Sakaria 14 - O LE TUSI PAIA

O LE MATAUPU XIV O le malo o le Mesia. O le taui o e ita ia Ierusalema. O lo latou liliu mai i le Alii.

¹ Faauta, o le a oo mai le aso o Ieova, e tufaina ai i totonu ia te oe o lou oa o le a vetea.

² Auā ou te faapotopotoina nuu uma e tau ma Ierusalema; e aea le aai, e vetea foi fale, ma fetosoina fafine, e ta‘ita‘i faatagataotauaina le tasi vaega o le aai; a o e totoe o le nuu, e le faate‘aeseina i latou i le aai.

³ Ona afio atu lea o Ieova e tau ma ia nuu, pei o le aso na tau ai o ia i le aso o le taua.

⁴ E tu ona aao i lea aso i luga o le mauga o Olive, o loo feagai ma Ierusalema i gagae; e vaeluaina foi le mauga o Olive i totonu i sasae ma sisifo, o le vanu tele lava; e te‘a atu le tasi itu o le mauga i le itu i matu, ma le tasi ona itu i le itu i toga.

⁵ Ona outou sosola lea i le vanu o i o‘u mauga; auā e pāia Asela i le vanu o mauga; tou te sosola foi, pei ona outou sosola i le mafuie i ona po o Usia le tupu o Iuta; e afio mai lava Ieova lo‘u Atua ma le au paia uma faatasi ma oe.

⁶ E oo lava i lea aso, e le i ai le malamalama o mea aoga, a o le pouliuli lava;

⁷ a e oo mai le aso, e tasi lava ia, (ua silafia lava e Ieova,) e le o le ao, e le o le po; a e a oo i le itu aso afiafi e malamalama ai.

⁸ O lea aso foi e alu atu ai le vai ola nai Ierusalema o le tasi ona vaega e tafe atu i le sami i sasae, a o le isi ona vaega e tafe atu i le sami i sisifo; o le tausaga vevela ma le tausaga maalili e fai ai ia mea.

⁹ E fai foi Ieova ma Tupu i le lalolagi uma lava; o lea aso ua na o Ieova ai lava, ma lona suafa e āu tasi lea.

¹⁰ E liua le nuu uma pei o le fanua laugatasi, e pau mai i Kepa e oo i Rimoni i le itu i toga o Ierusalema; e faaeaina foi o ia, ma nofo i lona lava nuu, e pau mai i le faitotoa o Peniamina e oo i le mea sa i ai le faitotoa anamua, e oo i le faitotoa o tulimanu; e pau mai foi i le ‘olo o Hananiali, e oo i le tuugāuaina a le tupu.

¹¹ Latou te nonofo ai, e le toe ai se faafanoga; e nofo lava Ierusalema ma le filemu.

¹² O lenei le mala e taia a‘i e Ieova o nuu uma e tau ma Ierusalema; e lāuvale lava o latou tino, a o tutū i o latou vae; e totō o latou mata i mea e tutū ai, ma o latou laulaufaiva e faaumatia ia i o latou gutu.

¹³ O lea aso foi e i ai ia te i latou le atuatuvale tele mai ia Ieova; ona taitasi ai lea ma tago o le tasi i le lima o le tasi; e taitasi foi ma sii i luga o latou lima o le tasi i le tasi.

¹⁴ O Iuta foi e ‘au i laua ma Ierusalema; e faaputuina oloa o nuu uma e ua vagavagai, o auro, ma ario, ma ofu e tele lava.

¹⁵ E faapea foi ona i ai le mala i le solofanua, ma le falata, ma le kamela, ma le asini, atoa ma manu uma e i ai i ia toagālauapi, e tusa ma lenei mala.

¹⁶ O e totoe uma lava i nuu uma o e o mai e tau ma Ierusalema, latou te o ae lava i lea tausaga ma lea tausaga e ifo i le Tupu, o Ieova o ‘au; e fai ai foi le tausamiga o fale apitaga.

¹⁷ A o le le alu ae ai itu aiga o le lalolagi i Ierusalema e ifo i le Tupu, o Ieova o ‘au, ona leai lea o se uaga ia te i latou.

¹⁸ A e afai e le alu ae le itu aiga o Aikupito, ma latou le o mai, e leai foi se uaga ia te i latou; ona i ai lea o le mala e taia a‘i e Ieova o nuu o e le o ae e fai le tausamiga o fale apitaga.

¹⁹ O le sala lena a Aikupito, ma le sala a nuu uma, o e le o ae e fai le tausamiga o fale apitaga.

²⁰ O lea aso e i ai i tagitagi uamea o solofanua, E paia ia Ieova; o ulo foi i le fale o Ieova, e tutusa ia ma ipu i luma o le fata faitaulaga.

²¹ O ulo uma foi i Ierusalema ma Iuta, e paia lava ia ia Ieova o ‘au; o i latou uma o e fasi manu, latou te o mai ma ave nisi ulo, ma tunu ai; e le toe i ai lava se sa Kananā i le fale o Ieova o ‘au i lea aso.