Salāmo 147 - O LE TUSI PAIA

O LE SALAMO CXLVII. O le mana ma le agalelei o Ieova.

¹ Ia outou vivii atu ia Ioa, auā e lelei ona fai pesega i lo tatou Atua; auā e matagofie, e ono lava le viiga.

² O loo atiina ae Ierusalema e Ieova; e faapotopotoina e ia o Isaraelu sa tulia.

³ E faamaloloina e ia e ua loto momomo; e fufusi e ia o latou manua.

⁴ O loo faitaulia e ia le aofai e fetu; ua faaigoaina e ia o latou igoa uma lava.

⁵ E silisili lava lo tatou Alii, e tele lona malosi; e le ma faamatalaina lona poto.

⁶ E lagolago Ieova i e ua puapuagatia; a e lafotuina e ia e ua amio leaga ia toele.

⁷ Ia outou pepese atu ia Ieova i le viiga; ia outou fai pesega i lo tatou Atua i le kitara.

⁸ O lē ufitia le lagi i ao, o lē saunia le ua mo le eleele; o lē faatupu le mutia i mauga.

⁹ O lē avatu i le manu vaefa lana mea e ‘ai, e faapea foi i le toloai a le oreva, pe a tagi ia te ia.

¹⁰ E le fiafia o ia i le malosi o le solofanua; e le finagalo ia i vae o le tagata.

¹¹ O loo finagalo Ieova i e matatau ia te ia, o e faamoemoe i lona alofa.

¹² Ierusalema e, ia e vivii atu ia Ieova; Siona e, ia e vivii atu i lou Atua;

¹³ auā o loo faamalosia e ia o faamau faalava o ou puipui; o loo faamanuia e ia lau fanau i totonu ia te oe.

¹⁴ O lē faatupu le filemu i ou tuaoi; o lē fafaga ia te oe ia ma‘ona i le saito e sili ona lelei.

¹⁵ O loo auina mai e ia lana poloaiga i le nuu, e momo‘e televave lana afioga.

¹⁶ O lē auina mai le kiona e pei o fulufulu mamoe; o le na te lulusoloina le sauto‘a e pei o lefulefu.

¹⁷ O lē auina mai lana vaito‘a pei o momoi mea. O ai se na te tulai i luma o lona maalili?

¹⁸ E tŭlei mai lana afioga, ona liu suāvai ai lea o ia mea; e faaagi mai e ia lona matagi, ona tafe mai ai lea o vai.

¹⁹ Na te faaalia ana afioga ia Iakopo; o ana tulafono ma faamasinoga ia Isaraelu.

²⁰ E lei faapea ona faia e ia i se tasi lava nuu; e lei iloa foi e i latou ana faamasinoga. Ia outou vivii atu ia Ioa.