Galuega 10 - O LE TUSI PAIA

O LE MATAUPU X. O te tala ia Konelio.

¹ Sa i Kaisareia le tasi tagata o Konelio le igoa, o le ta‘ita‘i o le toaselau i le ‘au e igoa i le ‘au a Italia;

² o le tagata amio Atua, ma le mata‘u i le Atua, atoa ma lona aiga uma, o lē avatu mea alofa e tele i le nuu, ma ua tatalo i le Atua e le aunoa.

³ Ua na iloa tino i le faaaliga, i le itu aso pe iva, o le agelu a le Atua ua ulufale mai ia te ia, ua faapea mai ia te ia, Konelio e.

⁴ Ua pulatoa o ia ia te ia, ona fefe ai lea, ua faapea atu, Le alii e, se a ea? Ua fai mai o ia ia te ia, Ua o ae au tatalo ma au mea alofa o fai ma faamanatuga i luma o le Atua.

⁵ O lenei, aau atu ia ni tagata i Iopa e aami ia Simona e igoa ia Peteru;

⁶ o loo nonofo ia ma le tasi Simona o le fai pa‘u o manu, e latalata i le sami lona fale; o ia na te ta‘u atu ia te oe mea e tusa ona e faia.

⁷ Ua alu le agelu sa tautala ma Konelio, ona valaau lea o ia i ana auauna e toalua, ma le tagata tau e amio Atua o le tasi o i latou e le te‘a ia te ia;

⁸ ua ia faamatala ia te i latou mea uma, ona aau atu lea o ia ia te i latou i Iopa.

⁹ O le taeao, a o i le ala i latou, ma ua latalata i le aai, ua alu ae ai Peteru i luga o le fale e tatalo i le itu aso pe ono.

¹⁰ Ua matelaina o ia, ua manatu e ‘ai; o latou o sauni, ua oo ia te ia le faalia;

¹¹ ua vaai atu i le lagi ua avanoa, ma le tasi mea ua alu ifo ia te ia, pei se ie lautele, ua noatia i ona pito e fa, ma tuutuu ifo i le lalolagi;

¹² ua i ai manu vaefa uma lava e tataa, ma manu feai, ma mea fetolofi, ma manu felelei.

¹³ Ona tūlei mai lea o le siufofoga ia te ia, Peteru e, ina tu ia i luga, ina fasi, ma ‘ai.

¹⁴ A ua fai atu Peteru, Le Alii e, aua lava; auā ou te lei ‘ai lava se mea e sa, po o se mea e leaga.

¹⁵ Ua foi faalua mai le siufofoga ia te ia, O mea ua faamamāina e le Atua, aua e te ta‘ua e sa.

¹⁶ Ua fai faatolu mai lenei mea; ona toe avea lea o le mea i le lagi.

¹⁷ Ua masalosalo Peteru i lona lava loto pe se a lea faaaliga ua iloa e ia, faauta foi, o tagata na aauina e Konelio, sa latou saili i le fale o Simona,

¹⁸ ua tutū mai i le faitotoa, o valaau ma fesili, po o nofo ai Simona e igoa ia Peteru.

¹⁹ Ua manatunatu ifo Peteru i le faaaliga, a e fetalai mai le Agaga ia te ia, Faauta, o loo saili mai tagata e toatolu ia te oe.

²⁰ A e tu ia i luga, ina alu ifo, tou te o ma i latou, aua lava le masalosalo vale; auā ua aauina i latou e a‘u lava.

²¹ Ona alu ifo lea o Peteru i tagata na aauina e Konelio ia te ia, ua fai atu ai, Faauta, o a‘u lenei ua outou saili na; se a le mea ua outou o mai ai?

²² Ona fai mai lea o i latou, O Konelio le ta‘ita‘i o le toaselau, o le tagata amiotonu, ma le mata‘u i le Atua, ua ta‘uleleia e le nuu o Iutaia uma lava, na poloaiina o ia mai le Atua e le agelu paia e aami ia te oe, e te alu i lona fale, ia faalogo o ia i upu ua ia te oe.

²³ Onafai atu lea o ia ia te i latou e o mai i le fale, ua na talia foi i latou. O le taeao foi ua latou o ai ma Peteru, ua o foi faatasi ma ia nisi o le au uso mai Iopa.

²⁴ O le tasi taeao foi ua oo atu ai i latou i Kaisareia. Ua faatali foi Konelio ia te i latou, ua faapotopotoina e ia lona aiga ma ana aumea mamae.

²⁵ Ua ulufale atu Peteru, ona faafetaiai lea o Konelio ia te ia, ua faapaū i ona vae, ua ifo ia te ia.

²⁶ A ua faatu e Peteru ia te ia, ua faapea atu, Ina tu ia i luga; o a‘u nei lava o le tagata.

²⁷ Ona ulufale lea, o loo tautala i laua, ua iloa e ia e toatele ua faapotopotoina.

²⁸ Ua fai atu o ia ia te i latou, Ua outou iloa lava ua sa i le tagata Iutaia ona faatasi pe faalatalata i le tagata ese; a ua faasino mai e le Atua ia te au aua ou te ta‘uina atu ua sa pe leaga se tasi tagata.

²⁹ O le mea lea ua ou sau ai ma le le fe‘alo‘alofai, ina ua aami atu o a‘u; o lenei, ou te fesili atu, se a le mea ua outou aami atu ai a‘u?

³⁰ Ona fai mai lea o Konelio, Anā po fa sa ou anapogi ai, na oo i le itu aso faapenei; o le itu aso e iva foi sa ou tatalo ai i lo‘u fale, faauta foi, na tu mai le tagata i o‘u luma ma le ofu pupula, ua na fai mai,

³¹ Konelio e, ua faafofogaina lau tatalo, ua manatua foi au mea alofa i luma o le Atua.

³² O lenei, ia e aauina atu nisi i Iopa, e aami ia Simona, e igoa ia Peteru; o loo nofo o ia i le fale o Simona, le fai pa‘u o manu, e latalata i le sami; a sau o ia, na te tautala mai ia te oe.

³³ O lea na ou aauloaina atu ai nisi; ua lelei lava ina ua e maliu mai. O lenei, o loo iinei i matou uma lava i luma o le Atua e faalogologo atu i mea uma lava ua poloai mai ai le Atua ia te oe.

³⁴ Ona oo atu lea o le lauga a Peteru, ua faapea atu, E moni, ua ou iloa e le faailogaina tagata e le Atua;

³⁵ a e peitai o le mata‘u ia te ia i nuu uma lava, ma fai le amiotonu ua talia i latou e ia.

³⁶ Ua outou iloa le upu na molia e ia i le fanauga a Isaraelu, ua folafola ai le tala lelei o le manuia ia Iesu Keriso, o le Alii ia o tagata uma lava;

³⁷ o le upu lea sa i Iutaia uma, na afua i Kalilaia, ina ua mavae o le papatisoga sa tala‘iina e Ioane;

³⁸ o Iesu o le Nasareta, o le na faauuina e le Atua i le Agaga Paia ma le mana, o ia sa femaliuai ma agalelei ma faamalolo atu i e na faatoilaloina uma lava e le tiapolo; auā sa ia te ia le Atua.

³⁹ O molimau foi i matou i mea uma lava na faia e ia i le nuu o Iutaia atoa ma Ierusalema; o le na fasiotia foi e i latou i lo latou faatautau i le laau.

⁴⁰ O ia na toe faatuina e le Atu i le aso tolu,

⁴¹ ma na faaalitinoina o ia, e le o le nuu, uma lava, a o molimau na uluai filifilia e le Atua, o i matou nei lava sa matou aai ma feinu ma ia, ina ua toe tu mai o ia i e ua oti.

⁴² Ua na poloai mai foi ia te i matou e tala‘i atu i le nuu, ma molitino atu, o ia lava le ua tofia e le Atua e fai ma faamasino i e o ola ma e ua oti.

⁴³ Ua molitinoina mai o ia e le au perofeta uma, ona o lona suafa e maua ai le faamagalo o agasala a ē faatuatua ia te ia uma lava.

⁴⁴ Ua tautala atu Peteru i nei upu, a e afio ifo le Agaga Paia ia te i latou uma lava o e ua faalogo i le upu.

⁴⁵ Ona matuā ofo lea e na peritomeina o e faatuatua, o e na o mai ma Peteru, ina ua liligi ifo i nuu ese le alofa o le Agaga Paia.

⁴⁶ Auā ua latou faalogo atu ia te i latou ua tautala mai i gagana eseese, ma vivii atu i le Atua. Ona fai atu lea o Peteru,

⁴⁷ E mafai ea e se tasi ona vavao i le vai, ina ia le papatisoina ai i latou nei, o e ua maua le Agaga Paia pei o i tatou nei?

⁴⁸ Ua fai atu foi o ia ia papatisoina i latou i le suafa o le Alii. Ona aioi lea o i latou ia te ia ia latou nonofo ma ia i nisi aso.