re keng re etse metlotlwane e meraro mona: o mong e be wa hao, o mong e be wa Moshe, o mong e be wa Elia.

⁵ A re a sa bua, leru le kganyang la hlaha, la ba kgurumetsa, mme ha utlwahala lentswe le tswang lerung, le re: Enwa ke Mora wa ka ya ratwang, eo ke kgahliswang ke yena; mo utlweng!

⁶ Barutuwa ha ba utlwa lentswe, ba wa ka difahleho tsa bona, ba tshohile haholo.

⁷ Empa Jesu a atamela, a ba ama, a re: Tsohang, le se ke la tshaba.

⁸ Ha ba emisa mahlo, ha ba ka ba hlola ba bona motho, haese Jesu a nnotshi.

⁹ Yare ha ba theoha thabeng, Jesu a ba laela, a re: Pono eo le se ke la e bolella motho, Mora motho a eso ho tsohe bafung.

Elia o se a tlile.

¹⁰ Barutuwa ba hae ba mmotsa, ba re: Na ke ho reng, ha bangodi ba re: E ka kgona Elia a tle pele?

¹¹ Jesu a araba, a re ho bona: Kannete Elia o tshwanetse ho tla, a busetse tsohle tokeng.

¹² Empa ke re ho lona: Elia o se a tlile, mme ha ba ka ba mo tseba; ba mpa ba mo entse hohle hoo ba ho ratileng; Mora motho le yena o tla utlwiswa bohloko jwalo ke bona.

¹³ Jwale, barutuwa ba utlwisisa hobane o ba lekanyetsa Johanne Mokolobetsi.

Phodiso ya mohlankana ya jewang ke sethwathwa.

¹⁴ Eitse ha ba etla ho bongata, motho a mo atamela, a mo kgumamela ka mangwele,

¹⁵ a re: Morena, utlwela mora ka bohloko; hobane o jewa ke sethwathwa, mme o kula hampe; hobane hangata o wela mollong, mme hangata a wele metsing.

¹⁶ Ke se ke mo hlahisitse ho barutuwa ba hao, empa ha ba ka ba tseba ho mo fodisa.

¹⁷ Jesu a araba, a re: Moloko o sa dumeleng, o kgopo, ke tla ba le lona ho le hokae na? Ke tla le behela pelo ho le hokae na? Mo tliseng mona ho nna.

¹⁸ Mme Jesu a kgalemela motemona haholo; motemona a tswa ngwaneng eo, mme ngwana a fola ka yona nako eo.

¹⁹ Yaba barutuwa ba tla ho Jesu kathoko, ba re ho yena: Na re kile ra sitwa keng ho leleka motemona eo?

²⁰ Jesu a re ho bona: Ke ka baka la ho se dumele ha lona; hobane kannete ke re ho lona: Hoja le na le tumelo e ka ka hlaku ya mosetareta, leha le be le ka re ho thaba ena: Fallela mane; e ka fallela teng, mme ho ka be ho se letho le le sitang.

²¹ Empa mofuta oo wa batemona ha o tswe, haese ka thapelo le ka ho itima dijo.

Jesu o boela a porofeta lefu la hae le tsoho ya hae.

²² Ha ba sa ya le Galelea, Jesu a re ho bona: Mora motho o tla neelwa matsohong a batho.

²³ Ba tla mmolaya, empa o tla tsoha ka tsatsi la boraro. Yaba barutuwa ba swaba haholo.

Jesu o ntsha lekgetho.

²⁴ Eitse ha ba fihla Kapernauma, ha tla ho Petrose ba bokellang didrakema, ba re ho yena: Ana moruti wa lona ha a ntshe didrakema na?

²⁵ A re: Tjhe, o a e ntsha. Eitse hobane a kene tlung, Jesu a mo qala, a re ho yena: Ho jwang ho wena, Simone? Marena a lefatshe a nka lekgetho la kgwebo le la lehae ho bafe? Na a ke ho bana ba wona, kapa a ke ho ba ditjhaba tse ding na?

²⁶ Petrose a re ho yena: Ke ho ba ditjhaba tse ding. Jesu a re ho yena: Ha ho le jwalo bana bona ba lokolohile lekgethong.

²⁷ Empa ka ho re, re se ke ra ba kgopisa, eya lewatleng, o akgele selope teng, mme o tshwase hlapi e tla phahama pele; etlare ha o e ahlamisa molomo, o tla fumana tjhelete ya setatera teng; o e nke, o ba nee yona, e lefelle nna le wena.