Ieremia 5 - O LE TUSI PAIA

O LE MATAUPU V. O le toasa o le Atua ia Iuta ona o a latou agasala.

¹ Ia outou fetaufetuliai i ala o Ierusalema, ma ia vaavaai, ma ia iloa, ma ia outou sailiili i ona malae, pe tou te maua ai se tagata, pe ai se tasi ua ia faia le mea tonu, ma ua taumafai ina ia faamaoni, ona ou faamagaloina ai lea o le aai.

² E ui lava ina ua latou faapea mai, O loo soifua Ieova; a ua latou tauto pepelo lava.

³ Ieova e, e le silasila ea ou fofoga i le ua faamaoni? Ua e sasaina i latou, a ua le tiga i latou; ua e faaumatia i latou, a ua latou le mafafai ona talia o le aoaiga; ua latou faamaaa o latou mata e sili i le papa, ua latou le mafafai ona toe foi mai.

⁴ Ona ou fai ane ai lea, Ai lava o tagata lautele i latou, e valelea i latou; auā latou te le iloa le ala o Ieova, ma le faamasinoga a lo latou Atua.

⁵ Ou te alu lava a‘u i alii, ou te tautala atu ia te i latou; auā o i latou ua latou iloa le ala o Ieova, ma le faamasinoga a lo latou Atua; a e peitai o i latou, ua latou gausia lava le amo, ma latou motusi ese i noanoaga.

⁶ O le mea lea e oti ai i latou i le leona mai le vao, e fano i latou i le luko o le afiafi; e lamalama le nameri i o latou aai; o i latou uma e o atu ai e saeia lava i latou; auā ua tele o latou solitulafono, ua atu lasi o latou liliu ese.

⁷ E faapefea ona ou faamagalo ia te oe i lenei mea? Ua tuua a‘u e lau fanau, a ua latou tauto i mea e le ni atua; na ou fafaga ia te i latou ua maoona, a ua latou mulilulua ma latou faapotopoto atu i le fale o le fafine talitane.

⁸ Ua ni solofanua poa e pepeti i latou i le taeao, ua latou taitasi ma tagi i le avā a lē la te tuaoi.

⁹ Ou te le taui atu ea ia te i latou ona o ia mea, o loo fetalai mai ai Ieova; e le taui atu ea ma sui e lo‘u agaga i le nuu faapena?

¹⁰ Ina aea ia e outou o ona pa, ma outou lepetia ai; a e aua tou te matuā faaumatia; ina aveeseina ia ona moemoe, auā e le o a Ieova ia.

¹¹ Auā ua matuā amio faa‘ole‘ole mai ia te au le aiga o Isaraelu, ma le aiga o Iuta, o loo fetalai mai ai Ieova.

¹² Ua latou faafiti ia Ieova, ma latou fai atu, E leai o ia; e le oo mai foi ia te i matou se leaga, o le iloa foi e i matou le pelu, po o le oge;

¹³ e fai foi perofeta ma matagi, e leai foi se upu ia te i latou; e faapea ona faia ia te i latou.

¹⁴ Lenei la, o loo faapea ona fetalai mai o Ieova, le Atua o ‘au, Ua outou fai mai lenei upu, faauta mai, o le mea lea ou te fai ai a‘u upu i lou gutu ma afi, e fai foi lenei nuu ma fafie, e susunuina lava i latou.

¹⁵ Faauta, le aiga o Isaraelu e, o loo ou aumaia se nuu ai le mea mamao e tau ma outou, o loo fetalai mai ai Ieova; o le nuu malosi lea, o le nuu o le vavau, o le nuu foi tou te le iloa la latou gagana, tou te le lagona foi se mea latou te fai mai ai.

¹⁶ O la latou utu u fanafana e pei o se tuugamau ua faamaga; o toa i latou uma.

¹⁷ Latou te ‘aina lau saito ma au mea e ‘ai, o mea e ‘ai ia a ou atalii ma ou afafine; latou te ‘aina au lafu mamoe ma au lafu povi; latou te ‘aina ou vine ma ou mati; latou te faatafunaina i le pelu ou aai nofo ‘olo ua e faatuatua i ai.

¹⁸ A o ia ona po ou te le matuā faaumatia ai outou, o loo fetalai mai ai Ieova.

¹⁹ A outou fai mai, Ona o le a ea ua faia e Ieova lo tatou Atua o ia mea uma ia te i tatou? Ona e fai atu ai lea ia te i latou, E pei ona outou tuua o a‘u, ma outou auauna i atua ese i lo outou nuu, e faapea foi ona outou auauna atu i tagata ese i le nuu e le o lo outou.

²⁰ Ina ta‘u atu ia lenei mea i le aiga o Iakopo, ma faailoa atu ai i Iuta, ia faapea atu,

²¹ Ina faalogologo mai ia i lenei mea, o outou le nuu vālea ma le le mafaufau; e fai o latou mata, a e le vaai i latou; e fai foi o latou taliga, a e le faalogo i latou.

²² Tou te le fefefe ea ia te au? o loo fetalai mai ai Ieova; tou te le gatete ea i o‘u luma? o a‘u na ou tuuina le oneone e fai ma tuaoi o le sami; o le tulafono e faavavau lea, e le masopoia; e ui ina fāti tetele mai ona galu, e le mafaia lava; e ui ina taalili mai, e le masopoia lava.

²³ A o lenei nuu, ua i ai le loto vaogata ma le fouvale; ua liliu ese i latou, ma ua latou o.

²⁴ Ua latou le fai ifo foi i o latou loto, Se‘i tatou matatau ia Ieova lo tatou Atua, o le na te foai mai le ua, o le uaga muamua ma le uaga mulimuli i ona lava aso; o le na te tausia foi mo i tatou ona vaiasosa ua atofaina e fai ai le seleselegāsaito.

²⁵ O a outou amio leaga ua liliueseina ai ia mea; o a outou agasala foi ua taofia ai mea lelei ai ia te outou.

²⁶ Auā ua i ai i lo‘u nuu o tagata amio leaga; ua latou lamalama e pei ona faapuga o e mailei manu; ua latou tuu le mailei, ua latou maua tagata.

²⁷ E pei ona tumu o le āoa i manu felelei, e faapea ona tutumu o latou fale i le tau‘ole‘ole; o le mea lea ua faasilisiliina ai i latou, ma faatamaoaigaina ai.

²⁸ Ua puputa i latou, ua usiusi; ua silimusa i latou ona fai amio leaga; ua latou le fai le finauga, o le finauga lava a le ua aumatuā, a ua manuia i latou; o le faamasinoga foi a e matitiva ua latou le faamasinoina.

²⁹ Ou te le taui atu ea ia te i latou ona o ia mea? o loo fetalai mai ai Ieova; e le taui atu ea ma sui e lo‘u agaga i le nuu faapena?

³⁰ Ua faia i le nuu le mea e ofo ai ma le inosia;

³¹ ua vavalo le au perofeta i mea pepelo, ua pule foi le au faitaulaga ma le usiusitai ia te i latou; ua loto foi lo‘u nuu ina ia faapea; ia, se a se mea tou te faia i ona iuga?