Galuega 11 - O LE TUSI PAIA

O LE MATAUPU XI. O le faatonu atu a Peteru i lona alu atu i nuu ese.

¹ Ua faalogo e le au aposetolo ma le au uso o i Iutaia, ua talia e nuu ese le afioga a le Atua.

² Ua alu ae foi Peteru i Ierusalema, ona fefinauai lea ma ia o le au peritome, ua faapea mai,

³ Na e alu atu i tagata e le peritomeina, na outou aai foi faatasi ma i latou.

⁴ Ona afua lea o Peteru ona folafola faasolo ia te i latou, ua faapea atu,

⁵ O a‘u nei, sa ou tatalo i le aai o Iopa; na ou iloa le faaaliga ina ua faalia mai, o le tasi mea ua alu ifo pei se ie lautele, ua tuutuu ifo mai le lagi i ona pito e fa;

⁶ ua oo lava ia te au; ua ou pulatoa ma manatunatu i ai, ona ou iloa atu lea o manu vaefa e tataa, ma manu feai, ma mea fetolofi, ma manu felelei.

⁷ Na ou faalogo atu foi i le siufofoga, ua faapea mai ia te au, Peteru e, ina tu ia i luga, ina fasi, ma ‘ai.

⁸ A ua ou fai atu, Le Alii e, aua lava; auā e lei to‘ia lava lo‘u gutu i sina mea e ‘ai e sa, po o se mea e leaga.

⁹ A ua toe tali mai ia te au le siufofoga mai le lagi, O me ua faamamāina e le Atua, aua e te ta‘ua e sa.

¹⁰ Na faia faatolu lenei mea, ona toe sisi lea o mea uma lava i le lagi.

¹¹ Faauta foi, sa tutū loa mai tagata e toatolu i le fale na ou i ai na aauina ia te au mai Kaisareia.

¹² Na fai mai le Agaga ia te au matou te o ma i latou, aua lava le masalosalo vale. Na matou o foi ma le au uso nei e toaono, na matou ulu atu foi i le fale o le tagata.

¹³ Ua na tala mai ia te i matou i lona iloa atu i le agelu na tu mai i lona fale, ma fai atu ia te ia, Ina aau atu ia ni tagata i Iopa, e aami ia Simona e igoa ia Peteru;

¹⁴ na te fai mai upu ia te oe, e faaolaina ai oe atoa ma lou aiga uma lava.

¹⁵ Na amata ona ou tautala atu, ona afio ifo lea o le Agaga Paia ia te i latou, faapei ona afio ifo ia te i tatou i le amataga.

¹⁶ Ona ou manatua lea o le afioga a le Alii, ua faapea mai, Na papatiso lava Ioane i le vai, a e papatisoina outou i le Agaga Paia.

¹⁷ O lenei, afai e tusa le alofa ua foaiina mai e le Atua ia te i tatou atoa ma i latou, ina ua faatuatua i le Alii o Iesu Keriso, o ai ea a‘u nei ou te mafaia ona vavao atu i le Atua?

¹⁸ Ua latou faalogo mai i ia upu, ona latou faalologo lea, ua vivii atu foi i le Atua, ua faapea ane, E moni, ua foai atu e le Atua i nuu ese le salamo e ola ai.

¹⁹ Na o atu foi e na faasalalauina i le sauaga na tupu ina ua oti o Setefano, ua oo lava i Foinie, ma Kuperu, ma Anetioka, ua le tautala atu i le upu i se tasi na o tagata Iutaia lava.

²⁰ O tagata Kuperu ma Kurene foi nisi o i latou, ua oo foi i latou i Anetioka; ua tautala i tagata Elenisi, ma folafola atu le tala lelei i le Alii o Iesu.

²¹ Sa ia te i latou le aao o le Alii; ua talitonu foi le vao tagata e toatele, ma liliu mai i le Alii.

²² Ua logo atu le tala i ia mea i taliga o le ekalesia o i Ierusalema; ona aau atu lea e i latou ia Panapa, ia alu atu o ia ia oo lava i Anetioka.

²³ Ua oo atu o ia, ma ua iloa le alofa tunoa o le Atua, ona olioli lea o ia, ma apoapoai atu ia te i latou uma lava, ia mau o latou loto ina ia pipii atu i le Alii.

²⁴ Auā o le tagata amio lelei o ia, ua tumu i le Agaga Paia ma le faatuatua; ua faaopoopoina ai foi tagata e toatele lava i le Alii.

²⁵ Ona alu lea o Panapa i Taso e saili ia Saulo.

²⁶ Ua na maua o ia, ona aumaia lea o ia i Anetioka. Ua la faatasi ma le ekalesia ua atoa le tausaga, ma a‘oa‘o atu i tagata e toatele lava; na uluai igoa foi le au soo o Kerisiano i Anetioka.

²⁷ O ona po ia na o ifo ai perofeta mai Ierusalema i Anetioka,

²⁸ Na tu i luga foi le tasi o i latou, o Akapo le igoa, na faailoa e ia mai le Agaga le oge tele o le a tupu i le lalolagi uma; sa taunuu ai foi i le nofoaiga a Kaisara Kalaotio.

²⁹ Ona filifili lea taitoatasi o le au soo, ia faatatau i mea na manuia ai, e avatu ai se alofa i le au uso o nonofo i Iutaia;

³⁰ ua fai ai foi e i latou, ua momoli e Panapa ma Saulo i toeaina.