Salāmo 144 - O LE TUSI PAIA

O LE SALAMO CXLIV. O le tatalo ina ia manuia. O le salāmo a Tavita.

¹ Ia faafetaia Ieova lo‘u papa, o lē a‘oa‘o mai i ou lima i le taua, ma o‘u tamatamai lima e tau a‘i le taua.

² O lē alofa mai ia te au; o lo‘u ‘olo foi o ia, o lo‘u ‘olo maualuga, o lo‘u faaolataga, o lo‘u talita, o ia foi ou te faatuatua i ai; o le na te faatoilaloina lo‘u nuu ia te au.

³ Ieova e, se a ea le tagata e te silafia ai o ia? Po o le atalii o le tagata e te manatua mai ai o ia?

⁴ O le tagata o loo tusa ia ma le mea le aoga; o ona aso e pei o le ata a mavae atu.

⁵ Ieova e, ina lolou ifo ia lou lagi ma ia e afio ifo; ia papai ifo i mauga, ona pupusa ai lea.

⁶ Ia e matuā faaemo mai le uila, ma faataapeape ai ia te i latou; ia e fanafana atu au u, ma tuli ai ia te i latou.

⁷ Tuu mai ia ou aao mai lugā, laveai mai ia ia te au; faaola mai ia ia te au i vai e tele, o lima o tagata ese;

⁸ o e lafo upu pepelo i o latou gutu; o latou lima taumatau foi o lima taumatau pepelo ia.

⁹ Le Atua e, ou te pese i le pese fou ia te oe; ou te fai pesega ia te oe i le napeli e sefulu ona manoa.

¹⁰ O le na te avatua le olataga i tupu; o lē laveai i lana auauna o Tavita ai le pelu e leaga ai.

¹¹ Ia e laveai mai ia te au, ma faaola mai ia te au ai lima o tagata ese, o e lafo upu pepelo i o latou gutu; o latou lima taumatau foi o lima taumatau pepelo ia;

¹² ina ia avea o matou atalii pei o laau totō, ua tupu tele a o taulelea i latou; o matou afafine ia pei o tulimanu ua togitogiina e pei o se maota.

¹³ Ia tutumu o matou fale saito e maua mai ai lea mea ma lea mea; ia tutupu a matou mamoe ia afe ma mano i o matou fanua.

¹⁴ Ia malolosi a matou povi i amo; ia le oso mai, ia le alu ese atu; ia leai foi se auega i o matou malae.

¹⁵ Amuia le nuu o loo faapena i latou; amuia le nuu e fai Ieova mo latou Atua.