Mapisarema 97 - Shona Bible 1949 revised 2002

Ukuru hwaJehovha Mambo

¹ Jehovha anobata ushe; nyika ngaifare kwazvo; Zvivi zvizhinji ngazvifare.

² Makore nerima zvinomukomberedza; Kururama nokururamisa ndidzo nheyo dzechigaro chake choushe.

³ Moto unotungamira pamberi pake, Uchipisa vadzivisi vake pamativi ose.

⁴ Mheni dzake dzakavheneka nyika yose; Pasi pakaona, ndokubvunda.

⁵ Makomo akanyauka senamo pamberi paJehovha, Pamberi paShe wapasi pose.

⁶ Kudenga-denga kunoparidza kururama kwake, Ndudzi dzose dzakaona kubwinya kwake.

⁷ Vose, vanoshumira mifananidzo yakaveziwa, vanonyadziswa, Ivo vanozvirumbidza pamusoro pezvifananidzo; Namatai kwaari, imi vamwari vose.

⁸ Zioni rakanzwa ndokufara, Navakunda vaJudha vakafara kwazvo; Nokuda kwezvamakatonga, imi Jehovha.

⁹ Nokuti imi Jehovha, muri kumusoro-soro kwapasi pose; Makakwirira kupfuura vamwari vose.

¹⁰ Vengai zvakaipa, imi munoda Jehovha; Iye anochengeta mweya yavatsvene vake; Unovarwira paruoko rwawakaipa.

¹¹ Chiedza chinodyarirwa wakarurama, Nomufaro vane mwoyo yakarurama.

¹² Farai munaJehovha, imi vakarurama; Vongai pakurangarira utsvene hwake.