Teuteronome 2 - O LE TUSI PAIA

O LE MATAUPU II. O le tala i mea na faia ia Etoma ma nisi nuu.

¹ Ona tatou liliu ane lea, ma tatou o atu i le vao i le ala i le sami Ulaula, e pei ona fetalai mai o Ieova ia te au; e tele lava aso ua tatou siosio ai le mauga o Seira.

² Ona fetalai mai lea o Ieova ia te au, ua faapea mai,

³ Ua leva ona outou siosioina lenei mauga, ia outou liliu ane i le itu i matu.

⁴ Ia e fai atu i le nuu, ia faapea atu, O le a outou ui ane i le tuaoi o outou uso, o le fanauga a Esau, o e nonofo i Seira, latou te matatau ia te outou, ia outou lava;

⁵ aua ne‘i outou tau ma i latou, auā ou te le avatu ia te outou sina o latou fasi fanua, e leai sina mea e tusa ma se tulagāvae, auā ua ou avatu le mauga o Seira, o le tofi lea o Esau.

⁶ Tou te faatau mea e ‘ai mai ia te i latou i tupe, tou te aai ai, o le vai foi tou te faatau mai ai ia te i latou i tupe, tou te inu ai.

⁷ Auā ua faamanuia oe e Ieova lou Atua i galuega uma a ou lima; ua na silafia lou savaliga i lenei vao tele, na ia te oe Ieova lou Atua i ona tausaga e fagafulu; e leai lava se mea na e mativa ai.

⁸ Na tatou o ane nai o tatou uso le fanauga a Esau, o e ua nonofo i Seira, i le ala i le eleele laugatasi nai Elata ma Esiokape, ona tatou liliu lea, ma o ane i le ala i le vao o Moapi.

⁹ Ona fetalai mai lea o Ieova ia te au, Aua e te faasaua atu ia Moapi, aua foi e te tau ai se taua ma i latou; auā ou te le avatua ia te oe sina ona fasi fanua e fai mou, auā ua ou avatu Aro i le fanauga a Lota e fai mo latou.

¹⁰ Sa nonofo ai sa Ememā anamua, o le nuu lea e malolosi ma le toatele, e maualuluga foi e pei o sa Anakī.

¹¹ Ua ta‘ua foi i latou o tagata maualuluga, e pei o sa Anakī, a ua faaigoaina i latou o Emema e sa Moapī.

¹² Sa nonofo foi o sa Horī i Seira anamua, a ua tulia i latou e le fanauga a Esau, ma latou faaumatia i latou ai o latou luma, ma nonofo i le mea sa i ai i latou, e pei ona faia e Isaraelu i le nuu ua fai mona tofi, ua foaiina e Ieova ia te i latou.

¹³ O lenei, ina tutū ia outou, ma sopoia atu le alia o Sareta. Ona tatou sopoia lea o le alia o Sareta.

¹⁴ O ona aso na tatou savavali ai nai Katesapanea, ua oo ina sopoia atu o le alia o Sareta, e tolu sefulu ma le valu o ona tausaga ia; ua oo ina faaumatia o lea tupulaga o tagata tau ai le toagālauapi, e pei ona tauto ai o Ieova ia te i latou.

¹⁵ Auā ua oo ia te i latou le aao o Ieova e faauma ai ia i latou ai le toagālauapi, ua oo ina faaumatia i latou.

¹⁶ Ua iu foi ina ua faaumatia i le oti o tagata tau uma lava ai le nuu,

¹⁷ ona fetalai mai ai lea o Ieova ia te au, ua faapea mai,

¹⁸ O le aso nei e te ui ane ai i Aro o le tuaoi o Moapi;

¹⁹ a e faalatalata atu foi e feagai ma le fanauga a Amoni, aua ne‘i e faasaua ia i latou, aua foi e te tau ma i latou, auā ou te le avatu ia te oe sina fasi fanua o le fanauga a Amoni e fai mou, auā ua ou avatu ai i le fanauga a Lota e fai mo latou.

²⁰ Na ta‘ua foi lea o le nuu o tagata maualuluga, sa nonofo ai tagata maualuluga anamua, ua faaigoaina foi i latou e sa Amonī o Samasuma;

²¹ o le nuu lea e malolosi ma le toatele, e maualuluga foi e pei o sa Anakī; a ua faaumatia i latou e Ieova ai o latou luma, na latou tulia foi i latou, ma latou nonofo i le mea sa i ai i latou;

²² e pei ona faia e ia i le fanauga a Esau e ua nonofo i Seira, ina ua faaumatia e ia o sa Horī ai o latou luma, ua latou tulia i latou, ma latou nonofo i le mea sa latou i ai, ua oo mai lava i nei ona po.

²³ O sa Gavī foi sa nonofo i Haserima e oo atu i Kasa, o sa Kafatorī na o mai mai Kafatori ua faaumatia i latou, ma ua latou nonofo i le mea sa i ai i latou.

²⁴ Ina tutū ia outou, o atu ia, ma sopoia atu le alia o Arinona; faauta, ua ou tuuina i lou lima o Sekono le tupu o Hesepona o le sa Amorī, ma lona fanua, ia e amata nei lava ona fai mou, i le e tau ai le taua mai ia.

²⁵ O le aso nei e amata ai ona ou faaoo atu le mata‘u, ma le atuatuvale ona o oe i nuu o i le lalolagi uma, e lagona e i latou se tala ia te oe, ma latou gatete, ma faavaivai i ou luma.

²⁶ Ona ou aauina atu lea o le sāvali ai le vao o Katemoti ia Sekono le tupu o Hesepona, ma upu o le filemu, ua faapea atu ai,

²⁷ Se‘i ou ui atu i lou nuu, o le ala tele ou te savali ai, ou te le liliu ane i le itu taumatau, po o le itu tauagavale.

²⁸ E te faatauina mai mea e ‘ai i tupe, ou te ‘ai ai, e te au mai foi ni vai i tupe, ou te inu ai, na ona ui atu lava ou vae.

²⁹ E pei ona faia ia te au e le fanauga a Esau, e ua nonofo i Seira, ma sa Moapī e ua nonofo i Aro, seia ou sopoia atu Ioritana, i le nuu ua foaiina mai ia te i matou e Ieova lo matou Atua.

³⁰ A ua le mafai Sekono le tupu o Hesepona ona tatou ui ane i ai; auā na faamaaa e Ieova lou Atua lona loto, ma ua faafinauvaleina o ia, ina ia tuuina atu o ia i lou lima, e pei ona faia i le aso nei.

³¹ Ona fetalai mai lea o Ieova ia te au, Faauta, ua ou tuuina atu nei lava o Sekono ma lona nuu ia te oe, ia e fai nei lava mou lona nuu.

³² Ona latou o mai lea o Sekono ma lona nuu uma e faafetaiai ia i tatou e tau ai le taua i Iaesa;

³³ na tuuina mai foi i latou e Ieova lo tatou Atua ia te i tatou, ona tatou fafasi ai lea ia te ia, ma ona atalii, atoa ma lona nuu uma.

³⁴ Ona tatou aea ai lea ona aai uma lava i ia ona po, ma tatou faaumatia o tane, ma fafine, ma tama iti i aai uma lava, ua leai se tasi na tatou faatoeina;

³⁵ na o manu na ave ma tatou, atoa ma vete i aai na tatou faoa.

³⁶ E afua mai i Aroeru, o i le auvai o le alia o Arinona, ma le aai i le alia, ua oo atu i Kiliata, e leai lava se aai na sili lo latou malosi i lo tatou, ua foaiina mai uma e Ieova lo tatou Atua ia te i tatou.

³⁷ Na o le nuu o le fanauga a Amoni ua e le oo i ai, o se mea e tasi e latalata ane i le alia o Iapoka, po o aai o i mauga, po o se mea na vavao mai ai e Ieova lo tatou Atua.