Esekielu 6 - O LE TUSI PAIA

O LE MATAUPU VI. O le faatafunaina o le nuu o Isaraelu.

¹ Ua oo mai foi le afioga a Ieova ia te au, ua faapea mai,

² Le atalii e o le tagata, ina faasaga ia ou mata i mauga o Isaraelu, ma vavalo atu ia te i latou, ia e faapea atu,

³ Mauga o Isaraelu e, faalogo mai ia i le afioga a le Alii o Ieova; o loo faapea ona fetalai mai o le Alii o Ieova i le atu mauga ma mauga, o vaitafe, atoa ma vanu; Faauta, o a‘u nei ou te faaoo le pelu ia te outou, ma ou faaumatia a outou mea maualuluga.

⁴ E faatafunaina a outou fata faitaulaga, e lepetia foi a outou tupua o le la, ma ou lafoina o outou tagata fasia i luma o a outou tupua.

⁵ Ou te tuuina atu foi tino ua oti o le fanauga a Isaraelu i luma o a latou tupua, ma ou faataapeapeina o outou ivi ia soo ai a outou fata faitaulaga.

⁶ E faatafunaina aai i mea uma tou te nonofo ai, e faaumatia foi mea maualuluga, ina ia faatafunaina, ma faaumatia a outou fata faitaulaga, ma ia lepetia, ma faaiuina a outou tupua, ia vavaeina i lalo a outou tupua o le la, ma ia tineia a outou galuega.

⁷ E pauu foi e ua fasia i totonu ia te outou, tou te iloa ai o a‘u o Ieova.

⁸ A e peitai ou te faatotoeina ni o outou ia sao i le pelu i nuu ese, pe a faataapeapeina outou i nuu.

⁹ E manatu mai foi ia te au ni o outou e sao i nuu e tāfea i ai i latou, pe a ou faamomomoina o latou loto mulilulua na o ese ai ia te au, ma o latou mata mulilulua na mulimuli atu ai i a latou tupua; e ‘ino‘ino foi i latou ia te i latou ona o mea leaga ua latou faia i a latou mea inosia uma.

¹⁰ Ona iloa ai lea e i latou o a‘u o Ieova, na ou le fai atu fua, ou te faia lenei mea leaga ia te i latou.

¹¹ Ua faapea ona fetalai mai o le Alii o Ieova, Ina pati ia ou lima, ma tatū lou vae, ma fai atu, Aue i mea uma e inosia ma le leaga a le aiga o Isaraelu! e oti i latou i le pelu, ma le oge, ma le faamai.

¹² O le ua mamao e oti ia i le faamai, o le ua latalata mai e fasia ia i le pelu, o le ua toe ma ua sao e oti ia i le oge; ou te faauma atu lo‘u tiga ia te i latou.

¹³ Ona iloa ai lea e outou o a‘u o Ieova, ina ua i ai o latou tagata fasia i le va o a latou tupua e soo ai a latou fata faitaulaga, i luga o mauga maualuluga uma, i tumutumu uma o mauga, ma lalo o laau tauluuluola uma, ma lalo o ele felefele uma, o mea na latou avatu ai mea manogi lelei i a latou tupua uma.

¹⁴ Ou te faaloaloa atu foi lo‘u lima i luga ia te i latou, ma ou faia le nuu ma mea gaogao, e sili i le gaogao o le vao o i Tipelata, i mea uma latou te nonofo ai; ona latou iloa ai lea o a‘u o Ieova.